四十五歲的梁震宇，用了十三年時間，由廣告銷售員搖身一變成今時今日飲食界享譽盛名的大老闆，旗下生意涉足廣告（頒獎機構、現金券優惠會）、食肆、娛樂（舞台劇、棟篤笑、電影、音樂創作）、地產代理，被喻為「飲食天王」的梁震宇，不僅是飲食界的響噹噹人物，更是四歲女兒梁泳霖的「英雄爸爸」。

他，口才了得，談政說家抑揚頓挫令人投入萬分；論及育兒心得，一句「女係要嚟縱，仔係要嚟教」，已足夠令人領會他愛女之心，梁震宇聳聳肩笑說：「個女有個叻嘅老竇，前半生唔使憂；下半生嫁個叻嘅老公，又搞得掂！所以，我依家已經幫個女做定媒人，相睇過幾次，有幾個朋友都爭住搵佢做新抱仔o架！」

為了給女兒一個留念，梁震宇接受本刊訪問前，竟特地預先到影樓拍攝家庭照，以供刊登。

優良遺傳

梁震宇乃飲食界的大紅人，曾接受多份商界報刊訪問，而為了首個親子訪問，他更預先與一家人到影樓拍攝家庭照，以供刊登，他說：「因為我好想第時個女大咗，可以睇番呢篇訪問，係一個好好嘅留念，一個親子訪問好過我出面做咁多個商界訪問。」

說梁震宇是廿四孝爸爸，絕對不容置疑，縱使旗下生意忙碌，他仍堅持星期六、日陪伴家人，「星期六日一定係家庭日，成家人出去玩。好似早排我哋一家人去迪士尼慶祝我嘅生日，我同個女玩射怪獸遊戲，個女見到就好興奮咁o氹我：『爹哋，你好英雄呀！』佢講嘢真係好叻好sweet！」

梁震宇形容女兒泳霖性格古靈精怪，甚懂逗人開心。

四歲的梁泳霖遺傳了爸爸梁震宇的伶俐口才及創意，而且樣貌標致，性格古靈精怪，梁震宇憶述：「囡囡成日都語出驚人，好醒目，將來分分鐘青出於藍添o架！我記得有次佢知道我出咗去應酬，就喺電話度鬧我又去飲酒，佢話：『飲飲飲，唔好飲咁多喇，飲完又嘔，講你又唔聽，冇耳仔嘅！』真係好好笑！咁可能係有少少媽咪嘅教育啦，再加上佢自己自由發揮啦；其實因為佢真係喺屋企見過一次，我飲完酒返嚟嘔，所以佢好唔鍾意我飲酒。」

梁震宇跟太太郭玉華拍拖多年，四年前發現懷孕後才結婚，太太主力在家照顧女兒起居、學業，他則在外奮鬥事業，力求給予最優質的生活給家人，「雖然我同老婆都冇催谷個女讀名校，只求佢健康快樂，但都希望佢第時至少可以讀完大學，有基本嘅謀生能力，爹哋媽咪就唔使佢照顧o架喇。」