第 3集女機械人 Aigis都會客串出場，周身槍，勁過 Ironman。

漫遊毒物

Persona 4U腐女格格

2012年08月15日 ~~ 第273期 Face

《 Persona 4》，一隻 4年前 PS2末期 RPG，今年突然又動畫化、又出 PSV移植版，年頭仲出埋街機格鬥，連宅男最後主場「機鋪」都被腐女佔領！究竟發生乜事？原來全因日本腐女（特指喜歡男同性戀漫畫嘅宅女）睇起遊戲中一眾男角，於是周邊吸水商品愈出愈多。笑人變態？你班港女咪一樣用奧運男選手 fb洗版！
呢隻街機格鬥《 P4 Ultimate》，今個星期仲推出埋家用版，方便腐女宅喺屋企，用班男角慢慢「格劍」！

腐女出超必

動畫改篇成 3D多邊形格鬥，班動畫迷一定唔受，所以《 P4U》係由風格華麗誇張嘅《 Guilty Gear》班底 Arc System負責，高清 2D動畫角色動作流暢，加埋原裝星級配音， fans單係聽出招聲已經爽歪歪！
新手亦唔怕玩唔掂，原來遊戲專登「低 B化」，女士只需利用「連按 Combo」系統，狂篤輕攻擊掣，就可輕鬆使出極盡花巧誇張連續技，對付電腦綽綽有餘，加上你已經玩緊 PS3/360，冇人挑你機，呢招一定夠畀格鬥初哥打爆機。

高手依然可以連 chok幾 10 hits連續技，而入門者只需用「連按 Combo」已可出連技。

打法基本上係《 GG》派，有好多空中連續技。

內有貼心教學模式，由向前行開始慢慢教你打。

PS3故事加長版

《 P4U》計算精準，推出時日本遊戲機中心忽然多咗女仔，筆者更曾目睹一個女生，企定定睇人打足幾個鐘！而唔夠人打嘅女仔，家陣終於可以買返屋企慢慢打。家用版更收錄超大型 story mode，以 AVG+格鬥形式詳細演繹故事，全部玩晒要用上差不多 30小時，難怪日本一出就賣過 10萬隻，連《拳皇 13》都行埋一邊！

男主角鳴上悠， cool爆型男，能使用最強 Persona伊邪那岐（上圖）。

AVG全語音對白，聲優迷開心死。

淨係 story mode已等同一般 AVG遊戲分量。

最潮最腐

《 Persona》其實整個系列好有內涵，佢源自日本最重口味原創 RPG《女神轉生》，滲入校園生活、推理故事、美男美女等動漫元素，每集有口碑。由《 P3》開始更飛起《女神》御用人設金子一馬，換上更懂得宅男腐女口味嘅新晉畫家野島城己，加上強勁聲優陣配音，立即吸納大量捧場客，唔係一味靠「腐」食糊。

《 P4》動畫人氣急升，原因正係充斥大量腐要素。咪以為係色情呀，單係呢類男角互望臉紅紅場面，已令班純真女生睇到好亢奮。

新人作曲家目黑將司將 Hip-Hop元素加入配樂，兩集原聲大碟都大破十萬張銷量。

各廠商爭住出 figure畀腐女收藏，隻隻都 7、 8千 yen，貴過隻 game！

手掣廠 Hori乘勢推出《 P4U》大掣，設計有型有款。（市價約$1,000）