我哋兩爺孫一齊試咪啦！（設計對白）
呢日三爺孫齊齊練歌，金剛因為前一晚台慶搞到聲沙，不在狀態，再加上唔鹹唔淡廣東話，真係唔知佢唱乜？賈思樂即幫佢解圍：「到時現場會有字幕，觀眾唔使太擔心。」
娛聞樂
處男下海做「蝦毛」 金剛鵬哥舞台爆粗
去年《蝦仔爹哋》搬上舞台，贏盡口碑，成功喚起港人回憶，群星亦紛紛上台客串，令大家再三回味已成經典的《歡樂今宵》。
下月舞台劇再度添食，鵬哥盧海鵬與大姐明林建明仍是焦點所在，本周二（ 20日）本刊直擊演員為舞台劇練歌，其中「蝦毛」一角由去年的音樂人陳奐仁換上講廣東話歪音似爆粗 嘅金剛，仲要歌舞連場，睇怕觀眾真係要睇字幕先可以接收笑彈。
對於屆時鵬哥會否與金剛鬥「試咪（爆粗）」？鵬哥笑道：「爆粗就梗 㗎！金剛接招啦！」
鵬哥早前模仿型男畢彼特的廣告為《蝦仔爹哋》舞台劇做宣傳，成功引起極大迴響，出街至今兩星期點擊率已衝破 26萬人次，都咪話唔犀利。鵬哥今年雖然七十有一，不過無論體力、轉數都可媲美後生。本周二（ 20日），鵬哥與三嫂（戚美珍）、賈思樂及金剛齊齊到土瓜灣錄音室練歌，鵬哥隨身攜帶了一隻細 CD，本想唱番首〈激光中〉開聲，點知樂師搞極都搞唔掂，鵬哥忍唔住即場「試咪」爆粗，在旁的金剛興奮大笑：「我一入 TVB已經聽人 哋講『盧海鵬試咪』，今次現場聽到真係好有 feel呀！」
金剛雖然零舞台劇經驗，但三嫂戚美珍力薦佢頂替陳奐仁，仲叫佢做騷 嗰幾日唔使 set頭，因為鵬哥同沙姐一定會拍到佢個頭亂晒。睇 嚟金剛除 咗要練歌，仲要練埋鐵頭功。
百足咁多爪的金剛因為有其他工作要先走，離開時不忘同爺爺鵬哥講聲拜拜。後輩咁有自己心，鵬哥食啖飯都甜 啲啦！
兩爺孫鬥爆粗
試咪反應大
本周二（ 20日)金剛在錄音室聽到鵬哥爆粗反應甚大，事後佢話聽到鵬哥試咪真係好有感覺，睇佢笑得咁開心就知啦！
鵬哥性格率直，不時當眾爆粗，問他到時在台上會否爆粗與爆肚？他說：「 Live好難講，過程有 啲咩我唔知 㗎！爆粗就梗㗎，不過爆得多又唔得 噃！叫金剛接招啦！」金剛貪玩就係人都知，加上佢一口唔純正的廣東話，兩爺孫隨時一齊「試咪」，不過三嫂就話：「我唔俾金剛講粗口 㗎！佢講粗口我會打佢！」
金剛處男下海演舞台劇，就與眾多實力前輩合作，既要做戲又要唱歌跳舞，他拍拍心口話冇有怕，直言最期待與鵬哥合作：「我估鵬哥到時一定會爆肚，希望我接得住啦！」在旁的賈思樂亦笑說：「上年陳奐仁俾鵬哥蝦到呢！我叫 咗佢唔好恰新人，不過呢個係佢 哋 嘅溝通文化，我相信金剛都唔弱，佢接得住鵬哥拋出 嚟 嘅 嘢！」
盧海鵬試咪由來
扮畢彼特
早排畢彼特幫 Chanel拍 咗個香水廣告勁 hit，鵬哥即惡搞畢佬嘅宣傳短片，以 cool爆表情講出抵死對白寸盡時事，乘機幫舞台劇做宣傳。
演員拍戲要安裝無線咪，然後先試音量，俗稱「試咪」。通常演員試咪都會說：「 Testing123，得唔得？」之類。不過搞笑的盧海鵬在早年《歡樂今宵》已獨創其試咪金句，不是「 testing」，而是以五字粗口來代替。每次鵬哥試咪均會說：「盧海鵬試咪， DNLMH（英文字母代音）！」然後再後加一句：「得唔得？」每次都令大家笑得好開心。
嫌沙姐麻煩
載歌載舞
鵬哥去年在《蝦仔爹 哋》除了落力發放笑料，仲載歌載舞。鵬哥你 嘅地位，真係誰能代替呢？
今次蝦仔家族練歌獨欠沙姐，鵬哥抵死說：「少 咗佢少 啲麻煩啦！」但當問到早年患情緒病的沙姐精神上能否應付舞台劇密集式的排練時，鵬哥謂：「佢之前長時間冇演出，都唔知自己能力去到邊，依家有得演出仲開心，精神又有寄託。」口講嫌沙姐麻煩，鵬哥其實很關心老朋友。
《蝦仔爹 哋 II》原定於下月 14與 15日於九展開騷，因反應熱烈，決定於 16日多加一場，一連三晚發放笑彈。賈思樂表示演出除了能讓一眾「家人」團聚外，更重要是可一齊做善事：「我 哋今次用明星足球隊 嘅名義籌錢買醫療車，以後 啲老人家唔使去好遠 嘅地方都可以睇醫生，一架醫療車成百五萬，都好貴 㗎！」既可敍舊又可做善事，真係一舉兩得。
星光熠熠撐《蝦仔》
《蝦仔爹 哋》陪伴不少港人成長，舞台劇去年首次公演，不少名人紅星都反應熱烈，甚至唔收錢做串星，加入《蝦仔》呢個大家庭。
去年 9月《蝦仔爹 哋》在灣仔伊利沙伯體育館一連四場打響頭炮，音樂人陳奐仁做賈思樂囝囝「蝦毛」。
當年的《蝦仔爹 哋》是《歡樂今宵》的皇牌肥皂劇，每集鵬哥都有出位鬼馬對聯，羅蘭亦是主角之一。
今年陣容
「蝦毛」由金剛飾演，嘉賓陣容包括梁家輝、陳慧琳、吳君如、江欣燕、林峯、曾志偉、陳百祥、苗僑偉、黃日華、廖安麗、梁烈唯、林曉峰、朱咪咪、余慕蓮等。
去年串星
去年除了有劉德華、楊千嬅、鄭秀文、陳奕迅及容祖兒擔任嘉賓外，其他串星還有毛舜筠、曾志偉、陳百祥、米雪、鄭裕玲、苗僑偉、黃日華、林曉峰、關菊英及廖安麗等。
留言列表
{{ article.title }}
