所謂禍不單行，相信Jessica C.（JC）感受至深，接連發生涉嫌盜竊及疑似淫照事件，令她遭受沉重打擊，心情跌入谷底。她慨嘆曾年少無知做錯事，也曾愛得盲目，太信人結果遭人利用，招來傷害。JC的跌宕心情、人生喜樂，將一連五日與你分享。
呢件事對我嘅打擊好大，傷害得我好緊要。當經理人打電話通知我時，我個腦一片空白，根本反應唔到，到咗夜晚我忍唔住痛哭。冇諗過有啲人嘅心腸可以咁壞，咁樣傷害我。我係一個講心唔講金嘅人，好心痛有人為咗錢傷害我嘅心靈同尊嚴，一個女仔嘅尊嚴盡失。無論啲相係真嘅定係移花接木，都好貶低女性嘅尊嚴。有冇工作已經唔係我擔心嘅嘢，我淨係想要番我嘅尊嚴。我會擔心外界啲人點睇我，又好驚屋企人擔心，佢哋每日都會上網搜尋我嘅嘢，會睇到有關我嘅報道，我愧對佢哋，唔知點面對佢哋。
反叛盲目犯錯
我承認十幾歲時都經歷過年少無知同反叛時期，會做啲唔啱嘅嘢，例如未成年飲酒、食煙，會好貪玩，鍾意刺激，我係曳不過唔係壞。依家睇番五年前嘅自己真係好無知，好唔識諗，以前做過嘅嘢，依家睇番已經係冇價值。我以前會畀愛情蒙蔽，愛得好盲目，當我愛一個人時會好認真，願意無條件為佢做任何事，甚至赴湯蹈火，就算有啲事唔係咁適合，但我已經分辨唔到是非，可能會做出錯誤嘅決定。
學懂帶眼識人
我太信人，冇諗過會畀人利用同傷害。我以後會更加帶眼識人，拍拖會理智啲，學識保護自己。人大咗當然唔會再任意妄為，以後都會三思而後行，諗清楚後果。呢次絕對係我咁大個女遇過最大嘅打擊，但我仍然有信心可以Overcome（克服）到，如果工作上有咩影響，我會明白。我希望時間可以療傷。
呢段日子喺台灣拍戲，我控制住自己唔好諗啲唔開心嘅嘢，一定要撐住，唔可以影響到其他人同埋工作進度，要顧全大局。自己嘅信念好緊要，我好感恩屋企、公司同埋Fans都好支持我，就係因為有咁多人支持我，我唔可以冧。雖然呢段時間好難捱，但我冇諗過放棄，只會繼續畀心機做嘢，希望可以證明到我係一個用心工作嘅人。
萌生放棄念頭
反而之前我有諗過放棄，我係一個家庭觀念好重嘅人，同屋企人關係好Close，做Model令我經常都要周圍飛，同生活喺美國嘅屋企人見面時間好少。我成日都好掛住佢哋，屋企人一有咩事，我就會好擔心，變得心神恍惚，有時會好想唔做返美國。
爆紅迷失方向
拍完Canon同Wacoal廣告之後，多咗好多工作同多咗人識我。當時我冇心理準備轉變得咁快，唔知出街都會有傳媒影，又睇唔明佢哋寫乜。從來冇人話我知作為一個公眾人物，有咩做得，有咩唔做得，覺得好大壓力同冇咗自由。嗰時嘅我完全唔知自己想點，好迷失。但依家我目標好清晰，會更努力工作，唔會輕言放棄。
Profile
全名：Jessica Cambensy
年齡：22歲
血統：父親為美國人，母親為菲律賓華僑
身高：1米70
三圍：34C、24、35
代表作品：
廣告「Canon打印機」、「Wacoal內衣」、「潔柔衞生紙」及電影《熱浪球愛戰》
髮型：Matt Lau@New Japan Hair
服裝：JF81
場地：幸福中心Colour Loungev
第一手消息請瀏覽on.cc東方互動《即時新聞》
名人組
JC慨嘆年少時被愛蒙蔽，不辨是非以致鑄成大錯，使心靈受盡傷害。
形象性感的JC曾為寫真集拍攝濕身照。（資料圖片）
經理人做軍師守護愛將
Jessica的經理人，Model One的Christine在Jessica最難捱的時候一直給予她安慰和鼓勵：「佢嘅心情就好似過山車咁，一波未平一波又起。我係個比較理智嘅人，事發後有同佢分析利弊，畀啲策略上嘅建議佢，同埋幫佢搵律師，如果我處理得唔好會令佢冇咗啲Job，所以我一定要保護佢，佢唔知點做時就由我做佢嘅軍師，叫佢唔好放棄。有好多人支持佢，會Send短訊畀我同佢講打氣同關心嘅說話，我都會Send番畀佢睇，等佢知道有幾多人支持佢。佢依家嘅心情已經平復番啲，當然未好晒啦，但佢會強裝堅強，唔可以衰畀人睇。」
JC一再受到打擊時，其經理人均在她身邊提供意見，給予支持。
年少輕狂
JC曾經貪玩貪刺激，以致鑄成大錯，娛樂圈中也有不少藝人在年輕時犯事。
關楚耀、衞詩
歌手關楚耀和衞詩09年2月在東京雜貨店疑高買，當地警方在關楚耀的煙盒發現一支未吸食的香煙內含0.2克大麻，而在衞詩的驗尿報告中內含大麻及「其他」。最終關楚耀在拘留32天後無罪釋放返港，衞詩則在日本拘留60天才上庭受審，並輕判她入獄2年、緩刑3年，即時返港。
周凱盈
有「翻版阿Sa」之稱的o靚模周凱盈於09年9月在其就讀的中學內被發現藏有俗稱「K仔」的氯氨酮，要接受驗尿測試，化驗結果呈陽性反應，最終在10年判接受感化1年。
陳小韻
章小蕙舊愛陳曜旻的愛女陳小韻在99年6月獨自在銅鑼灣一間百貨公司購買一條內褲時，被發現偷取8條總值700元的內褲，最終判罰款3,000元。
關楚耀、衞詩
周凱盈
陳小韻
衰開有條路
JC於09年憑藉廣告在港火速上位，其後又接拍多個內衣廣告，因其豐滿身材成為焦點，被冠以「警鐘胸」的稱號，其後更進軍電影界，雖然起步不錯，但近年遇上不少黑仔事件！
去年年底，JC撤離香港勇闖荷里活，到當地試鏡，銳意進軍國際影壇，卻未見成果，更有報道指她於美國「零工作、零收入」。
至於JC有份參演、於11年7月上映的電影《熱浪球愛戰》，口碑和票房一般，未能為事業帶來新機遇。
早前本報在JC前巴西籍男友Sergio的Facebook內發現多張攬女夜蒲照，外界揣測二人感情亮起紅燈，最終JC在本月6日首度開腔承認與Sergio分手，還暗示男方有第三者，更表示後悔「貼錢」供養他。
本月11日，JC被揭於去年7月30日涉嫌於尖沙咀的櫃員機偷取600元。案中一名男子撳錢後忘記提取，折返後發現金錢已不翼而飛。經警方一年深入調查後，相信JC案發時尾隨事主，隨即將她拘捕。事件一出，其日本經理人公司的師姐田代麻衣即與JC劃清界線，又直指對方隨時被日本公司終止合約及開除。
JC禍不單行，近日又爆出疑似JC的淫照和短片，即惹來轟動。本月15日，JC透過經理人就淫照事件回覆記者。雖然她沒有承認淫照的真偽，但卻強調自己是受害人。
同樣模而優則演的JC（右）與周秀娜曾合作拍電影。
「犯咗不必要嘅錯」自責處理失當
律師睇過警方提供嘅證據，好有信心證明我係無辜嘅，係無心之失，冇意圖偷竊。我有自責點解處理得唔好，好擔心呢件事會誤導到啲Fans，今次犯咗不必要嘅錯，我愧對支持者，驚產生負面影響。公司好支持我，經理人同同事都有開解我。最初到警署時我仲好鎮定，但一出門口見到有成三、四十個記者喺度等我，嗰刻真係好驚，冇諗過件事會搞到咁大。之後喺機場畀記者追訪，當佢哋一提到我屋企人，我即刻崩潰，喊咗出嚟。屋企人係我死穴，我最唔想令佢哋擔心。今次事件喺我人生裏面算係最大嘅挫折，不過我相信會雨過天青。以後有咩事唔知點處理，我唔會再旨意朋友幫手，一定會第一時間同經理人商量應該點做，我唔會再自己揸主意，會交畀公司處理。
JC因被追問涉盜竊而不禁在人前痛哭。（資料圖片）
留言列表
{{ article.title }}
