小報告
打救港產片
成日話香港電影冇市場，港產片一定係爛片，其實好戲依然有，單計今年，由新年賀歲檔開始，一路有《桃姐》、《春嬌與志明》，到現時仲未落畫的《低俗喜劇》，票房全部開香檳。
早年提起純港片，一定諗起杜琪峯加韋家輝呢對黃金組合，但今時今日彭浩翔先係本地電影代表。《低俗》收得令電影公司老闆肯投資拍港產片，導演有工開，觀眾又唔使焗睇西片或者配音合拍片，咁咪 win win win三贏？
杜彭對談錄
合拍片有幾唔合理？
容祖兒孭飛的《 DIVA華麗之後》，由杜汶澤自監自演。
我好難相信一個香港人，去飾演一個內地人！志明返大陸做嘢就 make sense啫！你拍套差 嘅戲但好收得，咁你套戲過 咗骨，但係害死後面嘛！開始有好多內地人話我哋香港人上去拍戲係搵佢笨，我覺得搵錢同搵笨係兩回事，你貨真價實好睇 嘅，係搵錢；題材吸引、明星大，但你拍一個扭曲 嘅故仔，粗製濫造 嘅，咁叫搵笨。
唯一係睇楊幂好驚 嘅時候周圍走，扽吓扽吓（個胸）！但係楊幂唔走得好多次 㗎咋！《無間道 3》就係最早期 嘅合拍片，但口碑其實都冇 1、 2集咁好。我覺得應該係北京人拍北京戲、廣東人拍廣東戲，你話市場大咩？都要識做先得 㗎！
唔好因為香港電影轉型，而去拍一 啲扭曲 嘅戲，就話係救香港電影，其實係救你自己荷包！《低俗》 嘅成功未必係佢 嘅精細，而係有一種好強烈 嘅自由氣息，又三級又粗口！尤其中國一黨專政，內地人民好想用幾十蚊感受自由，你買個 LV唔會覺得好自由，你只會覺得係真 嘅；冇一樣產品會接觸到自由，除 咗電影。 
純港片唔係淨係畀香港人睇！
譬如內地唔畀拍有鬼 嘅鬼片，於是乎諗盡唔同辦法，包括話佢最後係發夢、精神分裂，慢慢觀眾就會發現，你今次宣傳到好似鬼片，最後冇鬼 嘅，過骨、賺錢；下一部又係咁，後來所有觀眾入場，你逢親話畀我聽係鬼片，我未睇完個結局都知道個結尾係點 㗎啦，都係精神病吖嘛，冇鬼 嘅！ 
10年三級《志明與春嬌》收 6百幾萬，今年《春嬌與志明》 IIB級收 2千幾萬。三級《低俗》大有機會令彭導包辦 2012年港片冠亞軍。
我唔抗拒拍合拍片，甚至拍國產片我都得，但一定要就番 啱個題材。內地冇分級兼有審查（劇本批文需時）， 100種題材有 25種唔拍得，即係有 75種過得到。我覺得最墮落係為 咗要大陸市場，明明諗 咗嗰 25種嘢，夾硬將佢剪剪剪剪變成嗰 75種！然後拍 咗出 嚟，觀眾覺得你拍得差、同業又覺得你戇居，咁做乜嘢呢？
好多人攞好多錢拍合拍片，都搞到損手爛腳，所以更加要令到個市場多元化，而純港片係一個出路。特別係有 咗自由行之後，真正刺激到純港片 嘅銷量。呢個就係我同杜汶澤點解要搞《低俗喜劇》 嘅原因，我哋要證明純港片係有出路。
演員片酬係咪太高？
阿澤喺《無間道》演「傻強」，戲分唔多但夠深入民心。
妖， 啲導演實係咁講㗎！
如果《大魔術師》唔係梁朝偉做，我攞條命擔保肯定冇咁 嘅票房，咁就盡顯 咗梁朝偉 嘅價值；你好難去證明一個演員冇用，但係好容易去證明一條友有用，好似《變形金剛》，我覺得條女好緊要吖， 啲變形金剛就拍快鏡，條女就拍慢鏡，咁你就知條女有用啦！
咁變形金剛咪嬲囉，有冇搞錯，我屈到隻手咁樣，你都話係睇你！所以演員片酬一直咁高係冇辦法，因為個畫面主要係睇到佢，睇唔到個副導演 㗎！所以副導演 嘅身價咪一直偏低囉，你見唔到佢效用嘛！ 
《買兇拍人》係彭浩翔第一齣長片，亦係佢成名作。
成個大中華地區都有呢個問題，其實我贊成演員 嘅價格要浮動，如果有 啲製作係純賣你個名，咁我唔介意你收貴 啲，但如果有 啲戲係好有意思，其實就可以調整吓！
套戲唔掂，死因一定搵唔到 㗎，但如果掂就個個爭住仆出 嚟認！等於《變形金剛》條女會話：你估 啲人係睇變形金剛咩？睇我咋！
2012十大香港電影票房（截至 9月 4日）
雖然 2011年票房冠軍《 3D肉蒲團》收 4,108萬，但今年的《桃姐》及《低俗喜劇》均比上年第 2、 3位的《我愛 HK開心萬歲》及《竊聽風雲 2》賣座，連仍上畫中的《喜愛夜蒲 2》都有 7百多萬，比上年第 10位《關雲長》少約 50萬，大有機會爬頭。
＊資料由香港電影協會提供
1.春嬌與志明$27,974,902
2.桃姐$27,873,690
3.低俗喜劇$24,638,752（上映中）
4.逆戰$22,212,450
5.2012我愛 HK喜上加囍$19,127,350
6.大追捕$17,729,513
7.車手$14,766,493
8.八星抱喜$12,105,230
9.高海拔之戀 II$8,988,529
10.喜愛夜蒲 2$7,587,678（上映中）
香港史上頭 3套最賣座的港產片中，周星馳獨佔 2套，成龍佔 1套，其中成龍的《警察故事 4》已經係 96年出品，估唔到都未有新戲破到紀錄，仲未計 16年通脹。
1.《功夫》（'04）$61,278,697
2.《少林足球》（'01）$60,739,847
3.《警察故事 4之簡單任務》（'96）$57,518,795
三級之路 《一路向西》導演胡耀輝：我唔想為鹹而鹹
杜彭組合的《低俗喜劇》，因勁多粗口列三級，但講到真正拍埋身肉搏的三級片，就一定要提佢。浸會大學電影系出身、做過新城電台總監同 TVB新聞部 director（負責控制 panel）的胡耀輝（ Mark），唔拍藝術片大製作，反而向三級電影出發，《喜愛夜蒲》、《 3D肉蒲團》出自佢編劇，下月上畫、改編自高登甜故的三級片《一路向西》，更係佢第一次執導。
套套都有肉搏場面，但 Mark話佢唔係刻意一路向鹹。「我上年寫 咗 6個劇本，其中《起勢搖滾》係完全零鹹嘢（埋單票房少過 100萬）！真心講，我唔想為鹹而鹹，雖然我唔抗拒，但我唔係非常鍾意睇 AV、諗鹹嘢 嘅人！我一直好想拍一部比《 American Pie》更勁 嘅戲，有做愛戲、有搞嘢鏡頭，如果唔係我拍，好難有個導演敢走出 嚟話佢有 experience去拍呢個題材。」
有 guts拍大膽性愛場面，但原來 Mark試過有更激 嘅橋段係出唔到街。「有 啲鏡頭係拍咗都冇用，咁不如放棄啦！譬如我好想拍潮吹、噴水，如果你向住個鏡頭噴，好勁；咁但係我過唔到自己，其實我寫 咗落《肉蒲團》 㗎喇，但係都要縮番！《肉蒲團》入面，其實導演拍 咗個標奶鏡頭，係葉山豪揸住女演員個胸向自己唧奶，當時嗰位女演員 啱 啱生完，真係有人奶，佢同在場其他女副導都同意我哋咁拍。其實個畫面唔色情，而且雙方都同意，但我唔想影響到部戲同葉山豪，亦唔想搞到我哋好似好×變態，結果我睇試片時都係話剪 咗佢！」三級片，有辣有唔辣！
拍潮吹過唔到自己嗰關！
《一路向西》講港仔北上獵艷經歷，又係三級。
《 3D肉蒲團》係香港第一套 3D色情片，吸引到強國觀眾組團來港捧場。
2013大片預告
下年有幾齣大製作排住隊上畫，雖然唔多唔少都有內地資金投資，但由電影公司、導演以至大部分主角都係香港土炮，肯定唔會好似《聽風者》咁睇到 O晒嘴啦！
《大鬧天宮》 導演：鄭保瑞 主演：甄子丹、周潤發
《忠烈楊家將》 導演：于仁泰 主演：鄭伊健、吳尊、林峯 
《一代宗師》 導演：王家衞 主演：梁朝偉、章子怡
《盲探》 導演：杜琪峯 主演：劉德華、鄭秀文
新導演有位入
曾國祥：開戲唔難
成日話香港電影式微，我反而睇好將來，特別係《低俗喜劇》收得，對本地電影係有好正面 嘅影響。 𠵱家要開戲其實唔難，可能老闆計劃開 10部戲，其中 2、 3部一定係本地製作，唔會話預晒所有資金去拍合拍片，當然，你唔可以諗住老闆會畀幾千萬你去拍一部小品，但 800萬至 1千萬都係有 嘅！
《斷了片》由余文樂、張靜初主演，係曾國祥同尹志文（上右）最近作品。
郭子健： 100萬 嘅戲都拍過
今年 嘅投資者比以前肯拎錢出 嚟開戲，以前通常 2、 3百萬要你搞掂部戲， 𠵱家可能 6、 7百萬都有， 08年拍《青苔》更加係得 1、 2百萬！而且好多演員接本地電影都會自動減價，唔會好似拍荷里活戲或者內地電影咁高片酬，佢哋其實都好支持香港電影。
《蘋果日報》圖片
《打擂台》成本唔高，依然贏得金像獎「最佳電影」，郭子健更會同星爺合作拍《新大話西遊》。
葉念琛：大卡士唔一定 sure win
葉念琛擅長拍愛情小品，拍過經典愛情三部曲《獨家試愛》、《十分愛》及《我的最愛》，平均票房過千萬，比起唔少名牌導演的出品更賣座。女主角由 Stephy、 Chrissie、佘詩曼到今年 10月上畫的《天生愛情狂》女主角劉心悠，年年獨沽一味談情說愛，葉導依然堅持 50年不變！
「每一年都有人問我會唔會轉型，我反而希望我 嘅獨特性會有人記得，導演建立風格好重要！我係拍愛情戲，但每次題材都唔同，《婚前試愛》用 咗娜姐同 Carol，入面有好多床上戲，大家都會覺得同之前 嘅愛情三部曲嗰種純情好唔同；之後《人約離婚後》，演員組合好唔同，如果我唔創新，就去拍《婚前試愛 2》啦！」
演員片酬年年創新高，好在葉念琛識得走位用新人，「 Even你用大卡士，都唔一定 sure win，所以你見我 嘅戲好多都唔會用大卡士，反而鍾意用新人。香港電影最缺乏就係演員，成日都係嗰 啲配搭，如果 Chilam同心悠今次合作有好票房，以後咪又多一個男女主角組合可以用囉！」
新片《天生愛情狂》由劉心悠同張智霖做膽，加上新姣精苟芸慧等新血，有新鮮感。《壹週刊》圖片
方力申同 Stephy的愛情三部曲系列夠賣座，但葉念琛堅持每年會用新主角。
留言列表
{{ article.title }}
