漫遊毒物

STREET FIGHTER 25th ANNIVERSARY　神級玩家挑出香港

2012年08月15日 ~~ 第273期 Face

平時成日講嘅挑機、屈機、跟機、 chok乜 chok物，其實都沿自街機格鬥遊戲文化。不過時移勢易，格鬥遊戲只剩《 Street Fighter街頭霸王》獨領風騷，但卻又愈戰愈勇，今年《街霸》 25周年，仲好似奧運咁搞全球大賽，我哋香港都有代表參賽，冇理由唔打打氣！
今期搵嚟曾征戰美國、日本等地，挑盡全球猛人嘅名玩家 HumanBomb，講吓街霸經，再試 25周年版紀念巨棍 joystick，話你知香港都有有 heart有技術嘅格鬥 Pro Gamer！

HumanBomb profile

街霸年資： 10多年
使用角色：春日野櫻
參賽經驗： EVO 2012第五名、 2012日本鬥劇決賽第一回

HumanBomb推介三大街霸戰

海外級街霸賽事

街霸 25周年全球賽
剛完成香港預選，選出 5名玩家參戰《街霸 IV》及《街霸 Vs鐵拳》賽事。佢哋會喺 8月 26日去台灣參加亞洲區決賽，冠軍可參加 12月喺美國舉行嘅決賽賺 25,000美金，成 20萬港紙！（已不接受報名）

美國 Evolution Championship
一年一度美國舉行嘅格鬥遊戲大賽，雲集中美日韓玩家，報名費為 70美金，但去美國嘅旅費就唔係人人負擔得到。（ http://evolutionchampionship.com）

日本鬥劇 Super Battle Opera
日本年度最大型格鬥遊戲比賽，一個唔出名嘅玩家技術都十分高超。近年都有唔少香港玩家挑戰， HumanBomb同另外兩名玩家成功通過預選，可惜決賽初回戰遭淘汰。（ http://www.tougeki.com）

職業比賽點燃戰火

80後嘅 HumanBomb，喺《街霸 II》熱潮時年紀仲細， 4年前《街霸 IV》再次點燃全球格鬥 fans熱情，美日等地比賽愈搞愈有規模，多咗唔同國家嘅人參加，有獎金仲有網上直播，儼如奧運熱鬧。當時佢全家移民澳洲，從此迷上：「佢角色能力平衡好好，各人打法分別大，比較有個性。當時澳洲個個星期都有人搞比賽，多機會同高手切磋，打贏咗認受性又高好多，所以愈打愈投入。」

HumanBomb喺國際 game壇都有一定名氣，同日、美出名嘅街霸玩家都有交流。圖左係知名美籍春麗高手 Justin Wong。

剛剛喺 8月飛咗去日本參加最大型比賽「鬥劇」，同其他兩位香港玩家一齊組隊出戰。

貼錢出征為鍛煉

去年尾， HumanBomb全家回流香港：「香港都有好多勁人，但始終組織唔起有規模嘅比賽，冇乜機會鍛煉更高技術。有時落機鋪玩，都冇人敢挑機。所以先決定去外國打比賽。」節衣縮食，佢終於喺 6月儲到 3000美金，飛去美國打「 EVO大賽 2012」，仲勇奪第五名。佢回憶：「現時日本玩家最勁，佢哋好有心機去鑽研新技術。有啲招數喺香港、澳洲出得到就無敵手，但去到外國打先知人外有人，每場比賽都學到嘢！」
香港近排都有 25周年《街霸 IV》比賽， HumanBomb已出線，但佢表示會繼續遠征：「香港廠家冇新 game出就唔會投資，玩家要畀參賽費夾錢打，始終令人卻步，咁樣好難有進步。」有人喜歡買物，有人儲錢去外國追星，而 HumanBomb就專於格鬥遊戲，不惜儲錢去外國參戰，呢份「求道心」簡直同《街霸》主角阿隆一樣，型！

香港人最熟悉嘅日本神玩家梅原大吾，佢得到手掣廠 Mad Catz贊助全職打比賽， HumanBomb話美國 EVO冠軍都有 10,000美金，確係一門生意。

HumanBomb最光輝戰績係喺美國 EVO擊倒韓國頂級高手 Poongko取得第五名，去 Wiki search「 EVO Championship」都搵到 HumanBomb大名。

夠穩夠型 Hori Fighting Stick Edge

如果你都想畀心機練技術，一支高質大掣 Joystick唔少得。最近 Hori乘住街霸 25周年，推出型仔大掣 Fighting Stick Edge， HumanBomb試過就讚支大掣夠穩、好 chok。「打比賽都係放喺大腿打，要有番一定重量， chok技先唔會郁來郁去。另外佢嘅按鈕 Hori研發嘅新配件，打落好有街機手感，喺屋企練招，更容易喺街機做番出嚟。」

呢支棍改用輕觸屏代替 start、 select掣，開戰時仲可以 disable，包唔會打打吓誤碰而停機。

有線式設計，即插即用唔使 set，但有空間藏線，方便又好睇。

Hori Fighting Stick Edge

對應機種： PS3/XBox360
售價：＄ 1,980
查詢：電氣良品

街霸 25周年紀念版
boxset內容

A《 Street Fighter× Tekken》遊戲
B《 Super Street Fighter IV》遊戲
C 64頁 ArtBook插畫集
D紀綠片 Blu-ray兩隻
E 11碟裝原聲大碟
F阿隆風林火山腰帶
G阿隆升龍拳 figure
售價， 149.99美元 Amazon接受預訂

街霸 25周年網站都好多嘢玩，呢個 map可以加自己位置同打開邊款街霸，原來有位仁兄喺南極都打緊喎！ http://www.streetfighter25.comCAPCOM

絕對鼓勵二次創作，鼓勵 fans自己投稿填寫街霸歷史，呢位仁兄就畫咗芝麻街版街霸。

奴 Comment

我自己唔多打《街霸》，但當年讀書時，聽草蜢、睇公仔書、睇劇都會見到《街霸》影子，所以 80後童年回憶一定有佢份。早幾年《街霸 IV》推出都有約埋成班朋友一齊打，但機鋪已經冇以前咁熱鬧，上網打雖然方便，但始終冇咁好 feel，所以好支持 25周年搞多啲比賽，亦好 respect呢位越洋挑戰嘅朋友好熱血！

25周年唔出新 game
搵 fans講故

可能大家都會期待街霸 25周年出新 game，不過格鬥 game要長時間製作，所以 CAPCOM情願同鐵拳 crossover都唔出《街霸 V》住。冇新 game不過都有大量精品，內藏 11CD、 2BD、 2隻 game嘅 15碟珍藏 boxset已經開始訂購。另外官網仲學 facebook整咗個街霸 Timeline，等 fans自己 up圖 up片 edit街霸 25年歴史，唔使下下都係睇舊 game回顧咁悶吖。

老 fans回顧當年街霸情
街霸漫畫編劇李中興老師

畫咗咁多年街霸漫畫嘅李中興老師，一講起街霸就好大感觸。「最懷念都係《街霸 2》，當年真係全城狂熱，有 4大天王嘅 12人版更係經典。之後幾代都好玩，但角色真係突破唔到，阿隆阿 Ken太有主角相，試過換角都行唔通。」又講吓漫畫，李 sir就覺得再畫街霸改編漫畫唔可以用連載，要諗好晒批好晒，出精裝版先有得諗。「日本嗰邊審批好嚴，例如阿隆一定要赤腳唔可以着鞋，每星期度好晒橋但日本唔收貨，會好大壓力。」

漫畫作家中興最 like《街霸 2》（ 1991年），佢同許景琛合作改篇嘅《街霸 2》漫畫版，係香港經典作。