三年幾無亮相無綫唱歌的陳奕迅、李克勤，農曆新年後將會回歸，無綫亦會大事改革音樂節目。
探熱針
講掂數 四大版稅加幅削半 李克勤 陳奕迅再唱 TVB
無綫糾纏超過三年的四大唱片版稅問題，上週終於成功簽訂新合約，四大正式解封，旗下歌手李克勤、陳奕迅、陳慧琳、方大同等將於農曆年後回歸 TVB再唱。
據了解，雙方於事件上都作出讓步，版稅加幅稍減一半。和解成功，全因無綫揸弗人殼王陳國強親自出手！
執手尾
殼王開聲，李寶安（左）對四大不再企硬，版稅問題才得以解決。
過去幾年，無綫音樂節目星光暗淡，早前舉行的《勁歌頒獎禮》有獎無人攞，賽果被網民笑爆！
「殼王（陳國強）上場後，一直都想快啲執番好同四大不和嘅手尾，眼見綜藝節目無大牌歌手撐場，收視不斷跌，音樂節目完全癱瘓；雖然話依家樂壇係一池死水，但殼王覺得作為電子傳媒，有責任推動音樂，佢希望做得番以前《勁歌》全盛期嘅氣勢，但無咗四大唱片歌手，根本無可能成事！」一名無綫人說。
阻頭阻勢
三個月前，殼王再度下旨，要求無綫集團總經理李寶安，全速解決四大唱片版稅問題。
「其實年前陳志雲返 TVB嗰陣，都有做嘢想搞掂番件事，本來都傾得好順利，只係李寶安主張企硬，唔肯讓步，對方搵唔到下台階，最終件事又卡住！
「今次因為殼王再出聲，李寶安知道再企硬嘅話，大老細一定會唔 alright，所以都即刻再同四大重新接觸；件事本來兩個月前已經可以解決，因為四大唱片作出好大讓步，增加嘅版稅減咗一半。」
殼王出手，李寶安雖然不敢逆旨，但亦非採取完全合作態度。
「咁耐以來，同四大最唔妥嘅就係負責睇住公司盤數嘅李寶安，佢對殼王唔敢陽奉陰違，但本來兩個月前已經整好晒合約，點知佢又質疑點解議好簽訂嘅版稅唔係永久性，而係逐年計，大家又拉鋸咗一段時間。好老實，如果早啲搞掂，之前《勁歌頒獎禮》都唔使咁核突。」知情者說。
無受掣肘的港台，頒獎禮明顯比 TVB《勁歌》鼎盛得多。
雖然已是神級歌手，但學友一直支持搞「四台聯頒」。
專心搞聯頒
四大唱片雖然未正式向外公布解封消息，但無綫已暗地放寬規矩。上月尾播放的《新城頒獎禮》，以及本週日（一月二十日）直播《港台十大金曲頒獎禮》，未有將四大歌手全部剪走。
四大版稅問題解決，無綫將全力投入今年搞《四台聯頒》。
「《四台聯頒》由無綫負責製作，解決四大問題，先可以再傾到歌手，不過因為其餘三個電台有好多贊助鎖住晒，即使搞得成《四台聯頒》，幾個電台仲會照搞自己電台頒獎禮！」知情者說。
李克勤帶病出席《十大金曲》頒獎禮，中西藥一齊食的他，不停標汗，十分辛苦。
「四大」歌手可以再上無綫，林峯要由太子道西搬返入沙頭角。
華納歌手方大同，稍後亦會再上 TVB唱歌。
自食其果
09年無綫與四大唱片爆發版稅風波，雙方一直互不讓步，四大歌手被封殺，但無綫亦自食其果，因欠缺大牌歌手上節目，令音樂節目質素急降，拖累收視。
封殺歌手
無綫與環球、華納、 EMI及 Sony四間唱片公司， 09年尾因版稅問題反枱。無綫鑑於每年支付三百萬的版稅，加價飆升十倍，於是封殺四大旗下歌手，無得上無綫節目外，在《勁歌頒獎禮》上全部食白果。 
倒戈反抗
遭無綫大封殺，一眾歌手 10年初開始紛紛起革命，張學友率先亮相亞視做專訪， Eason亦為亞視拍攝音樂特輯，接受有線訪問時照講廣東話。
BMA加入
11年頭， BMA加入由四大唱片成立的 HKRIA，形成五大唱片，雙方關係繼續僵持。 
一度軟化
11年尾，持續近兩年的版稅問題有望破冰，四大決定減收版稅，同時無綫亦解封四大歌手，無需歌手簽歌星約，可自由亮相其他電視台，無綫契仔李克勤率先現身《歡樂滿東華》，而 Kelly亦獲邀上《環遊世界明星賽》做嘉賓。 
再陷僵局
去年余詠珊上場頒布新令，要求歌手上無綫節目前簽一張「粉紅紙」，證明節目版權屬於無綫，但四大唱片為保障歌手利益，拒絕簽署，關係再僵化。 
留言列表
{{ article.title }}
