雨僑試過幾次俾人話唔識襯衫，所以要狂煲時裝 apps增值自己。

CLOSE-UP

扮靚全攻略

2013年01月24日 ~~ 第1194期香港《壹周刊》

仲有唔夠一個月就到新年同情人節，對女士嚟講，節日見人猶如上戰場！
唔單只要選定性感戰衣，仲要修身 keep fit，以最佳狀態攝盡男士目光，即使平日親如好姊妹，收視都絕唔會想同妳「四六」開。
攞嚟各界美容達人推介網站、手機 apps，務求以最短時間嚟個大變身。佳節當前，姊妹認真唔怪得我。

雨僑

美容達人， TVB節目《姊妹淘》前主持，用 YouTube分享化妝護膚心得。

心水推介
伊周街拍萬人迷、 VOGUE Daily Look、 Sleep Cycle

伊周街拍萬人迷
對應機款● iOS●免費

VOGUE Daily Look
對應機款● iOS、 Android●免費

Sleep Cycle
對應機款● iOS●$7.8

睇人著衫

雨僑精於護膚化妝，不過，佢就話自己襯衫麻麻哋，「要成日睇潮流 apps提供嘅資訊，最鍾意係『伊周街拍萬人迷』，每日都有大量街頭素人 look，雖然相中人係 nobody，但都著得好有型，原本唔係好識襯之前買落嘅衫，而家就可以靠佢搵靈感。」
唔鍾意街頭智慧，雨僑話可以睇埋 VOGUE Daily Look，「佢將品牌同埋人物分類，想睇 Anne Hathaway點著衫，或者想睇啲人點著 LANVIN嘅衫，入 app嘅分類就搵到。有時同時裝雜誌做訪問，都會開嚟吸收啲新嘢，唔使俾記者問到口啞啞。」

瞓美容覺

講到靚樣，雨僑即刻拉住記者話近排有開心大發現，「外國有研究話，每晚十一點至一點一定要瞓得腍，第二日皮膚先會好。特登裝咗個 Sleep Cycle app，再將 iPhone擺枕頭底，佢就會記錄你嘅睡眠質素，例如有冇成日轉身或幾時醒過。」雨僑大力推介 Sleep Cycle嘅漸進式響鬧功能，「校咗九點起身，佢會由八點開始細聲響，每隔十五分鐘響一次，逐次加大聲量，專家話比起由深層睡眠被嘈醒，對身體會好啲。」試過一排，雨僑話效果幾好，仲即時叫記者睇吓佢好似剝咗殼嘅雞蛋一樣嘅皮膚添！

Zap Tang

有時喺 Jed Root見到有咩新髮型又襯個客， Zap（左）都會開電腦推介俾個客睇。

超過十年髮型設計經驗，現職 XENTER髮型設計師及化妝學校 MOD Makeup Academy髮型設計導師， Estée Lauder、 M． A． C等化妝品牌指定髮型師之一。

心水推介
Jed Root、 VOGUE Hair、 Hair MakeOver

變髮換心情

「女人轉髮型、 set個靚頭唔只貪靚，亦唔一定係剪俾老公男朋友睇，基本上只係想轉換心情、改變心境。」 Zap話差唔多每個女人都有幾道「私家」板斧 set頭，但要追得上潮流，就一定要睇外國網站，其中 Jed Root同 VOGUE Hair手機 app，就有外國髮型師嘅作品，例如為《 VOGUE》、《 The New York Times》寫專欄嘅 Christoph Hasenbein、 Vivienne Westwood模特兒專用髮型師 Ben Jones等，「雖然唔會教你點整，不過起碼可以知道邊類髮型最 trendy，點紮頭髮會更加好睇。」

VOGUE Hair
對應機款● iOS●免費

Hair MakeOver
對應機款● iOS●免費

夾啱先剪

Jed Root● http://www.jedroot.com

不過，想大改髮型又唔係易事，因為好難返轉頭，「同一個髮型，好大機會襯人唔襯你，如果唔夾，就算上咗最潮 colour，望落都會似阿嬸。」想知髮型同顏色啱唔啱自己， Zap話可以試用 Hair MakeOver手機 app，「只要影張正面相，放入 app裡面就可以轉唔同髮型，而且俾你放大縮細面形，效果都幾像真，一睇就知夾唔夾面形。」

Lillian Kan

每次遇到創作樽頸，就即刻開 app搵靈感。

Aile Atelier晚裝及婚紗設計師，香港理工大學時裝及紡織系碩士生，曾為謝安琪、劉心悠、胡定欣及樂瞳設計晚裝。

心水推介
堆糖、 STYLE.com

參考襯衫

舊年港姐決賽，謝安琪做嘉賓， Lillian就設計出一套淡紫色晚裝，結果搶盡收視。不過， Lillian話創作過程唔係次次順利，「最怕腦閉塞，好想每次坐低畫設計圖就有源源不絕嘅靈感。最常用『堆糖』呢個 app，因為裡面有好多女仔自拍靚相，好易搵靈感。」 Lillian話唔單只對設計師有用，「平時女仔襯衫，配 accessory都可以喺度偷橋，入面有好多手花、頭花相，少女味嘅有，去 party去 ball嘅配搭又有，好實用。」
至於點樣 update時裝界第一手資訊， Lillian話睇 STYLE.com就最齊全，「有齊外國所有花生騷嘅相同埋 video，最方便係有 iPhone版，幾時睇都得。」

堆糖
對應機款● iOS、 Android●免費

STYLE.com
對應機款● iOS●免費

Yoko Tsang

Yoko（左）亦有同名牌合作教化妝，有時都會睇 app參考外國明星妝。

曾任職美容版、時裝版編輯，現為全職美容 blogger及女性雜誌美容專欄作家。

心水推介
Celebrity Makeup Looks、美妝教主、台灣 PayEasy（女人我最大）

星妝冇難度

「世上冇醜女人，只得懶女人」， Yoko話要靚一定要勤力過人，唔係求其搽胭脂、唇膏就得，「有邊個女人唔想自己個妝化到同 Lady Gaga、 Taylor Swift一樣咁靚先？『 Celebrity Makeup Looks』就係一個專教人化明星妝嘅 app，有短片清楚交代每個步驟，仲講埋用邊隻牌子同型號化妝品，要扮明星唔太難。」
除咗化靚妝，揀護膚品都好重要，唔好用事小，皮膚敏感搞到塊面又紅又痕，真係幾日都唔使出街！「我覺得美妝教主 app最有用，雖然入面主要係台灣 bloggers嘅扮靚心得，不過台灣近日本同韓國，會快過香港試到新產品，好唔好用、易唔易敏感都會講晒出嚟。」換言之，肯定快過等香港傳媒介紹完先考慮用唔用嘅「姊妹」。講到台灣購物網站， Yoko即刻話 PayEasy入面嘅「女人我最大」專欄最信得過，「唔少朋友都會睇台灣美容綜藝節目學化妝，呢個網頁會搵專家講番電視節目上面推介過嘅產品，好多朋友都經佢買新貨。」

Celebrity Makeup Looks
對應機款● iOS●免費

美妝教主
對應機款
iOS、 Android●免費

台灣 PayEasy（女人我最大）● http://www.payeasy.com.tw/wqueen

Zoe Chan

成日開 app睇新相， Zoe話仲密過開 Facebook。

NAIL NAIL美甲師，曾為鄭裕玲、應采兒、諸葛紫岐等設計指甲造型。

心水推介
girls pic

「呢個日本 app每日會有好多（日本）女仔分享 kawaii指甲造型，無論鬆弛熊定龍貓，照樣可以畫上指甲，好多客都攞呢個 app啲相叫我跟住畫，所以我平時都會用嚟攞靈感同練習，費事出醜。」

girls pic
對應機款● iOS、 Android●免費

Ivy

玩 Zombies, Run!可以同時聽歌，當遊戲有對白時，會自動 fade out音樂，而且又會有喪屍聲，夜晚一個人跑都幾驚。

多年長跑經驗，上年被 Nike邀請飛去美國參加三藩市馬拉松，現正積極備戰二月日本東京馬拉松。

喪屍陪跑員

唔少人識用運動 apps，例如 RunKeeper、 runtastic， Ivy就用開 Nike+手機 app記低跑步數據，再上載 Facebook同其他跑友互俾 Like打氣。今次試玩「 Zombies, Run!」手機 app，累積跑步距離推進遊戲劇情同幫自己嘅基地升級， Ivy讚玩法幾新鮮，「之前上 YouTube睇過玩法，不過未試過唔太明。」
遊戲分有多個任務，跑步中途會隨機執到道具、遇到喪屍同埋拯救殘存人類，所有動作會自動進行，跑手基本上只須一直跑，跑完預設里數就可以過關，「完成後發現基地被救人數會增加，途中執到嘅道具可以 upgrade建築物等級，好似《 SIM CITY》咁起嘢，幾得意，有動力繼續跑。」
除 apps之外， Ivy亦推介「運動筆記」及「 Women's Running Magazine」網頁，提供不少跑步資料，例如姿勢、訓練及勵志故事，相當有用。

Nike+
對應機款● iOS、 Android●免費

Zombies, Run!
對應機款● iOS、 Android●$29.8

道具要擺番去合適位置，基地規模升級，先可以保護多啲難民。

沿途執執埋埋唔少道具，可以幫基地升級。

Eva

Yoga Journal講解瑜伽理論，連點呼吸都有講，適合有瑜伽底子嘅人。鳴謝： Pure Yoga

Pure Yoga瑜伽導師，上堂會用瑜伽 apps輔助。

手機玩瑜伽

以為瑜伽 apps只係睇片學姿勢， Eva話諗法太簡單，「 Buddist Meditation係一個冥想 app，畫面會有語句幫助思考，有助進入冥想空間。」 Eva話喺課堂空檔做瑜伽保持狀態，會用 Insight Timer計時，「其實係倒數時計，最特別係夠鐘時會播放銅鉢諧震聲，有助保持心境平靜，其他 apps好少有。」
網站亦係 Eva「吸收」知識嘅地方，當中首選 Yoga Journal及 My Yoga Online，「 Yoga Journal有大量瑜伽資料，例如理論、呼吸同埋 blogs，而 My Yoga Online則有好多瑜伽大師片段，好似 Cyndi Lee同 David Keil，可以免費睇晒全套動作。」不過， Eva話睇片只適用於已有一定瑜伽底子嘅人，「自學只會學到個姿勢，但好難學到點用力同呼吸。」切忌夾硬做，隨時傷身。

Insight Timer
對應機款● iOS、 Android●免費

Buddist Meditation
對應機款● iOS、 Android●免費

My Yoga Online可按不同風格、深淺程度及影片長度，揀選心水瑜伽片睇。

Sally Poon

Sally指大部分 apps嘅營養資料都以 100g為計算單位，而一般炒粉麵飯重量約為 620g，所以就要將 app內顯示嘅資料乘大 6.2先係真正數值。

營養師

心水推介
My Fitness Pal、吃貨減肥

健康搵食

想 keep fit，除咗要有適量運動，控制飲食同樣重要。營養師 Sally話好多手機 apps都幫到手，「以前要搵唔同食物嘅營養資料，一定要睇書或上網搵，好多人都嫌麻煩唔搵，而家喺 apps入面輸入食物名，就可以 search到熱量等營養資料，要記錄每日吸收熱量就易好多。」
Sally推介用 My Fitness Pal，「資料詳盡準確，加上內藏食物資料庫齊全，用家一 scan包裝上嘅 barcode就睇到營養資料，只要輸入每日食過嘅嘢同做咗幾耐運動，就知係咪入多過出。」

My Fitness Pal
對應機款
iOS、 Android●免費

參考中菜

至於中式炒粉麵飯或小菜嘅營養資料， Sally話其實香港食物安全中心上年都做咗個大型調查，搜集及檢測本地過百款中式炒粉麵飯、小菜同點心，仲將資料擺晒上網，「可惜介面唔 user friendly……國內有個吃貨減肥 app，入面亦有過千款中式炒粉麵飯或食物嘅資料，雖然冇講清楚資料來源，唔敢講百分百準確，但 check過裡面熱門食物嘅營養資料，都算合理，值得參考。」

吃貨減肥
對應機款
iOS、 Android●免費