上週三（ 8月 29日）， Mia現身南華球會活動時，睇中南華接棒取代陳七一哥位嘅新球星 Sean，兩人隊兩杯香檳後分外好傾。
球來球往
媽模爛蒲 Mia生擒南華新球王
22歲媽模陳靜儀（ Mia），最近擔正主演新戲《喜愛夜蒲 2》，扮蒲妹入形入格，演床戲又夠放，點睇都唔似生過一仔一女。
上週三（ 8月 29日）， Mia踩場去南華足球會活動，更即場睇中南華由英國曼城招攬的新球星 Sean（謝家強），借故請對方教篤波乘機黐埋，然後食住上當場「抄牌」，最後 goodbye hug攬到實。睇嚟呢位南華新球王都好難走出 Mia五指山囉！
挨身挨勢
羅傑承力捧
當晚一班南華球星先係主角，影大合照時， Sean就企正喺老闆羅傑承後面嘅顯眼位，成班球星最型係佢。
現年 22歲的 Mia， 16歲早婚，育有一仔一女的她， 3年多前已離婚。有仔有女仍無減夜蒲癮，年頭先被人影到孖住南華主將陳七陳肇麒在灣仔偷約，之後又話於夜店搭上 ABC男伴 Brian，估唔到 Mia最新目標，是剛加盟南華踢中場的中英混血靚仔球員 Sean謝家強。
借篤波黐埋
上週三（ 8月 29日），肥監製錢國偉率領 Mia與春卷（李思捷女友王寶寶）等人，一齊踩去「南華 Pre-Season Party」撐場，當晚 Mia被肥監製拉攏與 Sean一齊影合照後， Mia已經對靚仔球星流口水。
Mia仔有計，更識利用現場道具，明明唔嗜篤波，忽然叫 Sean教佢打桌球，其間更借勢黐到 Sean實一實，女方超主動，熱血球王好難唔過電。
成功同 Sean打開話題， Mia唔執輸，再叫 Sean教佢篤波，借機親近。
Mia前年同郭秀雲乖仔龐錢景峰分手後，即搭上曾喺英國讀書嘅 Hayes，據知兩人喺蘭桂坊夜蒲時搭上，始終都係嗒蒲友。網上圖片
「唔介意做導遊」
篤完波後， Mia繼續同 Sean雞啄唔斷，雖然 Mia講英文並不流利，但現場見兩人傾到興起仲一齊攞起香檳隊番兩杯，鬼咁 sweet。
傾得投契， Mia臨走前亦主動跟 Sean交換電話抄定牌，之後 Sean更親自送 Mia上車，但由於 Mia唔捨得走，上車前亦忍唔住同 Sean連續兩次攬實 goodbye hug，癡纏到死。
週一（ 3日），本刊問 Mia辣着南華新球王，她即風騷咁話：「我唔排除同 Sean有發展機會，但佢咁靚仔肯定大把女仔追，所以嗰晚我都係同佢傾吓香港有乜好玩嘅地方。如果佢唔使練波，叫我帶佢去玩，我唔介意做佢導遊㗎！」或者可以叫 Sean拍埋《喜愛夜蒲 3》吖！
送出門口
經過 2粒鐘相交，離開位於灣仔 Tonno吧會場， Sean就親自送 Mia出去搭車，完全唔怕俾人偷影。
上車前， Mia忍唔住行上前同 Sean來個 goodbye hug， Sean好難拒絕嘅！
謝四 Vs陳七 同一案發現場
因掛住溝女，仲被人影到爆房兼食煙，今年 5月南華主席羅傑承公布同陳七解約。不過陳七腳法好，今年 7月就加盟大陸甲組球會廣東日之泉，早前舊老闆羅傑承仲專程上去廣州探班。
《蘋果日報》圖片
今年 2月， Mia同陳七陳肇麒去同一間 Tonno吧夜蒲時，一樣被記者影到，不過兩人當時就閃閃縮縮。網上圖片
Sean踢得玩得
現年 21歲的 Sean，中文名叫謝家強，爸爸是香港人，媽媽是愛爾蘭人， 12歲已加入英國曼城踢青年軍。今個暑假 Sean被南華招攬回港加盟，主力踢中場，仲幫佢起咗個朵叫「謝四」（着 4號球衣），打算用謝四取代陳七做新南華 icon。由於 Sean高大又靚仔，甚有女性緣，聽講老闆羅傑承仲會力捧佢，幫佢接廣告同電影，希望捧佢成為球壇偶像。
Sean（箭嘴）由 12歲開始一直效力曼城踢青年軍，今次來港加盟南華就升呢做甲組球王。網上圖片
雖然 Mia對靚仔 Sean有意，但原來 Sean喺英國已有個女友叫 Emma，如果 Mia上馬就會變成小三。網上圖片
肉女愛球星
同里奧費迪南網交 3年，最近娜姐仲喺微博大晒由費迪南送畀佢嘅自家出品 5號鴨嘴帽。網上圖片
除 Mia最叻球星，大師姐 Chrissie周秀娜一樣鍾意同球星暗交。前年 Chrissie就同曼聯球星里奧費迪南網交成好友，兩人唔只經常喺 Chrissie微博傳話， Chrissie更自爆 2人曾喺香港見面，搞到 Chrissie真命男友 Avis都呷醋。 
留言列表
{{ article.title }}
