Cover Story
Say Yes! 謝婷婷
據報載，安志杰終於決定結束和謝婷婷三年多的愛情長跑，正密謀部署在三、四月向女方求婚，婚期大約在秋季，婚禮最緊要浪漫……
真的嗎？
「真嘅先至唔會講出口。」
知安志杰者，固然莫若於早就同居屋簷下的婷婷，但男主角既然夠膽在傳媒面前，實牙實齒的公然開出期票，相信，應該，珍珠都無咁真！
「 Andy都未同我 propose！」
眉目帶笑嘴角含春的婷婷，鬼妹仔表情竟夾雜着女兒家嬌羞忸怩之姿，笑得連明眸也似彎月半閉了。
「 Andy話秋天舉行婚禮可以唔使出咁多汗。」
哦∼原來情到深處稠濃時，早已盟訂約誓，妾身非君不許，否則又怎能瞭如枕邊人的心意底蘊？
「係有傾過，不過唔算好 detail，總之唔喺香港搞，只會請幾個好 close朋友，但一定會請爹哋媽咪。」
待嫁姑娘，一字一句也幸福滿溢，連我這隻塘邊鶴也託福沾了一身蜜甜。
亦當然，霆鋒可鑑呀！
浪漫滿屋
黑底花圖案連身長裙$31,800
吊飾項鏈$7,790
Both from Gucci
對安志杰和謝婷婷這一對，一直印象深刻。
深刻的，並非兩位均來自演藝家庭：安志杰的母親是台灣著名歌星金燕；謝婷婷每次出現都要為謝家上下解答代言。印象是，只要這對愛得高調的情侶在鏡頭前出現，連體嬰永遠像糊了膠漿般十指緊扣互纏，目中無人一樣的看不見觀眾，時間頃刻凝頓，安志杰眼中就只有謝婷婷，即使嘴巴正回答記者的問題，雙目還是沒有一秒轉移離開過對方。愛得癡情，如像中咒，那種骨痺，真係隔住部電視機都會忍唔住起雞皮！
「係咩？無留意添！」
婷婷靨笑如花的回應，看得出笑從心底裡綻放出來。
「一齊咁耐，從來無特別難忘的情人節，因為情人節正日通常要開工， even從未收過 Andy在情人節送過的花和咭，我覺得日日都好似情人節一樣， unexplected的時間其實好多。」
寒冬聽情話，果然特別有 feel。
「 Andy真係好細心，佢好識得點去錫我，我喺佢心目中地位拍得住佢媽咪。可能同佢長大環境有關， Andy屋企有媽咪仲有兩個家姐，細細個已經好識得點樣照顧女人，只要我覺得舒服佢就 OK！」
原來某人骨子裡早就植入多情種子基因。
要有名分
「我成日都覺得屋企係最浪漫的地方， even無乜傢俬，四面牆空洞洞，得三隻貓一隻狗…… but I don't know，只要望住佢嘅眼神已經覺得好開心。就算今日大家唔使開工，去拍拖，拍拖節目只係好簡單，咁已經覺得好浪漫。又或者唔出街，我哋可以喺屋企攬住跳舞，大家望住對方，都已經好 sweet！」
橋段，就似浪漫愛情映畫戲。大抵是婷婷從小到大都愛看童話故事，相信每個人都有一位 The One。
「自從同 Andy一齊經歷有高有低，有開心唔開心，我明白到如果唔用心去保護一段關係，為對方付出， it never work！一定要响 give and take之間 balance。我有朋友生完仔但唔要結婚，我問佢點解，答案係因為要長時間對住一個人，無信心，寧願唔 commit一個 title。我雖然係鬼妹仔，這方面卻比較傳統，尤其是想有 BB的話，有 title會清晰啲！」
既然雙方對未來已有共識，何不圓大眾心願，蛇年早日拉埋天窗？
「其實……結婚……都有諗過今年，好多人鍾意揀陽光與海灘地方結婚， Andy話：『靚就靚，不過會好熱，會流好多汗；而且結婚唔可以 nake，要著禮服，又要影婚紗相，所以要好好去 plan。』 OK！我覺得訂完婚唔一定要即刻結，但係我唔急，可以過多一、兩年先，反正我仲有好多想法，事業上家庭上，都仲有好多考慮。」
原來女王唔憂嫁！
我心不死
啡紅色連身長裙$33,500 Gucci
所謂唔憂嫁，其實，並非唔恨唔想唔要，只是演藝方面仍想有新突破，這半年婷婷便為物色新經理人公司而煩惱消瘦。
「可能我實在太緊張工作，寧願慢慢揀到啱為止，條件係最緊要夾，可以同對方直接溝通，俾到自己俾唔到嘅嘢我，例如動力、機會、新 idea同埋膽量。」
鍾意郁手郁腳，揚言喜歡拍動作片追求滿足感，做打女好型又過癮的婷婷，竟然話自己無膽？此話，何解？
「我喜歡拍動作片，好多時見到哥哥、 Andy打到好犀利，我都想試，即使你叫我蒙住塊面扮飛虎， credit唔落我個名，只要有機會我都想試。我第一次拍打戲，就係由哥哥幫我訓練，哥哥仲幫我拍咗條片 show俾佢啲 friend睇，理由係哥哥覺得我打得好好，所以拍低 keep住，某程度係一種鼓勵。
「可能我大部分時間同男仔長大，比較百厭貪玩，覺得冇嘢係男仔做到女仔做唔到，所以好鍾意有挑戰性工作。之前拍《絕色武器》，有場戲要我在大約兩、三層樓高的地方，從兩條柱之間直跳落去，我無怯，跳完落地個個圍住導演睇 playback時，我叫啲工作人員拉番我上去，直至啲人睇完 playback搵我，至知我自己要求吊番上去，因為要落地就要跳，變相俾機會我再跳多次。」
完美主義
熱愛打，又鍾意跳樓，都唔算藝高人膽大，仲要再大膽啲？難道沒有好大膽，只有更大膽？
「唔知點解，比起跳樓，我反而驚做 live，之前有好多人搵我做司儀、唱歌、舞台劇， even好普通的玩 game show，我都驚，好怕做 live performance，感覺同做 model行 catwalk轉個圈好唔同，好怕俾好多人望住，會唔舒服自在。
「因為我係一個要好需要安全感的人，但信任需要時間建立，我暫時都未有信心接拍戲以外的工作。」
是以婷婷決定主動出擊，在未找到合適的經理人之前，先飛到美國逾月 casting碰運氣。
「我係一個好矛盾的人，事事要求 perfect，所以事事都好 hands on， even中學年代做 project，我都會叫其他同學唔好做，等我做，因為我知道自己能力一定做得好。當然一個咁執着的人一定會令自己同身邊人好辛苦，但我都只不過係希望自己有進步至要求咁高。」
愛到死
白底花圖案連身裙$23,500
吊飾項鏈售價待定
Both from Gucci
十個女人，有九個一傾到生/唔生仔這個話題，便會芳心如坐過山車，從騰雲霧端再直插狹谷，七上八落繼而十五十六，絞盡腦汁也得不出最佳答案。
「我雖然好鍾意小朋友，見到啲小朋友放學孭住個好 cute書包仔會開心到癲，但我諗我唔會識得點去 handle。同責任無關，而係嗰種愛我完全承受唔到。這方面我 100%遺傳自媽咪——愛會愛到好痛好痛， even前排我隻貓離開咗，我都覺得好痛好痛，何況係我親生 BB，我會死，我真係會死，開心我又喊唔開心我又喊，我諗 BB未大我已經黐咗線！」
然而生仔從來不是一個人的事啊！
「拍拖初期， Andy都會話『 No! No!』我哋兩個都一樣 say『 No!』然後隔無幾耐， Andy開始有少少轉口風，想知我哋生出嚟 BB會係點樣……不過就好快補多句：『都未得，我仲係細路哥！』 And then再過多一段時間之後，佢直頭話：『 Yeah! I think that's pretty cool!』口風一路轉一路轉，但我由始至終都無轉過！」
誰說只有女人心海底針，男人心一樣無句真呀！ 
撰文：趙朗楨
形象：吳夢珊
攝影： Simon C
化妝： Ling Chan@ZING the makeup school
髮型： Ray Chan
留言列表
{{ article.title }}
