梁家輝被帶返 ICAC助查時，表現冷靜推翻李治廷的假設，難怪不少人都認為他與彭于晏一夥。
娛聞樂
票房破 2.5億 主角解《寒戰》五大疑團
近日由梁家輝、郭富城孭飛的《寒戰》全線報捷，上畫 10日，中、港、台三地票房已過 2.5億港幣，走勢凌厲。
不過，唔少觀眾睇完齣戲，都滿腦子問號，究竟片中林家棟、錢嘉樂，是忠是奸？策劃幕後陰謀的大 boss又是何人？本刊就搵到《寒戰》一眾主角及導演陸劍青、梁樂民為你拆解疑團。
1梁家輝係咪終極大 boss？
片尾梁家輝大義滅親，親手拉親生仔彭于晏，更與郭富城握手言和。不過，有人認為家中對質戲係場苦肉計，梁家輝才是幕後大 boss。而兩位導演對於誰是大 boss一角就故弄玄虛咁話：「的而且確有好多嘢顯示家輝係大 boss，好似佢同彭于晏都係睇同一本書。不過我哋唔排除會開續集，開得續集，個終極大 boss，我哋一定唔會用呢輯嘅演員。」明晒，即係原先唔開續集，梁家輝極有可能就係……
俾你估到我就唔係影帝啦!（設計對白）
梁家輝同彭于晏呢場苦肉計，居然好多觀眾都睇穿。
2解構彭于晏手中書《 Shadow Warrior》？
陸劍青導演：「呢本書係澳洲一個特種部隊嘅真人真事，作者蒙面打劫銀行。最後警方查到係一個軍人所為，用番佢哋嘅招數嚟揪出真兇。作者出獄後寫咗呢本書。我哋覺得佢同彭于晏嘅性格好似，所以借嚟用。」
彭于晏坐監時手上本《 Shadow Warrior》，係咪暗指梁家輝是幕後大 boss？
梁樂民（左）與陸劍青導演異口同聲表示：「我哋唔排除開續集，到時會搵個好有分量嘅演員飾演大 boss。」
3錢嘉樂有否出賣郭富城？
唔少網友認為錢嘉樂在戲中因欠債而做二五仔，出賣郭富城。
當事人嘉樂就話：「如果我係二五，就唔會搏命飛車救 Aaron啦，我好人嚟㗎！」
而梁導演開古：「由始至終係金庫主管講大話。因為嘉樂仔為救郭富城死咗，所以金庫主管講大話都死冇對證，佢被幕後集團利用完後，就俾汽車炸彈炸死。」
家輝好易呃到觀眾！（真實對白）
戲裏郭富城擺明係忠，問佢梁家輝係咪幕後 boss，城城就話：「我拍佢就梗係知啦，不過佢咁好戲，觀眾好易俾佢呃到㗎！」
我對城城好忠心！（真實對白）
邊個打電話要脅郭富城放彭于晏？唔少睇過嘅人都話係梁家輝。而導演就堅持唔答呢個問題。
錢嘉樂是郭富城的頭馬，但死後被揭發欠債兼極速還款，令郭以為被他出賣。
贖金失竊同日，主管何華超離奇放大假，事後亦否認要求錢嘉樂還贖金餘款。
4林家棟知唔知內情？
在警隊高層中，林家棟熟識法律，要借法律漏洞犯事並不難，加上他原為梁家輝下屬，竟不時密會郭富城，似做無間道收料。
林家棟就話：「我唔關事㗎。我淨係講法治精神，雖然梁家輝係我上司，但我覺得佢有問題，所以咪掉轉槍頭幫 Aaron，最後安志杰仲殺咗我滅口，死得最無辜。」
我係無辜㗎！（真實對白）
梁家輝頭馬林家棟變節投郭富城一票，不少人認為他是派到郭身邊的二五。
林家棟上天台與污點證人會面，怎料知道真相後被手下安志杰槍殺。
5尹子維奸定忠？
尹子維手執警隊機密資料，被收買出賣警隊資訊都不足為奇。
尹子維是信息系統首席總監，知道好多警隊嘅秘密資料，如每個警察制服口袋位都有個追蹤器，反而上司郭富城全不知情。
尹子維：「事實上好多機密資料得幾個人知，而我亦有能力搞垮警隊成個部門，咁你話班匪徒會唔會第一時間搵我？」哦！原來你係壞人嚟嘅！ 
留言列表
{{ article.title }}
