探熱針
舞照跳 電視台變俱樂部 王征搵亞姐陪客
亞視去年七月誤報江澤民死訊後，被廣管局禁止參與管理甚少現身公司的王征，即使匿埋幕後操控，卻變本加厲，將亞視當為私人俱樂部。早前，腳傷未癒的王征親自出馬，安排一班冇工開但隨傳隨到的亞姐及亞洲先生返公司陪客。
要又唱又跳 氹客開心，一毫子都冇得收，但王征意猶未盡，竟然成立「亞洲會」，以振興公司為由，要求藝人員工交五百蚊入會，在石頭鑽血，搾乾搾淨。
后冠晚裝恭候
盛傳將亞視大埔總台變為私人俱樂部，要求旗下亞姐及藝人要載歌載舞陪富豪食飯劈酒的王征，日前又再吹雞，率領一班陪客多過開工的亞姐及亞洲先生，列陣迎接其內地好友、著名法學家萬鄂湘教授。
接近下午一點，張家瑩、許瑩、王欣以及今屆亞姐冠軍馮雪冰陸續返抵大埔亞視總台，未幾，揸住過百萬林寶堅尼的有米亞洲先生涂諾載住同屆徐丁出現。
四點貴賓到，但一班負責迎賓的亞姐，十二點便要返到公司化妝、戴后冠 着晚裝呆等足幾粒鐘。
王征親自接見內地貴賓，因腳傷未完全康復，司機將放在車尾箱的輪椅拿出來，以備不時之需。
09年冠軍許瑩（黑裙）跟 10年冠軍王欣（紫裙）以及 11年亞洲先生涂諾（黑褸）、徐丁（藍褸）一字排開歡迎嘉賓。
企在門邊的馮雪冰也有戴后冠齊齊「罰企」等內地貴賓。
五百蚊救亞視
據知，貴賓例牌先觀光一番後，陪客活動才正式開始。平日空置的錄影廠房會變為臨時俱樂部表演場所，一班亞姐上台唱懷舊歌後，再由一班筋肉人亞洲先生接力，上台表演功夫。壓軸環節就由星光幫獻唱，必唱包括王征至愛，在內地十分流行的電視劇主題曲《霍元甲》。
活動於黃昏六點左右結束，王征會親自送行，若有下場的話，王征會叫司機一支箭駛入沙田馬場，然後由其他出口鬆人，十分小心。
「一個月前王征 喺公司搞飯局，當晚 啲亞姐都係 着旗袍唱英文懷舊歌，個感覺搞到好似夜總會咁， 啲亞姐仲要陪住王生 啲朋友跳舞， 嗰日王生好緊張，因為有好多內地富豪 喺度。」知情者說。
跳舞唱歌娛賓冇騷計，王征當日更宣布成立「亞洲會」，要求旗下藝人報名參加。
「總之入會就要交五百蚊，好多同事都話唔知做乜要參加，個會就話係集合力量幫亞視，但大家已經冇嘢做，都想搵人打救，而家竟然要掉轉頭救亞視，王生計得好盡，連自己人嘅錢都要賺。」一名亞視人說。
未埋位， 07年冠軍張家瑩同工作人員「扯」咗支煙先化妝裝身。
要隨傳隨到，有米涂諾（右）揸林寶由深圳來港，仲車埋同屆徐丁。
陪客三美
09年許瑩
有指許瑩已經嫁內地富豪，不過王征吹雞迎賓陪客，她依然會專程由內地來港。
12年馮雪冰
有指馮雪冰是王征點名迎賓最高次數亞姐，因她飲得蒲得，又來自內地，能跟內地豪客溝通。
10年王欣
王欣參選時，已經特登着細碼泳衣突出身材，擺明要搶鏡。
董敏莉早前唔小心講咗句「驚冇收視」，即時辣㷫王征被雪藏，其實董敏莉都冇講錯，亞視收視長期徘徊零至 1點。
亞視 7月無端端舉行 55周年頒獎禮，王征捉住亞姐劉曉智手臂唔放，更由膊頭掃落手臂，好猖狂。
有指「星光家族」古卓文是王征愛將，每有大騷或迎賓活動，他都是指定人選，年初春節節目，他便跟陳冠希女友 Cammi齊唱齊跳。
愈搞愈衰
王征掌管亞視以來，不單將亞視收視推向新低，去年七月更搶先誤播江澤民死訊，舉動震撼全城；自此，王征由揸弗人變為投資者，表面扮低調的他，繼續發功，要幾騎呢，有幾騎呢！
播錯新聞
去年七月，亞視未得官方證實搶先報導江澤民死訊，並將台徽轉為黑色， 18小時後，新華社發表英文新聞稿闢謠，亞視破紀錄被罰 30萬，成為國際大笑話。
直擊奧運
有線電視賣大包，半賣半送讓亞視獨家播奧運，點知亞視有金唔識執，跟無 綫夾埋聯播，王征亦粉墨登場親自揸機拍《大王小蔡睇奧運》，與蔡錦豐齊赴倫敦直擊奧運，結果被踩騎騎呢呢。
三個台慶
為賺錢，亞視今年竟然有三個台慶日， 5月 29日在大埔總廠騎呢升國旗慶祝台慶後， 6月中又移師北京做多一次，唔夠觀眾甚至搵紙牌人頂替，稍後將到深圳舉行台慶動土儀式，總之有錢賺，日日都可以慶祝台慶。 
留言列表
{{ article.title }}
