搵工就好似上擂台，唔識裝備好自己，都幾難脫穎而出。場地提供： Swish Club

CLOSE-UP

求職過招

2013年01月17日 ~~ 第1193期香港《壹周刊》

收完雙糧，打工仔開始靜極思動搵新工。除咗睇報紙同求職網站，其實仲有唔少門路搵工，甚至借助社交網站「被獵頭」。
掉番轉頭，僱主唔想請錯人嘥時間，又要學番一招半式，篩走唔合資格人選或拆穿求職者真面目。勞資雙方新一輪攻防戰，正式展開……

求職重點

網絡資訊爆棚，唔單只可用手機 apps搵工，仲要執靚自己嘅社交網站，將完整 portfolio放晒上網，提升被 headhunt機會。

第 1招
快速分類
上求職網或用 apps搵工，比起揭報紙揭書快，而且仲可以設定相關職位提示，一有空缺即刻知，快人一步寄 resume。

第 2招　簡化 CV
寫 CV（ curriculum vitae）可以改寫網上「罐頭文」（例如 http://www.ctgoodjobs.hk或 http://www.cvtips.com），不過一定要簡單精確，重點寫出履歷、才能、經驗，一至兩頁內容已經足夠。 Recruit招聘媒體總經理黎穎婷提醒，應盡量避免「刺激」僱主眼睛嘅 CV，例如字體時大時細、格式歪歪斜斜、邊位冇對齊等都要避免，字體大細用 11pt至 12pt就最好。

第 3招　粉飾賬戶
部分僱主 in完人之後，有機會 check求職者嘅 Facebook或 LinkedIn等社交網站內容，睇吓性格同經驗係咪適合，所以見工前最好執一執賬戶內容，甚至可以另開一個「見工」賬戶只出正面內容，「真實」賬戶盡量用同自己個名或 email無關嘅字眼，減少被搜出嘅機會。

第 4招　等機會上
即使未有轉工打算，其實亦可以開始建立 LinkedIn賬戶，打造一份完整嘅網上 portfolio，因為歐美唔少大公司及獵頭公司，都會通過 LinkedIn搜尋中高層人才，如果經驗豐富，隨時有機會被跨國企業睇中，更上一層樓。

搵工實錄

Heidi外資投資銀行行政助理

「之前睇報紙搵工，見工先知職位內容完全唔同，寧願用 apps或 agents搵，唔會再睇報紙。好多朋友話 LinkedIn係等挖角跳槽嘅最佳平台，所以大學畢業前已經開咗，將個人資料、工作經驗同埋技能 keep住 update，整靚賬戶等機會。不過， LinkedIn通常係搵中高層職位，所以暫時都冇反應，要有耐性。」

Kami辦工室接待員

「最怕拎住份報紙搵工，花多眼亂好難搵到合水心職位；而家改用『 Recruit』同埋『 GoHour』 apps，一輸入職位，即刻分類列出，而且又可以即時 send CV，快手 send多俾幾個僱主，見工機會亦會多咗。」

Crystal物流公司會計文員

「見工前一定會上網睇定間公司嘅背景，唔怕面試被問到口啞啞。另外，見工一定唔可以遲到，會預鬆半個鐘，同埋靠 Google Maps帶路。」

奇招搵工

睇求職網搵工係人都識，世界各地大把食腦人士，運用科技幫手搵工，玩法多籮籮，不過應徵不同工種最好配合不同玩法，先至可以一擊即中。

QR code播片

法國人 Victor Petit張履歷表得自己張大頭相，但係就有個 QR code遮住把口，用手機嘟一嘟，就會播段自我介紹短片，生動過平時白紙黑字履歷表，有創意！
見咩工最啱？
無論見圖像設計抑或多媒體製作職位，呢份 resume已經係最好嘅 portfolio。

廣告放 twitter

英國大學生 Adam Pacitti畢業後寄出二百幾封求職信，全部石沉大海，於是月初花 500英鎊（約 HK$6300）租大型戶外廣告板，公開呼籲僱主聘用，再喺 twitter上載該廣告板照片，惹來七千幾人轉載，多間公司即刻打電話叫佢見工。
見咩工最啱？
咁識得用社交網絡推銷自己，搵 marketing同埋廣告工作，應該用到呢招。

私家電郵

六十歲嘅 Randy Adams多次喺矽谷求職，都輸俾後生仔，於是決心扮後生，剃去白髮、改穿 T恤、接受收緊眼皮手術，終於成功搵到工。不過 Randy話外表只係部分成功原因，仲要用 smartphone，同埋開設個人網域嘅電郵， show off自己識玩科技，先可以過關。
見咩工最啱？
同 IT相關嘅工作先至有用，其他工唔會理求職者用乜電郵網域。

搵工新花招

有 apps同網站幫手，家陣搵工唔使再盲摸摸四圍騰。

搵工似拍拖，人海茫茫搵另一半，唔係冇辦法，最緊要識用手機免費 apps同社交網站，無論初次就業、白領定管理層，亦能輕鬆搵工。

官方搵工

目標：政府工
政府工向來係搶手貨，與其日日上「官網」，不如裝個「政府工」 Android app（ iOS版名為「金飯碗」）代𥄫。將公務員事務局嘅請人資訊精簡化，睇得舒服，更可將申請截止日期加入日程表，提醒自己。
支援機種： iOS、 Android

公司追蹤

目標：指定大公司空缺
想入大公司，除咗留意公司網頁有冇請人，用「招職」 app一樣可以𥄫實，定期更新唔同公司嘅招聘清單，想入邊間公司做，一開就知有冇空缺適合自己。
支援機種： iOS、 Android

新人筍位

目標：初級職位
上求職網，眼見份份工都話要有經驗，應屆畢業生睇到氣餒。 Facebook嘅「勁多筍工招聘畢業生搵工必入」專頁，已為大家喺唔同求職網站搵出好多毋須經驗嘅職位空缺，例如見習營業員、市場推廣等等，慳番好多時間。
關鍵字：招聘畢業生

白領筍盤

目標：會計、金融、地產、保險
搵工心情忐忑，最驚有好工都睇漏眼，而 Career Times可以喺 app入面設定想搵工種，只要一有同類新工，就會即時電郵報料，毋須捱更抵夜。
支援機種： iOS、 Android

睇招聘日

目標：出席招聘日
毋須經驗職位，僱員流失率通常偏高，每次逐個請，認真費時失事，所以老闆們除咗搵招聘網站幫手，有時更自搞招聘日，「 Recruitment Day」 app就專門提供大型招聘日資料。
支援機種： iOS

定位搵工

目標：零售、運輸、飲食、地產
GoHour利用手機 GPS定位功能，顯示附近職位空缺，最啱想搵屋企附近有冇零售同飲食業職位空缺嘅人。支援實時狀態更新，如果請咗人空缺會即時喺 app消失，唔使驚白行
一趟。
支援機種： iOS、 Android

網上自薦

目標：高級行政人員、管理層
被稱為商界 Facebook嘅社交網站 LinkedIn，上年全球會員數目高達二億，香港亦有近五十萬。 LinkedIn定位為專業人士網絡，吸引到唔少獵頭公司挖角。想提升曝光率，可以參考以下幾招：擁有五十個或以上朋友、加多幾張返工相、追蹤目標公司頁面、加入相同興趣社群，都有助增強業內網絡。
網址： http://www.linkedin.com

面試新法

為咗請到合適員工，大小公司各出奇謀，喺面試加入唔同測試，難度愈來愈高。

性格測試

見工時要填寫 MBTI（ Myers-Briggs Type Indicator）、 MMPI（ Minnesota Multiphasic Personality Inventory）問卷，從答案顯示求職者品格，有服務業藉此測試求徵者有冇禮貌同耐性，亦有零售店用嚟測試誠實同廉潔品格。

商業遊戲

將求職者分成兩組，扮演兩間公司，例如一邊係 Microsoft，一邊係 Apple，然後分析兩間公司嘅優劣，以及採購邊間公司產品較有利業務發展，考驗求職者嘅應對及團隊組織能力。

IQ題

○一年，前 Google人力資源部高層 Gayle Laakmann就曾出書，分析各大 IT公司面試嘅過程及騎呢問題。

「一個男人將架車泊喺酒店，然後就無晒啲錢，究竟發生乜事？」大公司鍾意考 IQ題，求職者唔一定答到真正答案，只要答得有邏輯同創意，一樣過關。網站 http://Glassdoor.com有大量網友提供嘅面試 IQ題，值得參考。

僱主醒招

專家話只要學識兩三招短打，僱主同樣可以防範請錯人。
場地提供：香港精武體育會

求職者奇招百出，僱主好似幾難招架，向 JobsDB香港銷售及市務部總經理饒志文、中原人力資源顧問董事總經理周綺萍請教，原來只需兩、三吓手勢，就可以篩走一批「混吉」人士。

罐頭求職信

招數
因為搵工網、搵工 apps有自動提示功能，搞到一有空缺，僱主就會收到過千封求職信，部分仲要照抄 apps或網站提供嘅樣辦信，毫無誠意。
拆招
樣辦信太多，部分僱主只會睇履歷表，甚至出動關鍵字過濾軟件，由系統搵出合資格求職者。雖然求職者可以喺信入面用「隱形字」（將文字顏色轉成與底色相同，多為白色）輸入大量 keywords瞞過系統，增加被選中機會，但僱主可以再按長度篩選，如果履歷表多過兩頁紙，一來可能隱藏大量 keywords，二來亦顯示求職者唔識整理工作經驗重點，一律叮走。

完美社交賬戶

若被未來僱主發現求職者經常去成人群組留言，印象分勢必大減。

招數
針對僱主可能查看應徵者嘅 Facebook賬戶，求職者先隱藏常用賬戶，再開設完美賬戶掩人耳目。
拆招
僱主基本上好難搵出影子賬戶，不過，睇求職者 Facebook主要係想參考吓求職者日常生活，例如有冇晚晚夜蒲，處事啱唔啱嘴形，如果冇以上過失，基本上毋須開新 account，而且 Facebook內容過分完美，反易惹人懷疑。但如發現有鬧上司同爆公司內幕嘅 posts，就一定唔錄用。

亂 add扮內行

招數
不停 add行內人做網友，扮作人脈廣呃面試。
拆招
社交網站特色係唔相識嘅人都可以變成朋友，甚至可以冒充其他人，所以想確認對方身份，可以由 contact list上嘅朋友着手，睇吓求職者 post文後，其他行內人有冇回應過佢，分辨係咪真朋友。

宅男對應法

各大討論區內，經常有求職者透露僱主嘅刁鑽面試問題，仲有網民提供埋標準答案。

招數
應徵者喺網上群組得知僱主面試形式、問題後，背熟標準答案，但實際上只係對問題一知半解。
拆招
近年唔少公司喺面試時都會加入同工作無關嘅 IQ題（例如 Google會問求職者用幾多格廁紙先可以鋪滿會議室），測試求職者嘅轉數同態度，就算背答案背得幾叻都冇用。

只要在 Facebook以「 NEXT 3.0」為關鍵詞搜尋，或以手機的「 QR code」 app掃描，就可以睇到更多新聞同產品情報。