Jacky所養的狼狗以前是一隻棄犬，而且曾遭虐待。經訓練後，現在識多項絕技，尤其做龍門，是表演隊的王牌，常到醫院、教育中心作慈善表演。

寵物家

狗狗卡斯拿斯　是怎樣練成的

2013年01月17日 ~~ 第1193期香港《壹周刊》

現場睇爆炸訓犬六小福表演隊示範，連攝影師都哇哇聲。狗仔們個個身懷絕技，跨欄、跳圈、凌空接球，統統無難度。但這班狗高手，原來曾經受虐、被遺棄、有情緒病，甚至咬傷主人。帶隊的訓犬師 Jacky有三十多年經驗，自創訓犬法，不須靠打罵，足夠令惡狗轉性。最近他成立訓犬學校，公開教狗心得，希望人人養隻快樂狗。

心得一：不打罵

有些主人偏好訓犬師上門教狗，其實集體訓練更有助狗隻融入群體生活。例如白色銀狐女小飛最初怕人、易吠，集訓後變得活潑開朗。

Jacky叫一批初學者帶狗示範跳欄，中途有狗仔唔願跳兼撞跌欄，主人不但無鬧，仲用零食引牠再接再厲。「有些訓犬場，用電帶或釘帶逼狗服從，同馬戲團有咩分別？」 Jacky規定，狗仔做錯時，只可用清晰指令話佢知，但絕不打罵。

心得二：分等級

眾狗排排企，學舉手打招呼，做到後馬上得到零食獎勵。狗仔在食物引誘下，由不願做，變爭相表演動作。

據動物學家指，每隻狗都有天生屬性，如領袖（ Alpha）、副手（ Beta）， Jacky指訓犬內容要按狗的屬性而設計：「例如領袖型狗隻外向大膽，有時目中無人，訓練牠做動作要特別講求服從性。而低階狗（ Low rank）膽小怕事，表演前後都要多給鼓勵，增強牠的自信。」

心得三：完美溝通

要練成特技，不止狗要練習，人一樣要練。好像北京狗主人最初指揮手勢錯誤，手臂舉得太高、動作太快，令北京狗踩踩吓滑板中途停低。

訓犬動作不論難度高低，人與狗都要完美溝通。 Jacky建議由兩方面入手，一是食物支配權，二是行為管理權。前者用餵食令狗仔聽話，後者要主人指令清晰，「例如叫狗仔玩滑板，牠不會聽得明你的要求，主人要用手勢清楚指示。」 Jacky說，只要俾啱訊息，一些基本動作如打招呼、跳欄，五分鐘就學識。

唐狗重生

遇上狗仔做危險或攻擊行為， Helen會用嚴肅語氣說 NO。「有些主人抱起狗仔來制止牠狂吠，錯晒！擁抱會鼓勵狗仔，下次仲吠得勁。」

Helen四年前收養唐狗糖糖，當時狗女曾遭虐打，極度膽小敏感。「放狗時，糖糖見到風吹起垃圾，都會怕到縮埋一角，令我好大壓力。」兩年前 Helen找 Jacky教狗，「最驚訝是牠與師傅相處十五分鐘後，竟然肯吃他手上的食物。」 Jacky矯正 Helen平時與狗相處的態度，又教她正確的餵食和訓練方法。不出一個月，糖糖改善怕人的態度，願意練習各種動作，兩年後加入表演隊。（ Jacky訓犬班/ 9121 3540）