漫遊毒物

初音超級粉絲　 Cos住教你做歌姬

2012年09月05日 ~~ 第276期 Face

又有演唱會、又有新 game，行過信和中心仲見到比樂壇巨星毫不輸蝕嘅巨型 banner海報，虛擬偶像初音未來可謂華麗當前，直闖人氣最高峰。今期搵來超級初音 fans兼 cosplayer小緒，變住身教玩 PS Vita新作《初音未來 Project DIVA- f》，原來除咗聽歌篤掣，仲可以幫初音扮靚換衫，一齊虛擬+實景合照，無論你愛初音靚聲定係萌樣，一樣大滿足！

機種： PSV
廠商： Sega
類型：音樂
遊玩人數： 1人
售價：$448
查詢： Sega(2366 1001)

眼花瞭亂要適應

果然係 fans，小緒帶齊成套歌衫到影樓，見佢超認真地變身成初音，記者借呢個時間了解吓遊戲玩法，原來《初音》玩法同一般音樂 game相似，依畫面上嘅節奏圖示按下對應嘅按鈕，比較特別係《初音》啲音符 note四方八面亂飛，記者自己都玩到眼花。
當小緒變身完成後，見佢仲戴咗 color con，心想真係難為佢，點知小緒話呢隻 game早喺 PSP已玩過，加上歌曲都耳熟能詳，眼睛適應後馬上篤得快而準：「玩唔慣的話可以用 easy mode玩，用╳、○兩個掣就可過版。建議大家插耳機玩，音樂聽得清楚啲，節拍都會捉得緊啲。發現自己成功率開始高，就可以去挑戰 normal難度。」

主打歌
今集主打歌係出自知名 Vocaloid（誕生初音嘅音樂創作軟件）創作人 Ryo手筆嘅 Odds＆ Ends，旋律易記，小緒仲話歌詞感人，識日文嘅記得留意。

睇位估節拍
一般音樂 game音符由上至下或由左至右整齊排列，《初音》則由四方八面來襲，但其實可以由音符嘅密集程度預測節拍，擺得愈密按嘅節奏愈快。

捽星星

PSV係篤芒機，但 4種基本音符仍要按掣解決，小緒話：「唔使介意 icon亂飛，總之見 icon上時針指住 12點正上方就按掣。（見圖）」另外新增星星符號就係睇時機捽芒，小緒雖然戴住手套，但無礙佢捽芒成功，佢話用手指公捽最順手，但樂曲難度一高就建議轉用食指捽。

星星 icon

一般 icon

初音 Cosplay感言

試完 game，見小緒打扮咁傳神，梗要問吓佢 cosplay初音嘅感想。佢話初音無論插畫定歌曲都有大量網絡創作，形象百變，所以唔會厭。「初音喺 cosplay界都好氾濫，但佢 keep住有新造型所以唔會 out，有朋友單係初音假髮都有 20多個。我比較鍾意搵啲獨特嘅造型，例如呢次個造型係來自一首叫〈水箱〉嘅歌，得一張插畫所以比較冷門。」

小緒
初音 fans年資： 3年
Cosplay年資： 4年
愛上初音的原因：雙馬尾、形象多變、音樂遊戲好玩

比較〈水箱〉初音插畫，係咪好神似呢？小緒話最難係 keep住假髮要呈現初音嘅 M形劉海。

帶 AR初音行街影相

小緒話作為初音 fans，喜歡佢既係實力派，又好似 idol咁形象百變，所以超 like遊戲玩音樂之餘，有大量小玩意。「最鍾意 AR實景功能，可以將初音帶到現實背景合照，好似帶住佢出街咁，啱晒 PSV用。」可惜記者寫稿用嘅 demo版冇 AR功能，小緒冇得同初音合照。除咗 AR，遊戲仲有個 Diva Room提供各種互動功能，例如變身做鬧鐘或者播其他 SD咭上嘅 MP3，都幾生活化㗎。

限定 AR咭
限定版主機套裝附送精美 AR咭，但普通版一樣有張 AR紙，遊玩內容冇分別。

普通版 AR咭

初音實景有兩個玩法，一個對住 AR咭，初音就會跟住咭嘅位置彈出嚟，以實景做舞台演唱。

亦可以玩合照，初音有唔同預設 pose，玩家可以就位合照，能否同初音更親密接觸睇你創意。

除咗實景，仲有 DIVA Room，初音同佢嘅朋友會喺度同玩家互動，有鬧鐘、 timer功能。

初音家族任你舞

近來先留意初音嘅朋友，可能以為初音係獨立個人身份工作，其實隨住人氣漸高，初音已經進化為好比少女時代嘅組合團隊。有兄弟姊妹，仲要好受歡迎，蒙面歌手龍小菌第時都可考慮加番隊蒙面樂隊一齊唱。喺 PSV遊戲入面，一路爆機就可以收集新同伴，仲可以幫佢哋換衫扮靚，大量收集元素保證耐玩。
PSV版部分歌曲除咗主唱外，可自由挑選 2位舞伴，初音嘅歌都可以有鏡音兄妹同台演出。另外鏡頭角度、樂器音色都可自訂，直頭似足 MV導演，加上 PSV網絡功能，你可以將自製嘅片段放上 server同大家交流，超互動！

PSV版主打高畫質靚人靚衫，將會有勁多獨特衣服，圖為同遊戲《 PSO2》 crossover嘅鍊金術士裝。

裝束數目豐富，放低招牌雙馬尾再戴帽感覺又唔同晒，小緒就話呢款貓耳頭巾版夠吸引。

選用其他角色，再進一步連背景、服裝都改晒，成首 MV睇落就唔同晒！

偽娘都參戰　初音 Cosplay比賽接受投票

總結嚟講，無論話題性還是遊戲內容，《初音》都係 PSV機主必玩之作，唔使多講玩後感。提提大家記得參加埋 PlayStation搞嘅 FB票選初音 Cosplay比賽，雖然參賽期已過，但仍然可以投票。呢個比賽就連男生都變偽娘參加有靚靚 cosplay睇，又可得海報禮品， FB投票包保有信心過港姐投票多多聲喇。

呢位朋友講出初音 fans心聲，睇初音反而係唔想有事業線，爆乳雅典娜絕對唔啱佢口味。

男仔都可以參加㗎，冇分性別，放心！

有愛能變娘！堅係男生嚟㗎，仲有更多具話題性嘅 coser等你支持。

初音 Cosplay大賽投票方法：
登入「 PlayStation HK」 Facebook專頁
(http://www.facebook.com/PlayStationHK)
公開投票日期：即日至 9月 9日
投票獎品：《初音未來 Project DIVA- f》海報一張