朱麗倩廿幾年來一直做劉華背後女人，但自從被踢爆瞞婚，大話天王形象插水，幸好「世紀拖手」補鑊挽回形象。夫妻關係曝光後，劉華早前亦不避忌講太太有喜，更肯陪朱麗倩往診所產檢。《蘋果日報》圖片

自從本月初劉德華親口證實老婆朱麗倩懷胎4個多月後，外間一直揣測呢個金叵羅係仔定女。本刊收到可靠消息，上周劉華晨早8點陪老婆朱麗倩到中環產檢，偷步照4D結構性超聲波，為BB檢查五臟六腑，雖然有部分器官未睇得清楚，但醫生確定小劉華有慈姑椗。劉華一索得男當然高興，不過45歲的朱麗倩已屬高齡產婦，萬事都要小心不容有失。據知劉華近日聘請多一名保鑣及私家看護照顧老婆，又搵吳君如介紹的婦產科權威何永超醫生，幫老婆做產檢兼接生，穩陣到極。


一向對結婚生仔等話題都十分避忌的劉華，去年11月在網上自爆「吾家有喜」，本月初他再親口爆老婆朱麗倩有咗四個多月，一反常態。但當記者問到係龍仔定龍女時，劉華始終唔肯講。其實朱麗倩佗B已4個多月，係龍仔定龍女劉華已心中有數。據知他上周曾陪同朱麗倩做產檢，為避傳媒耳目，劉華事先做好準備。知情人士透露：「劉華嗰日陪老婆做產檢，安排喺晨早8點鐘，診所亦專登為佢開早啲，佢仲一早同醫生要求要清場，唔想到時朱麗倩尷尬。劉華對太太照顧周到，佢一路扶住老婆入診所，坐低冇耐就親自去水機調校一杯暖水俾朱麗倩飲，又不時摸吓朱麗倩個頭，warm到不得了，劉華呢個樣係你哋平時見唔到㗎！」

提早照4D
劉華對朱麗倩百般呵護，因為腹中塊肉得來不易。知情人士續說：「劉華同朱麗倩努力咗幾年，之前試過幾次人工受孕失敗，今次終於成功，佢哋都好感恩。朱麗倩係高齡產婦，所以佢一定要抽羊胎水驗唐氏（唐氏綜合症），當時佢佗緊3個月，醫生已經話BB應該係仔，仲話下次做4D結構性超聲波檢查會清楚知道。」一般孕婦要滿20周（約5個月）先可以做4D結構性超聲波，逐樣器官檢查清楚，不過劉華似乎好心急想知BB性別，所以上周產檢時請醫生幫朱麗倩提早照。知情者續說：「佢（朱麗倩）個肚都未夠20周，就要求醫生做4D結構性超聲波檢查。可能BB係大碼，器官較成熟，所以醫生先應承。檢查時劉華仲問醫生BB係咪仔？會唔會似佢有個鷹鼻？醫生只係答如無意外會係仔。」據知劉華知道朱麗倩佗慈姑椗，即場笑到卡卡聲，不過小劉華今次產檢就顯得不合作。「照到一半BB就側埋一邊，仲有部分器官未check到。醫生都已經㩒住朱麗倩個肚，不過BB爛瞓，唔俾醫生照埋其他器官，惟有下次再照。」劉華為生B用盡方法，近年經好友吳君如介紹，搵婦產科權威何永超醫生幫朱麗倩做產檢兼接生，何永超是行內數一數二的婦科聖手，人工受孕馳名兼有「不育救星」之稱，陳慧琳、吳君如、李嘉欣等都是其客仔。本周三（11日）本刊記者在何永超位於中環醫務所等候，問到何醫生是否幫朱麗倩接生？見慣傳媒的何醫生笑說：「呢啲嘢唔方便答！」說罷便返回診所。

保鑣看護廿四小時跟身
朱麗倩每次做產檢劉華都會盡量抽時間陪同，為安全起見，即使朱麗倩身邊已經有個貼身保鑣，又有身形高大的司機傍住，不過劉華早前再額外聘請多一名保鑣及兩名私家看護輪流照顧老婆，認真誇張。朱麗倩唔只有老公錫住，就連老爺奶奶都好照顧呢位家嫂，知情人士說：「劉華媽咪日日叫人煲花膠湯、牛湯俾朱麗倩飲，買親都係極品花膠。除咗林青霞之外都冇乜幾多個45歲仲生，唔補唔得。其實除咗劉媽媽忙之外，日日飲早茶嘅劉爸爸最近都飲少咗茶，因為佢成日都去睇BB嘢，買咗好多衫仔同玩具。雖然BB有排都未識玩，但係劉爸爸買得好過癮。」

曾計劃返大馬安胎
就快有孫仔抱，劉爸劉媽當然開心興奮，但據知劉華原本計劃陪朱麗倩返大馬安胎，直到BB出世後再作打算，不過劉華見父母熱切期待個孫仔出世，最後都改變主意，決定留港生B，老人家就可以睇住個孫出世，加上又可免卻腹大便便的朱麗倩要操勞搭飛機。即將榮升爸爸的劉華非常緊張朱麗倩，自奪得金馬影帝後片約不絕，十多個劇本送上門，但他為專心陪老婆分娩已推掉所有片約，至少賺少1億元，加上唱片及巡迴演唱會等統統叫停，估計明年6月才會復工。早前劉華到杭州拍電影《富春山居圖》，每日與朱麗倩傾一小時電話，最近他會為杜琪峰的《盲探》埋尾，明年3月為《桃姐》進行宣傳，完成這三項工作後便會全面停工。

聖手避談朱麗倩
據知45歲的朱麗倩今次人工受孕成功，全靠婦科權威何永超醫生。本周三（11日）記者問何醫生是否為朱麗倩產檢，他笑而不答。


何永超醫務所位於中環太子大廈14、15樓，14樓為實驗室及化驗所，15樓打通兩個單位作診所用途。除了何醫生外，兩名徒弟謝靜兒醫生及藍寶梅醫生都在醫務所坐鎮。

拜神求子
為求早日得子，朱麗倩去年現身筲箕灣東大街的祥德寺，不時與法師傾談，其間又雙手合十，念念有詞。


有傳劉華在加多利山買多間屋給朱麗倩安胎，既可避開傳媒追訪，又方便一家人相聚，因為「新屋」與舊居只相隔兩條街。

不育聖手年賺過億
「不育聖手」何永超是不少名人明星的御用醫生，他主理的「勝利輔助生育所有限公司」，以「超級排卵針」及人工受孕手術聞名。經他「指導」的明星包括黎姿、陳慧琳、吳君如及李嘉欣等，均屬高齡產婦。其位於中環太子大廈的輔助生育所長駐胚胎學家，挑選優質胚胎進行移植，是孕育試管嬰兒的大本營。據知何永超已不再收新症，體外授精的試管嬰兒收費十萬元起，「星級客人」如陳慧琳等，全套胚胎植入子官的試管嬰兒收費，包括血液及孕婦檢查、排卵針、取卵、植入、冷凍胚胎等，連接生一條龍，收費更達100萬元。何永超近年以拆賬形式向公立醫院的生育醫生挖角，應付每年逾千求診人龍，估計每年收入高達一億元。近年他與其高徒藍寶梅(產科專科醫生)拍住上，藍寶梅入職前是中大輔助生育技術中心副教授，又坐擁婦產科學院頒授的生殖學分科認可證書及醫學博士名銜，在中大一早擔任臨牀教學工作。藍寶梅寧願拆賬給「師傅」，累積名人客源開新路。

為生B美國完婚
劉德華被揭與朱麗倩08年在美國秘密註冊結婚，事件引起軒然大波，劉華被封大話天王，形象大受考驗。其後華仔在官網上澄清，解釋因想要生B，而要合法做人工受孕，才選擇在美國註冊，並無刻意隱婚。劉華為生B出盡法寶，四處訪尋中西名醫，經林建岳介紹下曾前往法國接受人工受孕，年前再由吳君如介紹搵生仔聖手何永超幫手，向來篤信佛學的朱麗倩更拜神求子。

小女孩之謎
多年來盛傳劉德華與朱麗倩早已育有兒女，傳媒不止一次拍到一名女孩跟着朱麗倩外出，本刊亦曾拍下朱麗倩到銅鑼灣為小女孩買芭蕾舞鞋。自劉華被揭與朱麗倩瞞婚後，有指小女孩被送去大馬生活，雖然小女孩的樣貌與朱麗倩如同餅印，但她的身份永遠也是一個謎。 ####


劉德華去年11月憑電影《桃姐》奪得金馬影帝，返港被傳媒追問太太是否有喜，其後他隨即在官方網頁宣布太太朱麗倩有喜，來一個雙喜臨門。《蘋果日報》圖片


為小劉華改名自從劉華親口宣布太太有喜後，網友們都好雀躍，紛紛在微博為劉華BB改名，最多人贊成的竟然是「劉得住」。


劉德華最近因為朱麗倩有喜而多留香港。去年12月他現身紅館睇黎明個唱，黎明更在台上恭喜劉華好事連連，引來全場歡呼尖叫聲。


對於新抱有喜，劉爸劉媽不敢多講，早前兩人飲完早茶後，對記者提問笑而不答。


劉華與葉德嫻情同兩母子，兩人私底下無所不談，難怪傳媒不斷追問葉德嫻可知契新抱懷的是契孫仔還是契孫女，口密的Deanie姐笑道：「家事唔講得，我冇問佢，費事知道後口疏。」《蘋果日報》圖片






劉華現居


何永超主理的「勝利輔助生育所有限公司」收費雖不菲，但求診者仍不絕。近年他與高徒藍寶梅（左三）拍住上，有錢齊齊搵。


08年1月華仔舉行個唱，朱麗倩秘密現身紅館撐場，當時兩人已計劃年中去美國註冊結婚。朱麗倩亦keep住睇中醫調理身體準備生B。《壹週刊》圖片


09年被踢爆秘婚後，劉華受到全城圍攻，未幾他秘密赴大馬拜祭岳父朱建城，與朱麗倩十指緊扣回港任影，以行動給朱麗倩名份。


不久，劉華從北京返港時被記者追訪，他當場合十公開道歉。


早年朱麗倩與劉華兩名女助手及一名小女孩現身銅鑼灣，耐人尋味的是朱麗倩刻意與小女孩保持距離。

arrow
arrow
    全站熱搜

    stacylife 發表在 痞客邦 留言(0) 人氣()

    E-mail轉寄