萬綺雯（蚊蚊）過檔無綫後，即擔正與王祖藍、郭晉安等合作拍攝《老表，你好嘢！》，祖藍自誇是促成蚊蚊與無綫合作的中間人，又大爆蚊蚊的角色造型，全是他度出來的一己私欲！首次合作的二人在今次訪問中互笠高帽及大談拍劇過程的蝦碌事，蚊蚊更笑指祖藍在思考時，與其丈夫陳十三幾乎一個樣！
萬：萬綺雯王：王祖藍
互笠高帽
王：我睇好蚊蚊會成為新一代女神，當時喺微博一講套新劇有蚊蚊做，即刻有近二百個網民回覆，加上佢keep得又好，同拍《我和殭屍有個約會》時差唔多樣。
萬：我覺得係自己大個咗、成熟咗，不過我老公（陳十三）叫我做低能仔o架。
王：識落你之後，真係判若兩人！原本我覺得你係氣質女神，特別有女人味，身形同輪廓都有一道「氣牆」，好Cool。
萬：氣牆係因為我要保護自己。我都覺得你好好，又聰明又勤力，仲好識照顧其他人，諗嘢全面，一見到你坐喺度眼仔睩睩，我就知你諗緊嘢，同我老公個樣一模一樣！
祖藍被萬綺雯取笑髮型高人一等。
萬綺雯覺得老公跟王祖藍諗嘢時簡直一模一樣。
陳十三
王：今次套劇拍得你好立體，一方面係女中豪傑，唔係真係鍾意嘅男人完全唔要，情願冇人要；另一方面，又好孝順、有愛心。我最滿意係為你度身訂造嗰套成幾千蚊嘅晚裝，真係靚到飛起，證明中女都可以好索！
萬：我唔介意你叫我中女，不過可唔可以唔好喺套劇度一直重複，可以用另一個形容詞！
王：我成日咁話你，啲觀眾先更加戥你唔抵，別有用心Ø架。
王祖藍 王祖藍以“中女”稱呼萬綺雯，逗得萬綺雯唔知好嬲定好笑。
天降緣分
王：今次你做呢個角色，做得好好、好自然，有姐姐feel。令人相信戲入面嗰個真係你，而且堅係tough。
萬：我忠於你原著嘛！
王：最初同監製黃偉聲、編劇度緊劇本時，都未諗掂搵邊個女仔，咁啱當時你行過，一見到你，嘩……（吞口水），果然嗒得杯落！
萬：係咪真o架？其實當時我上公司，諗住見吓面，約都未簽，跟住監製聲哥出嚟介紹你哋畀我識，又講開呢部劇。我對喜劇同呢個角色都好有興趣，你同安仔（郭晉安）又係TVB Icon，同你哋合作應該會好好玩，但真係冇諗過因為呢部劇，會促成我同TVB合作。
王：最初同你未熟時，都好有壓力，因為你老公系編劇。
萬：驚渠會執得緊？
王：係呀，不過後來先知唔會，因為佢明白編劇嘅苦況，同病相憐。（大笑）
萬：佢忙到幾乎冇時間見我，仲邊得閒執劇本呀！佢好尊重編劇，唔會comment人哋，不過會comment我演技！最初我對自己嘅角色冇咩信心，好迷茫，係我老公叫我做番自己。
王：第一日開工，你成日嚟問我同安仔，我心諗，你係女一（女主角）喎，有咩好驚？本身又有經驗，以為你扮驚咋！
萬：我真係緊張o架，好似第一日返學咁，好驚做錯嘢，但又好Enjoy呢種感覺。
王：以前喺亞視，有冇開咁多晚通頂？
萬：有開，不過冇呢度咁多，最多都系10零個鐘，呢度可以48個鐘喎！
王：值得嘅，拍呢套劇真係好感動，安仔話自己已經六年嚟，未試過通三晚頂，連羅蘭姐都要通兩晚頂！
萬：安仔話想藉呢個機會試嚇自己，如果咁都挨到，就以後咩都挨到。
王：可能因為多咗第一次拍劇嘅人，好似Bob（林盛斌）、王菀之、張繼聰咁，個個都好有衝勁，好有火。
跑田中暑
萬：我最初入行好捱得，一年拍五套劇，捱到個肝有事，我第三次做到入醫院，一醒番，見到阿媽伏喺床邊喊，我驚自己會有事，之後就盡量對自己好啲。呢個世界邊有人係唔辛苦？個個人都有自己兼顧嘅嘢。
王：記唔記得“跑田中暑”？
萬：梗係記得啦！當日我哋成班去山旮旯地方取景，氣溫成30-40度，要我喺個田度勁跑！（站起來扮跑）跑到個妝溶晒，勁漂汗又暈！
王：我早知你唔舒服啦，我跑跑吓一望，咦，乜唔見咗你嘅？擰轉頭就見到你跪低咗。
萬：我暈到淨系聽到你拎喇叭大叫：“水呀！遮呀！”
王：因為開頭拍得鬆，仲得閒到日日食Tea，最尾咪勁趕囉！不過你甩轆嘅印象幾深入民心，你可以拍到連自己架車，漏喺烏溪沙都唔知！嘩，遲啲會唔會漏咗個仔o架？
萬：哈哈，我有時係會多甩轆，不過做媽媽會好啲嘅。第二日拍外景扮學生妹打網球，係酷熱天氣警告！打到個妝溶晒都未打到，導演忍唔住叫我，淨係打中個波就得，咁我咪專心打個波，點知一打，就聽到導演「啊」一聲慘叫，原來個波直飛去導演心口！
王：真系好難打中，渠上下左右都有人有道具！
萬：佢咪以為我特登（掩嘴笑），你哋都逼我扮學生妹，都唔知係咪有私心o架！
王：其實我哋成班都有私心，哈哈！（一陣大笑）掟蛋糕嗰場都好正，堅掟蛋糕，事前完全冇排過，NG完之後，無理由又買過個新蛋糕，咪喺地下執番嗰pet蛋糕，補啲cream又掟過，真戲真做，好好玩！唯一冇事嘅，得修哥（胡楓）同羅蘭姐。
萬：修哥一開始就縮埋一邊，叫我哋慢慢玩，邊個夠膽整渠！
後記：拍攝當日，發現萬綺雯清減不少，未知是否工作辛苦關係，祖藍搶着打趣說：「我重佢7磅咋！」萬綺雯還擊取笑他髮型高，轉數極高的祖藍立即回以一句：「咁你高呀嘛，畀我個頭高吓都得啩！」萬綺雯亦回敬：「外表唔重要，才華先緊要！」祖藍戲言：「好似你老公咁？哈哈！」兩人唱雙簧逗得現場工作人員捧腹大笑。
服裝：桂冠
髮型：DOMANIC TAO @ O4
化妝：吳HERMAN。
形象指導：張衛健巴拉卡
髮型：特德·楊II頭髮和指甲
化妝：KT翠
留言列表
{{ article.title }}
