美食博覽 2010 Best Pick 天書　香港代表：嘩嘩嘩！巨菇駕到 @ 娛樂八掛大放送★

幾年前，美食博覽係精打細算師奶掃平貨的好地方，不過我可以話你知，如果今年再去美食博覽掃超市都買得到的糧油雜貨，計埋車錢、入場費、腳骨力，根本冇着數。
今年美食博覽以精品居多，買一啲平時少見、難買到的特色食品，先不枉同人逼餐死。除咗本地參展商有筍貨外，台灣同日本都有大量坊間少見的精品出售，今次我哋一次過掃晒番嚟，請嚟台妹同日模為讀者先試食及評分。

有機珍寶蘑菇
菇食得多，不過成塊面咁大嘅真係未見過！唔好以為係用化學嘢夾硬谷大，呢隻珍寶菇係由專種有機菇的公司種植，冇化學嘢，菇味極濃。如果將它裝在紙袋中存放，一打開就會散發極濃菇味。食法好簡單，只需切片，落鑊兜兩兜，再加水同鹽蓋上鑊蓋焗至軟身即可。買回家可於雪櫃保存4-5天。
澳登有機珍寶蘑菇 $1，每日限量100隻，原價$69.9

攤位：1B-A21
香港澳登

美女試食兵團
（左）日本辣模　松岡李那（Linah）
和椋名凜一樣，由王友良在日本簽回來的純正日本妹，16歲起做model，之前仲喺酒廊賣過唱，家住東京，屋企有支鋼管用來練鋼管舞。對於日本美食有研究之外，仲乜都夠膽放入口！
演出經驗：2010蘭桂坊啤酒節代言人（香港）
（右）台灣正妹　宋紀妍（Cindy）
有1/8荷蘭血統，台灣廣告寵兒，出道至今已在台灣拍了11個廣告，去年開始殺入香港。雖然身材纖瘦，但Cindy話最鍾意去小吃攤掃街，對地道台式美食極有心得。
演出經驗：維他檸檬茶廣告（香港）、麥當勞、OLAY廣告（台灣）、我的排隊情人（台劇）

油浸有機蘑菇
新鮮菇之中，以白蘑菇最滑最甜，不過好易變壞，唔係咁易買到靚貨。原來香港已有人種白蘑菇，而且仲係有機種植，新鮮之餘仲食得安心。店家仲將佢原粒加入橄欖油同鹽，整成上海傳統小吃「油浸蘑菇」。這種整法令蘑菇又嫩又滑，原本是上海有錢人家太太小姐的小吃，而且多吃也不會變肥。這樽油浸有機蘑菇不單鹹香，仲保留了白菇的厚滑質感，抵俾十個好吃！
「菇皇」油浸有機蘑菇 $69.9

攤位：1B-A21
香港澳登

即食大鮑魚
鮑魚年年有，今年特別大！調好味的湯鮑一般只有尾指咁長，唔多夠喉，鴻星酒家就推出成隻手掌咁大的即食鮑魚，相信係全港最巨型，可以用刀叉鋸扒咁鋸，夠過癮。最難得係大隻得來竟然極度腍滑，鮮味仲濃過小型湯鮑多多聲，Linah開心到成隻食晒！
即食大鮑魚$300/盒，原價$500/盒

攤位：1CE08、10、12、12A
鴻星

鮑魚撈麵
鴻星仲出埋鮑魚撈麵，一包有兩個蝦子麵餅、鮑汁同6隻即食鮑魚，煮好個麵撈埋鮑汁同鮑魚就食得。雖然鮑魚唔算大隻，但飽肚感十足，計落一碗都唔使$40，抵！
鮑魚撈麵$78，原價$108

攤位：1CE08、10、12、12A
鴻星

大芝野羅漢果糖菊花茶
羅漢果經阿蘇喺節目中大讚後隨即大熱，依家仲有樽裝的羅漢果飲品。平時飲羅漢果水都係用乾羅漢果煲，呢支菊花茶就用新鮮的羅漢果提煉出來的羅漢果甜素，比一般的羅漢果水少了朕苦澀味。最正嘅係零卡路里，最啱減肥男女。
大芝野羅漢果糖菊花茶/靈芝茶，各$5

攤位：3F-F07
GRACE CUP

三文魚XO醬
Jacky Yu出品，XO醬食得多，今次加入咗三文魚同用上芥花籽油，更加健康。而且三文魚落得夠豪，成樽都見到三文魚碎，最啱魚癡。
三文魚XO醬，
$80，原價$108

攤位：1D-D17
囍宴

手搓綠茶流沙芝麻湯圓
中秋就到，又係食湯圓時候，名廚Jacky Yu在美食博覽推出自家品牌湯圓，粒粒都係人手搓成，因此賣相可能冇咁滑溜，但勝在手搓皮先夠薄，當中的綠茶皮更可以中和芝麻餡的甜膩。
手搓綠茶流沙芝麻湯圓，$25，原價$30

攤位：1D-D17
囍宴

Cindy：我們台灣人也常吃湯圓，不過就沒有綠茶皮的，這個湯圓顏色吸引，而且皮真的好薄，一入口餡料就流出來，很滿足！

茶香老抽、陳皮生抽
香港人諗頭真多，連茶味老抽同陳皮味生抽都有！茶味老抽加入咗普洱同綠茶，茶香都幾濃，最適合做茶香雞。而陳皮生抽最好就係用來辟腥，點海鮮同配涼菜都得。
茶香老抽、陳皮生抽$10/支

攤位：1E-C02
李錦記

即食鮑魚撈米
當你行到攰攰哋，我強力建議去食番個鮑魚撈米醫肚。有師傅即場煮，一盒包括米粉、2隻靚花菇、台式肉燥同埋兩隻即食湯鮑，濃味的台式肉燥撈埋湯鮑同米粉超夾，仲令鮑魚更加惹味！呢個撈米係場內限定，今次唔試就冇o架啦！
即食鮑魚撈米 $28

攤位：1B-E16、1B-E14、1C-A15、1C-A13
安記

日本代表：開大！
年年美食節都有不少日本食品，今年仲特別多，而且主打罕有矜貴食材，其中急凍海產更全屬坊間少見的加大碼，絕對係超值之選，連我呢個資深美食博覽擁躉都覺得筍到極！大家唔使擔心急凍食物好難拎，展商會提供保冷袋，再教你一個偏方：用幾層報紙包住急凍食物再放入保冷袋，保凍效果更加好！

8cm帶子刺身
當我同同事講，帶子刺身有8cm長時，佢哋都唔信，以為係連埋裙邊。呢種生長在北海道根室海峽的帶子，最大有8cm，一公斤只有16至20隻，屬於帶子中最大的，而且得到北海道漁協認證是生食的優等品質，解凍後可直接生食，一點腥味都冇。雖然佢肉厚，但入口即化，完全冇渣，即使平時對刺身抗拒的人都會話正！
2L特特大日本帶子刺身，$260/盒（1公斤）

攤位：1C-B28
日本皇帝蟹專門店

北海道牛奶甜品
北海道以牛奶聞名，在當地食過用乳製品整成的甜品，全部都勁好食，可惜帶唔到返香港。今次美食博覽引入咗北海道急凍甜品，當中北海道朱古力撻簡直等同有撻皮的心太軟，食前用微波爐叮2分鐘，裏面的朱古力就會融化，朱古力味非常濃郁。另一推介係北海道牛乳忌廉泡芙，用北海道原產低溫殺菌牛乳，奶香濃郁，可以凍食，不過我推薦放入微波爐叮30秒，個心軟咗更好食，連化妝師都大讚！

攤位：1C-C14
新大和

巨人版牡丹蝦
一公斤只有20至24隻，每隻有成隻手掌咁長，肉質異常彈牙，甘甜到不得了，平時要喺高級刺身店先食到，今次買一盒返去慢慢歎，計落每隻都係10蚊左右。不過呢種批發裝係連殼嘅，食時要自己剝殼。
加大碼牡丹蝦，$250/盒（1公斤），原價$375/盒（限量50盒）

攤位：1B-E13
新華食品速遞

新寵皇帝蟹
舊年松葉蟹係美食博覽的風頭躉，但今年已經out咗，取而代之係肉更多、食法更加多樣化的皇帝蟹。大過Linah心口的皇帝蟹，冇3至4人根本拎唔晒，但價錢只需$300！相對平時喺日式超市要$600-700平一半有多。今次特價發售的皇帝蟹，產於太平洋無污染深海區域，蟹肉鮮甜之餘，更有濃濃海水味，解凍後不需加任何調味料，已極鮮味。
特大皇帝蟹，每隻1.8-2kg，$300/隻，$580/兩隻

攤位：1C-B28
日鮮皇帝蟹專門店

（右）Cindy
（左）Linah：呢隻皇帝蟹勁好肉，係上等貨色。雖然係整熟咗再急凍，不過好似呢種咁大嘅蟹可能仲未熟晒，最好用熱水灼下佢，或者將佢啲腳切成一段段再鹽燒，仲香口呀！

柚子清酒
柚子蜜飲得多，柚子清酒都係第一次飲。代理商話日本的柚子清酒多數用柚皮或柚子糖漿整成，柚子味淡而寡，但呢隻今年3月新推出的柚子清酒，由老牌酒廠白鶴出品，用上整個新鮮日本柚子造成，完全冇加人工味道。記者試飲，味道果然超清新，好似飲緊加酒的柚子蜜一樣，忍唔住一杯接一杯！
白鶴柚子清酒，$80

攤位：1D-C18
香港南信

柚子清酒近幾年喺日本好興，好啱女仔飲，估唔到香港都有，仲係老牌酒廠白鶴出嘅！最好先雪凍或者加冰，配濃味食物如串燒、燒雞等！

青森大蒜
黑麻麻的大蒜，連日本妹Linah都話未見過，仲以為係爛嘅，嚇到呆一呆。其實佢係青森縣名物，經過獨特工藝發酵、成熟，帶有微微的酸味及水果甜味，營養成分比一般大蒜更高。食時剝去蒜皮，每日食1至2瓣即可，也可拌入沙律食。但盡量唔好爆炒，以免破壞當中的有益成分。
青森縣奧入瀨黑大蒜，$50

攤位：1B-E13
新華食品速遞

生清酒
啤酒有生啤，清酒都有生清酒！同生啤一樣，生清酒都沒有經過高溫消毒程序，因此口味特別清爽，但保存期限好短，一開就要立即飲。代理商話飲前可將成支生清酒放入冰格，愈凍愈好飲。
日本生清酒，$20

攤位：1D-C18
香港南信

沖繩墨魚汁撈飯
世界盃輸波又想向八爪魚或類似生物洩憤，大可選擇這款撈飯用的墨魚汁。選用沖繩伊江島的大墨魚，收集新鮮墨魚汁後再加入墨魚肉粒及日本醬油製成，墨魚味不算太濃，適合初吃墨魚汁飯的人。如果嫌用它來撈飯太激，可改為撈意粉，較易入口。記住一包要撈三碗飯，否則就會過鹹！
沖繩煮飯用墨魚汁，$42

攤位：3G-C10
樂天然

激抵日本福袋
呢個超值福袋總值$1,431，依家只賣$498，必搶！內容包括：
1 北海道幻之蟹（熟）約900g一隻
2 北海道帶子刺身一盒
3 日本福井油甘魚刺身（約800g）一條
4 泰國軟殼蝦（500g）一盒
5 北海道真鱈魚爽一盒

攤位：1B-25、B27
優質堂

台灣代表：美食手信集中地
老實講，台灣除咗食物之外，真係冇嘢好買，所以次次遊台買回來的手信都是食品。不過以後唔使拎得咁辛苦，因為香港已經有不少代理引入台灣食品，今次美食博覽更有好多新貨湧現！

吃的化妝品——海燕窩
海燕窩其實係一種珊瑚狀的海草，低卡路里之餘含有大量膠原蛋白，有「吃的化妝品」之稱；佢仲含有大量水溶纖維，對心血管好有益。台灣人好興將佢同黑糖及其他材料整成糖磚，每次只需用350毫升水煮溶，倒入模內雪凍就食得。
檸檬綠茶黑糖海燕窩，$98

攤位：3F-F18
健日國際

我雖然係台灣人，也沒有聽過海燕窩呢！唔……這個海燕窩比愛玉硬身一點，不過一樣好滑，不太甜之餘還有淡淡檸檬味，很不錯。

牛蒡蟲草黑糖茶
曾有朋友去台灣旅行買回強力薑母茶，薑味比一般薑母茶濃逾10倍，裏面更有完整薑塊，飲完全身暖晒！美食博覽已有代理引入這種薑母茶糖磚，仲有其他唔辣的口味，最新就有牛蒡蟲草黑糖茶，以台灣產牛蒡、冬蟲夏草、枸杞、紅棗、純黑糖、砂糖手工製成，可改善胃氣脹同增強體質，用時只需以一磚沖500毫升熱水（約兩杯）就可以，好方便。
牛蒡蟲草黑糖茶，$98

攤位：3F-F18
健日國際

凍食煨番薯
煨番薯食得多，凍的煨番薯係第一次食。用台中的小型番薯製成，煨完後即刻急凍保鮮，可以凍食。代理商話包甜，唔甜可以回水！我拆晒咁多隻來試，真係全部都甜，亦比本地番薯軟糯，絕對冇筋冇渣。如果接受唔到凍番薯，可放入微波爐或焗爐翻熱再食。
凍食煨番薯，$10

攤位：1E23-28
新台場

水果箱軟糖
單睇個樣已經可愛到不得了，一個個手板大小的紙皮箱扮晒台灣宅配（即速遞）水果，剪開封箱膠帶先可以打開，玩味十足。最搞鬼的是口味以台灣土產水果劃分，包括：關廟鳳梨、大湖草莓、拉拉山水蜜桃、大村葡萄、搭棚聖蜜（車厘茄）、七股哈蜜瓜、大樹玉荷苞（荔枝）、玉井芒果等8款口味，每款都加入果汁製成，絕對唔係得個樣！
宜農台灣水果箱軟糖，$20/盒

攤位：1D-D24
晶晶科確

Cindy
呢個糖在台灣超流行，在便利店也有得賣耶！但味道就沒有賣相這樣優啦！因為上面灑了細砂糖，有點硬硬的，不過樣子真的很可愛。

台式麻米署雪糕
台灣的雪糕同日本貨一樣咁精緻，價錢仲平好多。好似呢個日月燒，用蛋糕皮包住口感QQ的麻糬同紅豆雪糕，簡直同日式和菓子一樣咁精美。建議先放軟一點才吃，否則雪硬的麻糬好易咬崩牙！
日月燒，$15（憑場刊上的優惠劵買一送一）

攤位：1E23-28
新台場

三者的味道很相配，尤其是麻米署和雪糕都是軟軟滑滑，不會太甜，口感超好！

義美朱古力蛋糕
曾經一度，義美蜂蜜蛋糕係台灣手信首選，依家最hit應該係呢款布朗尼朱古力蛋糕。它用上巴西黑朱古力，可可味濃得化不開。由於要放入雪櫃保鮮，吃時最好放入微波爐正常火力叮15秒，令蛋糕中的朱古力微微融化，成個廚房都會飄滿朱古力味，未食已經心醉。
義美布朗尼朱古力蛋糕，$85（憑場刊優惠劵減$5）

攤位：1E23-28
新台場

無蔗糖全麥餅
怕肥的人有福了，這種台灣餅乾用上代糖「麥芽糖醇」製造，卡路里比一般曲奇低一半，但由於加入了葡萄乾、蜜漬桔皮同蔓越莓乾，味道一啲都唔寡。
無蔗糖黃金全麥餅，$40/2盒，原價$28/盒

攤位：1C-B14
Cougar HK

醇厚杏仁茶
台灣很流行杏仁食物，很多地方都可以飲到杏仁茶。今次美食博覽就引入了原支杏仁茶，由杏仁和米磨成粉再熬煮而成，充滿醇厚芳香的杏仁味，質地也較稀，不像杏霜一味死甜，飲完成身都覺得好滋潤。仲有必買的是體育公園杏仁豆腐冰，有多種口味，記者強力推薦紅豆味，紅豆蓉煮得夠爛，跟杏仁豆腐是絕配！
杏仁茶、體育公園杏仁豆腐冰，$40任揀3件

攤位：1B-D07
華記永昌號

這支杏仁茶的的杏仁味很醇，在台灣來說就不算最濃的了。豆腐冰也有耶？這是台南著名的伴手禮（手信）呢！

度小月麵食
台式麵食牌子眾多，但講到正宗，都係度小月。美食博覽就有度小月出的關廟麵和刀削麵，前者屬於台南傳統麵食，麵條打好後天然日曬弄乾，即使久煮也不易爛兼香滑爽口，仲可以涼拌吃。後者就加入了關廟麵的日曬方法，令它比一般的刀削麵更Q更彈牙。
台灣關廟麵 $22
（原價$26）

攤位：1D-B23
通泰行

松花溏心皮蛋
平時吃皮蛋，十隻都冇一隻溏心，廿隻都冇一隻松花。不過呢款皮蛋號稱有95%可達到松花、溏心兼備，味道不遜於鏞記，仲包保不含鉛咁話。
度小月松花溏心皮蛋，$35/半打

攤位：1D-B23
通泰行

大注目有機養生系列
自從前國務院副總理吳儀在08年宣布，把養生納入國家醫療體系，養生產品立即大受注目。今年美食博覽展場更開闢咗一個健康、有機及綠色食品區，等我哋同你執啲養生靚貨喇！

鹿尾羓湯包
唔少人去美食博覽都會掃湯包，但今年記住揀啲坊間少見的。呢種鹿尾羓湯包就夠特別又滋補，可以壯腰補腎、去濕解毒，材料有新西蘭鹿尾羓、土茯苓、杞子、圓肉、淮山、陳皮，非常足料，瘦肉都唔使加，煲出來超濃郁，仲有大量湯渣可以食。如果你工作繁忙，可選擇鹿尾羓花果茶，味道清香，焗一焗熱水就飲得，方便！
新西蘭鹿尾羓連土茯苓湯包 $180，原價$200
新西蘭鹿尾羓花果茶 $100，原價$120

攤位：3FG 恆興行

Linah
中國湯原來係咁o架？日本人食鹿肉，但冇人食鹿尾羓，又幾好飲喎！

有機黑木耳
木耳可以通血管降膽固醇，愈來愈hit！不過市面的木耳絕少有機種植，今次就俾我在美食博覽搵到，係台灣出品，更加放心。這款木耳大隻兼爽脆，用來整雲耳木耳蒸雞最好。
豐年農場有機黑木耳 $39

攤位：3F-F04喜筷

清酒護膚品
清酒釀造廠的工人，手部特別嫩滑，原因係清酒的原料對皮膚有護理作用。日本清酒廠就趁機推出用清酒原料製成的護膚品，一個travel set有齊卸妝乳、潔面乳、化妝水、保濕乳液，主打天然補濕。成個set以用大米及米糠製成的潔面乳最正，洗得乾淨仲極水潤！
白鶴HAKUTSURU米粕美人旅行裝 $120
（憑場刊優惠券有9折）

攤位：1D-C18香港南信

無糖即沖燕麥
之前有報道話即沖燕麥好多都糖分超標，呢隻新加坡製造的即沖燕麥就冇呢個問題，因為佢完全冇糖，仲加入亞麻籽、葡萄籽，對心血管有更強保護。而且佢裏面的水溶性纖維多於非水溶性纖維，特別容易被人體吸收，坊間少有。
寶鮮然三益粥 $120/盒（12包）

攤位：3F-F05 SCML Trading

茶籽環保洗碗液
用茶籽粉洗碗環保又不易殘留化學物，不過很易阻塞水管。依家有本港廠家將天然茶籽內的植物皂素提煉成洗碗液，就不會塞水管，令你吃得環保也洗得環保。
Earth茶籽粉天然清潔液 $60/500ml

攤位：3F-F04喜筷

有機豆漿
現成的有機豆漿，美食博覽$8就有一支，完全冇加防腐劑，建議即買即飲，仲有千祈唔好搖，否則會結成一嚿嚿。
饗有機公平貿易豆漿 $8/250ml

攤位：3F-F04喜筷

鑲金月餅大熱
美食博覽年年都係月餅商兵家必爭之地，不過今年略現疲態，只得3家有創新口味推出，即刻去睇睇！

冰爆金箔月餅
和記隆以龍鬚糖月餅出名，今年都係以佢為主打，但就加上金箔增添貴氣。一盒7個月餅餡料都係花生砂糖，不過龍鬚部分就係橙、提子等果汁味，另外附送一包金箔，食時先灑上去。雖然金箔完全冇味，不過賣相就非常夢幻，淨係食個樣都抵啦！
冰爆金箔珍珠月 $88/一盒八個，原價$268

攤位：1E-D06和記隆

Linah：好浪漫！
Cindy：等我食晒啲金箔！

白兔月餅
冰皮月餅總係圓形白雪雪，呢隻兔仔造型就較醒神，裏面個餡都唔差，分別有「流心日本柚子」同「流心日本白桃」兩種口味，果味好天然，可惜雪凍了唔流心，放軟了有流心但個餅冇咁好食，兩難啊！
東海堂玲瓏玉兔冰皮月餅 $135/盒（10個）

攤位：1C-D02 美心集團

港式奶醬多月餅
月餅龍頭美心今年又有新搞作，主打港式口味，包括「奶醬多」、「可樂」、「凍檸茶」同「凍鴛鴦」冰皮月餅。老實講，味道像真度只有五、六成，不過夠搞鬼。特別推薦「奶醬多」味，主餡係一嚿滑滑花生醬，令人回味。
美心冰皮二人世界 $70/3包（每包2個）

攤位：1C-D02 美心集團

美食博覽實用攻略
必拎優惠券小冊子
年年入場都會有場刊（圖）同地圖在各展館前面派發，份場刊多數有不少優惠券，今年不少展商都放聲氣話一定要見到優惠券先俾優惠，因此一定要拎！

新設超特價夜市
今年除咗展期的最後一天外，其餘日子每晚7-10點都會於Hall 3舉行「夜間特賣場」，有80個展商會提供半價或以上優惠。不過好多展商都話，日場已有特價，夜場唔會再平得去邊，而且不少半價貨都會限量發售，計我話就冇必要特登去夜場。不過，如果你都想去「發掘」下，以下係比較超值的貨品：
德國孖人國際廚刀7件套裝　原價$1,399　夜市價$399
海天堂正宗龜苓膏4個+茯苓膏2個（套裝）　原價$180　夜市價$90
新西蘭1,000mg 蜂皇漿（365粒裝）　原價$816　夜市價$408
位元堂鮑汁螺片　原價$88　夜市價$40
東方紅冰糖燕窩 30ml　原價$29　夜市價$9

Call定貨Van
絕對係個人經驗，行完博覽最痛苦係拎住戰利品行去灣仔港鐵站搭車。如果你有幾個朋友一齊掃貨的話，建議call定架貨van喺新翼正門等，離開展場3分鐘就可以落到去，而且4個姊妹一人一架手推車再加十個環保袋都裝得晒！可以事先打去雞記、東方、便利等格價，去將軍澳最平$151，4個人share都係$37.8咋！

美食博覽2010
日期及時間：8月12-15日10am-10pm，8月16日10am-6pm
（展覽會於每日完場前45分鐘停止讓參觀者入場）
地點：灣仔會議展覽中心
門票：$25（大小同價，3歲以下及65歲以上人士免費入場。即日起於7-11、OK便利店及會展有售）

（左）Linah：好滑好正！
（右）Cindy：從未見過咁大隻菇！