冇錢請人影相，所以 Winnie每次都要 set腳架自拍。

GEEKTALK

電子廚神

2012年10月25日 ~~ 第1181期香港《壹周刊》

提議 Winnie作狀煮餸俾攝影師影相，點知佢即時舉手反對，「要真正煮先似樣嘛，放心啦，我會買齊材料嚟，上次有雜誌要我三個鐘煮六個餸都搞得掂啦，冇問題嘅！」示範當日切菜發蛋，煮蝦時仲拋到兩吓鑊，果然真材實料，「好細個已經鍾意煮嘢食，小學時媽咪驚危險唔俾入廚房，會趁佢出街偷偷入去煮，再加上後來媽咪發覺我有天分，於是慢慢傳授各種竅門，而家要整三餸一湯，完全難唔倒我。」

黃詠妮 Winnie
25+歲　電子食譜作家

前 now財經台及有線新聞台主播，前年離開有線後轉職 OL，發現不少女性同事及朋友不諳廚藝，於是花一年時間製作《女生初下廚必學魔法》電子食譜，打救廚藝零蛋的港女。

零成本

「好耐之前已想出食譜，不過出食譜唔同出小說，相片同排版要求好高，印刷成本又貴，有朋友之前出過，埋單差唔多兩萬蚊。」好在家陣興電子書，「冇做主播後生活時間正常番，見電子書可以自己影相，朋友又肯唔收錢幫手排版，除咗買食材，幾乎零成本。」
電子食譜原本打算情人節上架，不過 Winnie最終都趕不及，「通咗幾晚頂，最終都喺白色情人節（三月十四日）出到，不過拍落嘅短片全部剪唔切，好在電子書可以不停更新不停改，跟住幾個月慢慢補番都得，如果出實體書送影碟，就唔知幾時先出到。」

全本電子食譜共五十五頁，有齊四十個家常小菜，截稿前已累積二千五百人次下載， Winnie都賺到一萬蚊。

即場示範煮蝦仁蛋角，全程有板有眼，餸菜賣相都幾吸引。

賺知名度

做得咁辛苦，多唔多錢賺？「梗係冇啦，電子書唔可以賣得貴，定價只係$18，寄存喺『光波 24書網』賣，但扣咗上架費，每賣一套只得四蚊落袋……反而出書後多咗電視台搵我拍飲食節目，報紙雜誌亦搵我教煮餸，某程度上，算係賺咗知名度，方便搵外快囉。」記者多口問男朋友有咩反應， Winnie即時扁嘴，「佢從來都冇讚過我煮餸囉，反而 daddy好鍾意食我煮嘅豬肉蒸蛋，每年父親節都叫我煮俾佢食，有人讚喎，梗係煮俾 daddy食好過。」