眼腫爆血得番半條人命嘅謝霆鋒,連眼都擘唔大,嘴唇眼皮同額頭都擦損晒。

出名唔錫身的霆鋒,一向親力親為唔用替身,去年搏盡終憑《綫人》贏影帝,今年再接拍林超賢的二億大製作《逆戰》演大奸大惡通緝犯,除了要與周杰倫齊齊浸死海 6粒鐘,搞到背脊及 pat pat爛肉外,遭 10幾人圍毆亦堅持自己落場捱打。
爆缸爛面樣樣齊,戲中靚仔樣不保的霆鋒話完全唔介意,「捱打唔算咩 啫,我俾人打慣!」唔通自細俾四哥訓練有素?

由霆鋒和周董主演的《逆戰》,有場講霆鋒得罪一班馬拉黑幫,俾 10幾個大隻佬圍毆,親身上陣的霆鋒被打到得番半條人命,雖然唔係真爆缸,但事後一樣周身瘀傷,成個人散晒。
打到面都爛,霆鋒話濕濕碎,「呢種程度 嘅捱打戲分唔算咩 啫,尤其係拍林超賢 嘅戲,佢好鍾意嗰種野蠻 嘅感覺,我都俾人打慣!反而呢個髮型我係第一次嘗試,感覺幾特別,同埋好能夠表現出我嗰種血氣方剛!」打到爆晒缸都話冇嘢,唔怪得霆鋒成日叫 Lucas要「 be a man」!



爆缸爛面打到成身血,霆鋒竟然連條右眼眉都淺色晒,好離奇喎!

反白眼俾人打到反眼,好在老豆智叔及時同班警察到場,霆鋒先至唔使死。

十人圍砌拳打腳踢不特止,班馬拉黑幫仲出動埋棒球棍,打到霆鋒瞓低。

自爆唔專心

在《証人》及《綫人》都合作過的霆鋒同廖啟智,今次在《逆戰》中做父子,由於戲中霆鋒來自單親家庭,智叔又爛賭唔生性,令霆鋒愈來愈奸,殺人放火乜都做。
四度合作,霆鋒自爆拍緊戲時偶然會分心,多得智叔夠經驗帶番佢入戲,「智叔係一個好可靠 嘅演員,佢永遠可以將人不知不覺帶到戲入面,例如我一唔留神分 咗心,佢一句對白就可以將我帶番現場,真係功力深厚!而且佢每次演出都唔同,畀我喺演技上帶 嚟唔少新衝擊。」拍《逆戰》時咁 啱搞緊離婚,戲裏戲外一樣多衝擊!

周董做細佬

《逆戰》除咗霆鋒,仲有周杰倫飾演佢親生細佬,同樣要開槍打到飛起,不過唔使打到爛面, keep到個型仔樣!



霆鋒同周董平時 cool到爆,但一拍埋竟然有講有笑,互相將對方呢座冰山劈開。

霆鋒同周董喺戲中係親兄弟,不過成日打交,亦敵亦友。

導演林超賢(右)嘅戲超多動作場面,導演喺拍攝期間都整親腳,唔怪得霆鋒都話慣咗俾人打!

封街爆炸

 



打劫銀行嘅霆鋒同姜皓文飾演嘅警察槍戰,大馬政府派出真警察到場維持秩序,非常合作。

呢場街頭爆炸戲係重要場面之一,事前用咗 5個鐘準備,仲封咗條街兩日先拍到。

寃家
路窄

柏芝同霆鋒上週一( 14日)前後腳現身上海浦東機場,兩人分別到車墩影城拍戲,分分鐘撞到都唔奇。



《蘋果日報》圖片

《蘋果日報》圖片

賀歲贏面大

農曆年檔暫時得三套港產片,除了《逆戰》,仲有黃百鳴的《八星抱喜》及爾冬陞的《大魔術師》,數量唔算多,但論動作場面同爆破,肯定《逆戰》贏晒。

 

《大魔術師》
演員:梁朝偉、劉青雲、周迅
上映日期: 1月 12日



《蘋果日報》圖片

《八星抱喜》
演員:古天樂、甄子丹、陳慧琳、吳君如
上映日期: 1月中

假霆鋒呃錢

霆鋒一個騷起碼收過百萬,估唔到廣西的玖典公司竟然為慳皮,搵個「山寨霆鋒」出席活動,但就明目張膽話請霆鋒做嘉賓,辣㷫一班專誠捧偶像場的粉絲。事件俾人踢爆後,英皇立即發聲明表示會追究,「山寨霆鋒」、廣州藝人黃寧亦在微博道歉,仲劃清界線話自己俾主辦單位擺上枱。



山寨貨遠睇似足霆鋒,不過望真少少其實似王傑多啲!


主辦單位做戲做全套,安排假霆鋒坐保母車出入,幫粉絲簽名仲簽「謝霆鋒」,離晒譜!

arrow
arrow
    全站熱搜

    stacylife 發表在 痞客邦 留言(0) 人氣()