娛樂八掛大放送★

是我小時候：連詩雅鬼馬睡公主 10,995 


■連詩雅自小愛扮鬼扮馬擺甫士，做父母的模特兒。

人不可以貌相，今天在別人眼中愛蒲愛玩的連詩雅，原來她是很黐家的乖乖女，她坦言很享受做宅女，即使工作再忙也會爭取時間陪父母聚天倫。她又自爆五歲時已愛扮鬼扮馬，尤其喜歡扮公主，連衣着和舉止都和公主有關。
撰文：馬建華

連詩雅是家中獨女、父母眼中的寶貝，父母更啟發她長大後成為模特兒的潛能，皆因她自細便鍾意在父母面前扮鬼扮馬，擺出不同甫士，表演唱歌跳舞，每當父母雀躍地拿起相機拍照，她更加多兩錢肉緊去表演，她說：「好記得大約5歲時，有段時間好鍾意扮公主，衣着舉止都同公主有關。」

■屋企樓下的花園是連詩雅的專用園林實景，每個角落都留過倩影。 

■長大後，連詩雅笑言父母反過來期待她陪伴家庭樂。 

■父母平日工作太忙，連詩雅每星期最期待來臨的日子便是周六日，可跟父母出街玩。 最愛媽咪陪瞓

在父母的疼愛中成長，可惜父母均是工作繁忙的生意人，連詩雅說：「細個成日黐實媽咪，因為佢哋好忙，平日放工返嚟我都瞓咗。」愛在家的她連學校旅行，也要求媽咪代寫請假信，好讓她留在家，她自爆要媽咪陪孖鋪至10歲才能獨睡，她說：「7歲嗰年，媽咪想我返房瞓，佢親手用布同棉花做咗個同佢一樣大嘅公仔，仲用冷線整眼耳口鼻，媽咪話若果佢未返就攬住公仔當佢，不出幾晚我就唔要公仔，走番去媽咪房瞓。」

■連詩雅於10歲前，每晚都要黐實媽咪才能安心入睡。 

■每逢聖誕新年，連詩雅都悉心打扮跟媽咪去晚宴食飯抽獎。 

■連詩雅剛在港台及新城頒獎禮捧獎，事業漸見成績。

踏入中學後，連詩雅愛上校園生活，戒掉跟媽咪孖鋪睡的習慣，但至今她仍堅持抽空陪伴父母聚天倫，她笑說：「細個時係我黐住媽咪，𠵱家佢哋好似小朋友咁，成日都想我陪佢哋，我會努力搵錢照顧好佢哋。」