已 34歲嘅 PSY，個樣騎呢，但勝在唔怕醜扮鬼扮馬冧到人笑， 𠵱家喺韓國超紅。
韓面
PSY 最緊要夠膠
韓國樂壇包容力大，有實力再加多啲 gimmick，就算樣唔多靚，一樣可以發圍。
好似今年 34歲嘅肥叔叔歌手 PSY（讀音：嘥），身形同樣貌似足北韓領袖金正恩，但勝在有才華，唔只唱得 rap得，最叻係跳得。上月推出跳舞歌〈江南 Style〉玩 hip hop，更自創騎呢馬舞，包保你睇到都會笑住跳埋一份， MV最近仲喺 YouTube大破 7千萬點擊，勁到連美國《時代雜誌》都專登介紹佢，搞 high全世界。
今年 34歲的 PSY（朴載相， PSY是英文名 Park Jae-Seng縮寫），其實已出道 12年， 𠵱家跟韓國男團班霸 BIGBANG同屬 YG Entertainment做同門師兄弟。 PSY雖然唔係靚仔，而且肥嘟嘟，但唱歌同跳舞都掂過碌蔗，最重要係肯醜化自己，鍾意扮鬼扮馬，氹到韓國人鬼咁開心。
7千萬點擊
膠歌王勁讚
莊冬昕
PSY唱歌同跳舞好有節奏感，好高興韓國有呢類惡搞歌手。好彩我首〈怪叔叔跳古怪舞〉出先，如果唔係就以為我抄歌！哈哈！（死要 sell埋自己首歌！）（真實對白）
跳馬舞笑到噴飯
PSY由 7月 15日發行大碟《 PSY 6甲》至今，唱片銷量高達 3萬張，加埋歌曲下載收入及多場演唱會，韓國傳媒估計 PSY於呢個夏天已勁賺約 2,700萬港元，真係發達啦！
於上月 PSY剛推出第 6張個人大碟《 PSY 6甲》，主打歌〈江南 Style〉 MV玩 hip hop， PSY唔只喪 rap，加埋佢自創嘅騎呢馬舞，個個睇過都笑到噴飯。由於隻馬舞超 hit， MV上載到 YouTube 1個多月，點擊率已超過 7千萬次。攻陷韓國本土， PSY仲打算於 9月將〈江南 Style〉改成日本版〈六本木 Style〉攻日，但近期日本同韓國正爆發獨島主權問題，到時唔知班日本人笑唔笑得落。
服兵役違規開騷
騎呢馬舞
PSY喺〈江南 Style〉 MV中，擺出騎馬姿勢，大跳騎呢馬舞。原來呢隻舞係 PSY喺一次慶功宴，見到舞蹈員跳覺得好得意，之後就將呢隻舞發揚光大。
泫雅都黐
PSY憑〈江南 Style〉紅爆韓國，最近即食住上，同 4MINUTE主將泫雅整多個 featuring版叫〈 Oppa is Just My Style〉， MV中泫雅仲黐到實同 PSY跳貼身舞。
勝利又學
身為 PSY同門歌手嘅 BIGBANG隊員勝利，亦自拍學 PSY跳馬舞片段放上網，同 PSY做宣傳之餘，亦順便幫自己曝吓光。
Justin Bieber經理人吼實
美國電視台頻道 VH1更邀請 PSY上節目《 Big Morning Buzz Live》做嘉賓，主持人更即場要求 PSY教佢跳馬舞，喺美國都紅到爆。
PSY唔只喺韓國人氣勁到爆燈，仲紅到過美國，最近佢首〈江南 Style〉唔只打低 Justin Bieber嘅〈 As Long As You Love Me〉登上美國 iTunes MV榜 no.1，連美國《時代雜誌》網頁都專程介紹佢。而最近佢仲自爆話 Justin Bieber經理人 Scooter Braun都想搵佢同 Justin合作。 PSY唱得跳得，仲好吹得喎！
老外都 like
唔少睇過〈江南 Style〉 MV嘅外國人，都用英文留言讚佢跳舞好得意，仲好有自己風格。
PSY嘅〈江南 Style〉喺韓國造成社會現象，唔怪得連美國《時代雜誌》網絡版都大字標題介紹佢。
留言列表
{{ article.title }}
