堅哥剛過花甲之年，而仲有得相睇，此又豈非佢人生高峰乎？（台灣《蘋果日報》圖片）

中環人語

堅哥拉大隊相睇

2012年10月25日 ~~ 第1181期香港《壹周刊》

禮拜二，敝集團印刷媒體最高領導人堅哥梳得立立靚，帶埋成班手下去相睇——同辜老闆見面也，呢單新台幣一百七十五億元嘅大買賣又往前邁進一大步矣。
先前辜老闆因為同阿扁過從甚密，以致有些少麻煩，唔少人由是對佢敬而遠之。呢單大刁消息一出，即使同佢冇乜兩句嘅人馬，都爭相向佢道賀，甚至「層峯」都拍晒佢膊頭咁講。只此一端，睇怕單刁已值回票價矣。
堅哥剛過花甲之年，到咗呢個黃金歲月仲有得相睇，此又豈非佢人生高峰乎？恨死隔籬也。

譚馬士八蟬聯

譚馬士•馮八度蟬聯「溫哥華五十強人榜」，以佢之 IQ及 EQ，唔從政，嘥咗。

溫哥華僑領譚馬士•馮永發花甲進一，而八度蟬聯「溫哥華五十強人榜」。炎黃子孫而有此殊榮者，推佢為第一人。為此，今年呢個獎特登揀咗唐人街頒發，吉日為十一月十九日。
記者問馮僑領：「如若明朝退休，今日由你揸弗大幹一番，你會做乜？」佢答曰：「將竭盡所能令所有退休人士身心以至財富皆得到妥善照顧。」寄志直追「安得廣廈千萬間，大庇天下寒士俱歡顏」之杜詩聖，譚馬士何止長袖而善舞而已？佢簡直應該從政也。

本週鏡頭
特事特辦：床下底破柴

昔者，孟子以「揠苗助長」為愚不可及；特區特事特辦，天橋底種棕櫚樹，已經夠晒奇特，更以鐵索拉扯，好似慌死啲樹朝日向陽，唔頂實橋底咁嘅款。
決意床下底破柴，呢個政府有乜辦法唔撞板？

金牙大狀講嘢
潛水鵪鶉

蘇錦樑負責監督數碼廣播，佢一直「積極不干預」，鵪鶉潛水，唔潛得耐嘅噃。（《蘋果日報》圖片）

鄭大班擔大旗之數碼廣播股東拒絕注資，由清盤官接管，電台由義播進入七台齋播音樂帶階段。呢個狀態明顯有違電台發牌條件，冇發揮到大氣電波嘅資源效益；作為監管者，蘇錦樑局長有何表示？
有：繼續扮鵪鶉，或者好似佢老細狼英話齋，「積極不干預」。不過，狼英已經講到明「積極不干預」完全絕對唔使得嘅噃，唔通局長冇虛心聆聽？
喺乜嘢情況下堂堂局長至要扮其鵪鶉？仲使問阿桂乎？梗係慄到唔識得出聲啦！慄乜？執正嚟做，要數碼廣播履行發牌條件，善用大氣電波資源效益，會俾人指控為政治迫害囉。
特區唔係依法施政嘅咩？點解監管者要求持牌人履行發牌條件會演變為政治迫害、禁制言論自由？睇怕即使搵好打得之林鄭上電視喊餐飽都未必講得清也。難度高成咁，蘇局長除咗潛水，仲有乜辦法？鵪鶉潛水，唔潛得耐嘅噃！

「環保」二字冇光環

中國雅居樂及建旺打算喺南丫島發展富豪遊艇俱樂部，搵咗鬼佬環保社企「伊甸計劃」（ Eden Project）嚟幫手宣傳，分享佢哋改造英國廢棄嘅礦區為大型植物溫室嘅經驗，以為一打出環保二字就人人都跪低矣。
點知南丫島居民醒水，摸清遊艇俱樂部背後底細，連環保團體都冇面俾，照樣透過 fb及電郵砲轟，結果佢哋縮沙，唔敢喺十一月三日嚟香港作交流。睇嚟環保二字都再唔係所向無敵矣。

中國雅居樂有意喺南丫島發展富豪俱樂部，點知俾居民識穿佢哋打環保牌，照樣抗議其事。

廿位世界飲食大師

敝刊作者新著《史上二十位飲食大師》，民以食為天之唐人冇個上榜，唔通入廚三十年之陳榮師傅都未夠班？

敝刊《 Second Opinion》作者之一 Steve Vines係的而且確多才多藝之 renaissance man，佢係《 Eastern Express》之創刊老總，至今仲係《獨立報》及 BBC之通訊員；九八金融風暴後，佢著有專書《 The Years of Living Dangerously》解構其事。
除咗報導新聞及寫作，佢又經營飲食集團。新近佢為飲食業作深層次分析，寫成《史上二十位飲食大師》（ Food Gurus- Twenty People Who Have Changed The Way We Eat And Think About Food）。呢二十位大師從過咗身嘅 Julia Child到電視紅星 Jamie Oliver都上榜。
搵勻成本書，「民以食為天」嘅唐人冇個上榜，唔通佢呢位老香港未聽過「入廚三十年」而聞名嘅陳榮師傅？

本週除牌

爆肚隨口噏（ Ad-lib）而已，竟然自我膨脹為「宣揚主義」，咁都唔除牌仲有天理乎？

中環人語迷你版

咁叫做言論自由，早抖啦！

估中邊個中環人講呢句說話，送你 JWATCH J-37水晶版藍寶石鏡面限量手錶一隻有意參加者，請於十月二十九日 24:00前將答案電郵 mailto:centralman@nextmedia.com
小宗只接受電郵，郵寄免問。

上週人語揭曉

（《蘋果日報》圖片）

答案
食嘢我鍾意落代糖。

林建岳
得獎者： Lai Wai Kwan
中獎時間： 1:00pm 17/10/12

本刊員工及直系親屬不得參加。
為求公平及杜絕偷步搶答起見，請於星期三下午一時後來電郵競猜答案；在此之前發出之電郵作廢。
超過一位讀者估中，先到先得，恕不接受上訴。
答案及中獎者姓名將於一二年十一月一日本欄揭曉。