壹號專題

日圓急瀉　全民搶貨

2013年01月17日 ~~ 第1193期香港《壹周刊》

日本首相安倍晉三甫上任，即力推弱日圓政策，希望藉此挽救經濟，日圓匯價應聲急跌。一年前，每一百日圓兌十港元，高見十算，本週一已跌至八點七港元，恒生投資服務首席分析員溫灼培預計，今年底，更有機會跌至七算！
日圓持續下跌，時裝、海味及其他日本貨已逐漸減價，全港市民磨拳擦掌、整裝待發，狂掃日貨。

曾高見十算的日圓匯率，現已回落至八算，專家更指有排跌，年底分分鐘見七算。

日本衫抵買

樓上時裝店 Velvet專賣日本潮衫，老闆 Iris每個月都派員工飛到日本入貨兩次，日圓跌、成本跟住跌︰「我哋每次兩個 staff去四日，買貨要一百萬日圓，日圓貴時要拎十萬蚊港紙出嚟，依家八萬零蚊就得，都幾開心㗎！」至於員工在當地入貨時的花費，飲食、交通費每次約需三萬日圓；円跌，水腳亦慳了不少。
「以往有啲品牌比較貴，例如貴過三萬円嘅衫我哋唔敢入，依家都會大膽啲試吓入，睇吓反應，而家係衝破咗心理關口！」 Iris的員工在日本入貨，是逐件衫找數。「我會叫啲 staff碌多啲咭，帶少啲現金，因為日圓應該會繼續跌，下個月找數時，匯率可能又跌多啲！」原來在日本購物碌咭時可以選擇以即時匯率或找數時的匯率計算，預期日圓繼續跌的話，便應該選擇後者的計算方法。
Iris指，現時部分貨品定價會較鬆手：「以前會睇得緊啲，依家有啲運費平、輕嘅貨，好似 Hello Kitty絲襪，原價二千五百幾日圓，依家標價就可以平一百蚊港紙，大家開心囉！」

日圓貶值，原價二千五百日圓的 Hello Kitty絲襪打頭陣減價，平一百港元出售。

每個月都派員工到日本入貨的 Iris直言，成本跟隨日匯不斷下跌，她更鼓勵員工碌卡延遲找數賺盡匯率。

日本團劈價

日圓跌，小市民第一時間就想到要去日本旅行。記者到旅行社查詢，人頭湧湧，其中陳生陳太便是見到日圓持續下跌而查詢日本團︰「去過日本好多次了，不過對上兩年因為地震，一路忍住唔去！睇新聞見到紙水低咗，專登嚟問春天溫泉自由行！」日本團費已較去年中「十算時代」調低逾一成，甚至已有四日三夜的東京套票低開至$2,290，「早兩年呢個價位，連機票都買唔到！」旅行社職員說。
「見到円跌得咁急，我哋先捨得去大阪過情人節，主要都係去食吓 relax吓，預計一人花費萬五蚊左右。」做文員的吳小姐，一直嫌日本使費貴，唔捨得去日本，但日圓不斷下跌，終決定與男友到日本浪漫一番。
至於打算明年三、四月去日本睇櫻花的阿 Joe，則笑着向記者教路︰「日圓仲有得跌，去日本唔使咁快兌定円！」
專業旅運市場及產品發展總經理劉美詩預告，新年後將是日本團及套票的劈價高峰：「旅行社預訂酒店及行程都是以円結算，日匯插足一成半加上淡季效應；二、三月出發的套票減幅可望達六、七百元！」
事實上，自去年十月日圓開始「下探」，不少遊客已經搶閘赴日，東瀛遊執行董事禤國全透露，聖誕新年檔期收到的日本客較去年同期狂升三成，升幅跑贏其他目的地。禤指香港人早已「餓」得太耐，隨着核災和匯價的影響遠去，禤預計︰「只要釣魚台唔打仗，日本團全年都會大賣！」

日匯插水，旅行社相應調低團費，近日於旅行社查詢日本團資料的市民明顯增多，旺丁又旺財。

三、四月日本櫻花盛開；業界預期匯價下跌加上核災陰霾遠去，農曆年後將會更多人赴日旅遊。

網購乜都平

Scott喜歡經代購網買書、 CD和 figure公仔，日圓下跌後更是手鬆，「一千蚊港紙可以買多兩樣，就會買多咗！」

日本動漫迷 Scott是標準宅男，喜歡在「樂天」日本代購網買書、 CD和 figure公仔，平均一個月兩次。這天，他帶着近日網購得到的戰利品，接受記者訪問。「依家日圓跌咗，好似八折買嘢咁，以前買 CD都係買普通版，依家可以買特別版。」買到平貨，宅男笑得特別開懷。
他拿起一本「恨買」多時的遊戲攻略書向記者解釋︰「日圓下跌前要二百二十港元，而家一百七十元！」結果他大破慳囊。「日圓跌，我哋班有共同興趣嘅朋友都好興奮，我哋買書呢啲運費都計日圓，一千蚊港紙可以買多兩樣，就會買多咗！」
查實，除了宅男外，不少港人都喜歡網購日本潮物，代購網站 Blue Poison負責人鄭綺嘉統計，近三個月收到的訂單已暴升三成半；日牌手袋波鞋、明星相及超合金等「潮物」更加備受熱捧，每天都收到十多單代購查詢，「呢排明顯多咗生客落單；你諗吓，匯率由 11、 12算到今日跌穿 9算，買對波鞋少少哋都平咗二、三百，點會唔吸引？」

鄭舉例指，價值￥ 60,000的名牌手袋，幾個月前折合港紙索價$6,100，今個月$5,200就有交易，「單睇匯價已經平一截！」當中，又以二手手袋柯打最多，「日本新款轉得快、中古市場貨量又多，比香港二手店更多選擇。」她分析，港人對日本潮物一直有需求，高匯價下大家已忍手多時，現在久旱逢甘露，自然全民樂破慳囊。
訪問當日，正值網購店「返貨」日子，店面擺滿大箱小箱的速遞日貨。「每星期要返貨兩次，每次都有成萬幾蚊貨；折算紙水差價，一個月足足平成七、八萬！」雖然差價並非由她賺晒，但網購生意靠抽佣賺錢，港人入貨意慾大增，生意自然水漲船高。
鄭更提供掃貨貼士，未來幾個月日貨將「愈劈愈有」：「日本網站習慣大時大節減價促銷，嚟緊情人節、櫻花祭前後例牌會做折扣，加上日匯一瀉不止，打埋算盤有望平足三成！」
另外，日本最大食品網站、在本港有逾萬會員的 Oisix亦受惠於日圓貶值。 Oisix主要售賣日本有機蔬果，客人只要在網上訂貨，蔬果便會於一星期後從日本空運到府上。
Oisix的海外事業部長高橋大就接受本刊長途電話訪問時表示，日圓持續下跌，全線蔬果零售價變相九折，香港的生意額大增兩成，「我哋總部喺日本，所有交易都以日圓做單位，無論匯率點跌，我哋都係收番咁多円，反而香港客戶買嘢時個匯價平咗，匯率變相幫我哋調節咗個九折優惠出嚟。」

全民瘋搶日貨下，網購店每週返貨近廿箱，採訪之時，剛巧有多箱貨品空運抵港，準備分發給客人。

網購店負責人鄭綺嘉指日圓走弱，購買水貨變相九折，連帶近月鋪頭的生意額亦暴升三成。

年底跌至七算

自金融海嘯後，日圓一直處於高位， 2011年年底高峰時每一百日圓兌十港元，高見十算，不過，近月日圓掉頭回落，本週一兌八點七港元。恒生投資服務首席分析員溫灼培直言，日本國內經濟疲弱，年底更有機會跌至七算：「日圓會持續跌勢，年底跌到 95日圓兌一美元都唔出奇， 100都有機會（相等於兌港元七算）！」
他解釋，日本福利負擔重，人口出現結構性問題，加上日本三一一地震後經濟一潭死水，最近與最大出口國中國關係緊張，貿易見赤字，新上任的日本首相安倍晉三力推弱日圓政策救經濟，多次推出量寬措施，上週更推出 10.3萬億日圓刺激經濟計劃，包括基建項目及鼓勵企業投資等。不過，溫灼培認為，日本的基建相當成熟，計劃未必奏效，日本央行屆時唯有繼續量寬，令日圓持續受壓。
中大酒店及旅遊管理學院會計與財務高級講師李兆波則指日圓跌勢持續，香港入口的日貨便會減價，對消費者而言是好消息，當中以中低檔汽車及電器產品價格減幅最大，新年過後遊日的旅遊產品將會減價，喜歡遊日的粉絲亦可以趁低位大手買入日圓。

買海味=炒外匯

年近歲晚，日圓貶值，市民買海味過年亦特別爽手。

還有不足一個月便是農曆年，市民開始買海味、辦年貨，撞正日圓大跌，買得特別爽手。上週六，記者到訪多間海味店，不少師奶大手買入海參鮑魚。安記海味總經理潘權輝指，日圓急挫，來貨價相應較低，日本海味亦調低售價，其中尤以海參和鮑魚減得最多，海參由去年高峰時期每斤九千五百元，減價逾兩成至七千三百元；廿五頭吉品鮑去年一斤售二萬元，現在已減至一萬六千五百元，亦即八折埋單。
「日圓匯率而家低處未算低，相信嚟緊仲有減價空間。就算日本冬菇、元貝呢啲需求比較大，來貨價不斷加，但係匯率跌，足以抵銷番，零售價都唔會加。」他又表示，已有行家吼準近日日圓貶值，為賺匯率差價，延長結貨埋數日期，「可能等三、四個月先儲埋一次過埋數，搏佢繼續跌，基本上同炒外匯冇分別！」

蔬果零食減 5-8%

莊偉忠指出，蔬果及日本零食最受日圓貶值影響，預期新年過後會有百分之五至八的減幅。

一田百貨常務董事莊偉忠亦指，日圓跌得合時，每逢新年大賣的水果禮盒價格已經下調，原箱廿八個裝的青森蘋果，去年新年售八百五十八元，今年賣七百九十八元。他估計，待新年旺季去貨後，二月下旬會明顯減價，主要是蔬果及日本零食，幅度為百分之五至八。