豪語錄
夢斷香銷二十年 FACE TO FACE
《豪語錄》訪問過前 Echo李蕙敏，絕口不提做了闊太的區海倫；訪問過前夢劇院做了闊太的李敏，絕口不提劉文娟。雙妹嘜隨着成長，通常互相厭棄。
但點計，夢劇院和 Echo總曾風光； Face To Face呢，真正共事才兩載，蔡惠玲卻說道：「 Jodi不出來，我也不出了。」像小女孩閒閒的賭氣話，死誓一踐二十年，推辭轉做獨立歌手機會。
一九九二， Face To Face成員 Jodi（吳少芳）遭遇車禍，全身癱瘓，除了還能吃，能唱，能哭，能笑； Connie（蔡惠玲）不離不棄至今。秋月春風，孖妹成了未婚中女，明明源於商業化的組合，為最不商業化理由，永不拆夥，永遠年輕下去。
一定有圖謀？有嘅，她們自資灌錄單曲 CD，但不打算發售，純粹分享紀念，何況適逢 HMV都唔知仲有冇架俾新碟上的急景殘年……友情，本來就不為了什麼。
故老相傳，究竟難在共富貴抑或共患難？共同度過已不容易。
陸游詩：「夢斷香銷四十年，沈園柳老不吹綿。」二人同心，加埋啱數。
愛上你 Milano，呷着 cappuccino
Jodi一向比我樂觀，估唔到現在都是。
多得 Face To Face成名作之中產華麗，令學生時代的我認識意大利唔止 pizza意粉。 Connie這天笑道：「我都係唱這首歌先知有呢種咖啡。」
倒坦白，八八年的兩個少女文員（未發明 OL字眼），扮什麼西人呢？
見見世面，正是她們屢敗屢戰的原因，各自參加港台英文歌比賽，結識了，發現彼此髮型和打扮都酷似，便組隊報名新秀。
Jodi憶述：「叮走我們的評判李進（後來黎明和鄭秀文 king-maker）事後卻聯絡我們——會唔會係鹹濕佬呢？好在我們拍住上，可以壯膽。後來睇報紙話李進籌備唱片公司，才知道不是騙財的。」
意外地， Jodi比 Connie更愛笑更多言，還打趣說，無動作的人表情特別豐富。
「李進教我們很多嘢，不准戴錶，明星上台都不戴錶，除非做代言人。」 Jodi的錶固定在輪椅左邊扶手上，因為，能夠稍微抬起的，只有右手。
我遞上名片， Connie第一時間扮不經意地代為接取。她留意任何細節不讓拍檔難堪，送來飲品，她第一時間摸出帶備的飲管……
Connie說：「 Jodi一向比我樂觀，估唔到現在都是。」
這天來幫忙的還有 Jodi胞妹，連當年助手也義務到場——我早風聞，但眼前還是有點不信。 Connie說：「 Jessica（助手）仍似大學生樣子嘛，心地好是不老傳說。」
一些從前一些，一些現在一些
九○年代的華麗其實世紀末，像城堡建築於沙丘上。 Face To Face的閃亮舞衣，靠自行穿珠仔釘珠片， Jodi說：「夜晚釘到攰，齊齊落裕民坊篤魚蛋。」
那時她住將軍澳康盛花園，意外，正發生返家途中。
究竟是收工還是經理人車回去取歌衫？「對不起，前前後後其實我很模糊。昏迷和藥物影響， KC（同公司歌手李國祥）幾個月後打電話到醫院，我問：『唔好意思，你有冇探過我？』他說：『吓，來過幾次嘞。』」
問 Connie反而印象深刻。「一世不忘記。那天早上，我在樓下等 Jodi和經理人車去電台，心諗衰妹又唔知醒，公司打來：『他們昨晚被泥頭車撞，經理人「走」了， Jodi在搶救中。』去到聯合醫院，兩家人哭作一團。」
Jodi沉澱得當笑話講：「辛苦㗎，原來成身剩番塊面有知覺，特別容易痕，又𢱑唔到。妹妹餵我食啫喱，我吐出來扮嘔血嚇護士；到右手郁得吓，係咁打醫生。」
我連忙將話題轉向 Connie， Jodi搶着說：「你問她，我才會哭呢。」
點解咁長情？「我們原先已認識嘛。」夢劇院原先同學添啦。
又 Face To Face了。
閒時以身作則做義工。
對，吳少芳值得惋惜，蔡惠玲亦然——夢同於那刻破碎。
換我是 Connie，部署大概如下：
•風雨不改當返工咁去探病，仲唔頻頻見報？
•老友完成不到的，由我來完成吧，最多仍以 Face To Face名義作獨立歌手，賺到一筆贊助醫藥費，仲唔感動全港？
•到 Jodi出院，亮亮相幫我造造勢，一世人兩姊妹……
合情合理，但 Connie的善良，比大眾所想更純淨，燕雀安知鴻鵠之志？
「那時仲細，一心只知 Jodi唔玩，咁我都唔玩囉。娛樂圈又複雜，少了 Jodi拍住上，我更不懂應對。
「每次去醫院都走後門，怕記者影到，我不想刊登勾起兩個家庭傷感。」
蔡惠玲說，甚至不明白那些《紙盒藏屍》、《雨夜屠夫》拍完又拍，聲稱警世寫實，便忍心重挑受害親屬之痛嗎？
「的確曾有 offer簽我單飛，我應該紅不來。而且由出事到情況穩定，足足十八個月，我想像不到期間我打鑼打鼓簽約， Jodi會點呢。塵埃落定，大眾好奇心也冷卻了吧。」 Connie淡淡說，此後她轉任原唱片公司的文職。
Why me，愛好友聚腳天地
Jodi說，最難捱是出院後生活適應，但她努力爭取獨居成功。「爸爸媽媽本來的退休生活，是每朝行山飲茶；我出事後，他們一係只行山，一係只飲茶，要趕回來預備我午餐。我一定要學習獨立，父母才可享受晚年。媽媽早幾年『走』了，好在我已搬到沙田，打理到自己，她應該『走』得安心。
「工人照顧得我好好，我有買保險又有交通意外賠償，比起因病全癱者已算幸運。日常嗜好是煮嘢食。」
可想而知， Jodi的「煮」是瀏覽網頁，口授食譜給工人或親友，分甘同味。
靠信仰支持嗎？
「我滿天神佛。以前老闆蘇孝良講佛偈，啱聽；住聯合醫院時，有個姑娘教祈禱，我至今每晚祈禱，但永遠未唸到『阿門』便瞓着——我所求的太多了。」
述往思來，吳少芳時而喃喃自語：「唔好喊唔好喊……」眶住眶住。掉淚的，反而是蔡惠玲——脆弱如斯，卻可抱起拍檔上落車。
多年來她每月探望 Jodi幾次。「不只我，當初參加英文歌比賽的十一人，像舊生會經常聚腳，我們叫自己『十大歌手』。」
成員，包括 DJ李志剛、亞視之寶陳啟泰——我認識陳啟泰，從未聽過他主動提及。「十大」宗旨是，吳少芳怕見報，大家便低調聚會，不會借朋友搏宣傳。
是，我偏見，唱英文歌的人通常較有品。
Jodi近年心境轉開朗，偶然客串小型音樂會，嘗試作曲與 Connie合唱，一首《 Why me》，歌名已訴盡千言萬語。
吳少芳人殘志不殘，克服障礙與家人同遊意大利。
二十年來，這是我第四次化妝。
Face To Face，再感到希冀
Jodi說：「二十年來，這是我第四次化妝。」有數得計，兩次小型音樂會、最近 TVB仁濟 show。若非為呼籲社會關注全癱病人權益，心如止水的 Jodi不想麻煩人家幫她扮靚。
Connie態度清晰：老友你唔玩，我唔玩；你靜極思動，我隨時奉陪——哪怕打亂自己平靜 OL生涯。
出事時，行內有種說法：「可惜了，癱的是靚啲嗰個。」久別電視畫面所見，大家卻驚嘆 Connie竟比二十年前還漂亮（有相為證）。 Jodi說：「我唱完我嗰 part，定定望着她，怎麼這女人可以咁騷？」
蔡惠玲害羞得像少女。
我更相信是心慈貌美。
只是，真不後悔嗎？憑這得天獨厚原或可叱咤樂壇……
「怎會呢？眼見朋友遭遇，我已經很幸運，無所求了。」
全癱病人權益有待爭取， Jodi說：「我可坐到地鐵；社企辦的傷殘的士也試過，揸刀搵食嘅——你估火炭去大圍幾多錢？二百四十蚊！百七蚊起錶，等候收費每十五分鐘百五。」
Connie更義憤：「唔明白大廈唔肯整無障礙設施，你去旅行拉喼都想多條斜路啦。」
我最近搬屋裝修，將浴缸扑散變企缸，因為考慮到家中老人有一天跨入跨出會困難——就不用讚我孝順，那行動不便的老人可能是我，二十年後。幫人，也在幫自己。
「怎麼這女人咁騷？」
如果金曲應如友情歷久常新，他們當得起「十大歌手」。
故事新編
緣份兩面睇，以下是虛擬劇情，淡出鳥來——現實通常比想像更傳奇。
場景一：一九九二年某個早晨， Connie仍在呆等 Jodi，一邊暗罵這拍檔愈來愈擺款，不如飛甩佢……
場景二：原來昨晚 Jodi與經理人同車，俾狗仔隊影到斷正（送返香閨怎無嘢寫），唱片公司正商討拆解補鑊……
場景三： Jodi形像受損， Face To Face解散， Connie如願作個人發展，成績稍遜於 Echo單飛的李惠敏而稍高於夢劇院單飛的劉文娟，不出幾年卒因買衫豪奢入不敷支，轉攻珠三角夜場跑數……
場景四： Jodi結婚離婚，不甘寂寞，趁懷舊潮與 Connie重修舊好（利益之下沒永遠敵人），舉辦復出奀 Show，卻銷情慘淡，乃向 TVB自薦𢱑撈谷票房，遭拒諸門外……
時光機回歸現實。吳少芳說：「所以每件事自有好的一面，它令我遇上很多好人。上 TVB仁濟 show，有獨立化妝間，寫着『 Face To Face專用』——正正常常任我哋唱一世，都唔會有，哈哈！」 
留言列表
{{ article.title }}
