鹿兒島 A5和牛拉麵$380
全場最貴，和牛已經肥膩，湯底又油，愈吃愈膩。

試食王

最貴拉麵　得個貴字

2013年01月24日 ~~ 第1194期香港《壹周刊》

大部分人都虛榮，貴，很多時候，其實是賣點。例如，全城最貴拉麵你食過未？未就真係要試吓啦！
RaIronmen前身是米芝蓮一星拉麵店 MIST，地址和老闆無變，裝修算是變型了。不過，除了日本武士圖案大玻璃外，完全不像一間拉麵店。透過大玻璃窗，看到半開放式廚房內的駐場師傅並非日本人。聽聞大廚是西廚出身，可能創新拉麵比傳統日本拉麵更頂呱呱，唔扣分住。過來介紹拉麵款式和落單的女侍應，青春可愛笑容甜美誠懇有禮，呢一樣，其他餐廳真係要學啦！

最平拉麵都要$110，而且是 MIST舊款。嚟得，梗係叫全場最貴三款拉麵：鹿兒島 A5和牛$380、波士頓龍蝦$350和阿拉斯加長腳蟹拉麵$280。拉麵未上枱，侍應送上免費小吃，服務形式似 fine dining餐廳。但小食——拉麵脆片配枝豆醬，無味又勁多油。晚飯時間，唔使排隊，全場得三枱客。等拉麵時間，靜到烏蠅拍翼都聽到，聽唔到食拉麵的𠽌𠽌聲，我和友人都唔敢大聲傾偈，氣氛拘謹。

富士蘋果汁$48
配原枝肉桂及蜜糖分開上，香料味頗重。

靚女推介靜岡蜜瓜，清一清油膩都好。香甜多汁，一小片盛惠$80。

自家品牌啤酒 Weizen$55，一樣咁貴。

拉麵脆片配枝豆醬（免費）食完成手油，枝豆醬也不夠香。

十五分鐘後有拉麵食啦，鹿兒島 A5和牛湯底味道好清，越南隨便一間牛骨湯都濃過佢。最弊，湯面又成層油。阿拉斯加蟹的湯底，十足牛油粟米湯，吃不出海鮮鮮味。只有波士頓龍蝦的湯底是龍蝦湯味，很鮮甜，也比稠身濃湯清香。湯底驚喜欠奉，拉麵也沒有麵味，太過滑身唔勾汁，令人失望。為了製造出全港最貴拉麵，重點落在配料上。和牛軟腍、油脂豐盈；阿拉斯加蟹腳燒過，很香很好吃；波士頓龍蝦也彈牙鮮味。
總結，唔係難食。但三個人食拉麵埋單成千三蚊，標價高，給我期望當然大，所以失望更大。蛋撻加上金箔燕窩，都可以賣到全港最貴。你敢，即食麵用牛骨湯加幾片和牛，都可以賣三百幾蚊啦，但要好食先得㗎！

波士頓龍蝦拉麵$350
最好味，湯底和龍蝦都充滿鮮味。

阿拉斯加長腳蟹拉麵$280
配料好吃，如果收平啲，可以一試。

最有日本味道的武士圖案。

評分

食物：★★ 1/2
服務：★★★★
環境：★★★
價錢：★

RaIronmen
地址：銅鑼灣新會道 4號
電話： 2808 2728

試食王

喜歡外出用膳，也喜歡誠實，不相信飲食網站的所謂評分，也怕了所謂食家獲得優待後的意見，情願隱姓埋名，真金白銀，測試飲食雜誌飲食網頁捕捉不到的真實一面。

墨西哥海鮮星期六

墨西哥鮮蝦夾餅$33
新鮮彈牙，夾餅即叫即製，十分軟熟，不像雪藏貨死韌。

墨西哥餐廳 Mr. Taco Truck開業只有兩年，已獲墨西哥領事極力推薦。大廚 Eligio Escobedo來自墨西哥，堅持正宗地道口味。別以為墨西哥菜變化不多，餐廳最近推出新菜式，包括瑪雅豬卷餅、墨式鐵板雞和墨西哥粟米糕等。另外，餐廳更推出海鮮星期六。只要致電預訂，大廚便會親自到街市選購最新鮮海鮮，炮製加勒比海風情魚柳、鮮蝦夾餅和墨西哥海鮮飯等菜式。大廚心機加倍，但價錢繼續平民。

Mr. Taco Truck
地址：中環蘭桂坊和安里 14號 B鋪（鰂魚涌店亦有供應）
電話： 2810 0888

上網訂位食平餐

餐廳周期間，成功訂位的客人可以約半價享用心水餐廳套餐。

第 4屆「香港餐廳周」將於 2月 25日至 3月 3日舉行，今年有超過 70間高級餐廳參加，包括 AVA、 Madam Sixty Ate、 Blue Butcher及 La Marron等。參與餐廳除了設計特色套餐外，午餐由$98起，晚餐由$258起，比平時差不多平一半。網上預訂於 2月 6日下午 4時開始，美國運通卡會員更可於 1月 31日至 2月 4日期間享受優先預訂。過去 3屆，最受歡迎餐廳在開始網上訂座後數分鐘已經爆滿，今屆唔好執輸啦！

查詢及預訂網站： http://www.restaurantweek.hk