潮𡃁便當

希慎廣場最新食店攻略

2012年08月15日 ~~ 第273期 Face

大家引頸以待的希慎廣場，終於隆重登場啦！
睇完《 Ketchup》的商場大解構，寫好張大出血清單，係時候去「搵食」啦！
成個商場有 30間食肆，唔少仲係首次登陸香港。
但大部分餐廳仍然趕工中，不過我哋揀咗幾間準備最充足的新食店，率先同大家見面。

Check！
電子飛免呆等

商場搞搞新意思，特別引入中央電子餐廳訂座系統，大家可以於 2樓的 counter揀定想食邊間餐廳，㩒張飛仔排隊，之後就可以一路行街、一路留意各樓層的電子告示牌，唔使喺餐廳面前企定定，擔天望地。

日本型格 cafe
首度登陸　潮食新式日本菜

喺日本開業接近 11年的 WIRED CAFE，有 28間分店，首次開設海外分店，用上日本人喜愛的 50-60年代美國西岸特色設計。
菜式同日本 menu一樣，有 3-4成食材都是由日本空運到港。
餐廳一向都主打新潮日本菜，將日本不同地方的傳統菜式加以改良，變得更 light更適合女仔，好似涼食的薄餅，將沙律菜放到自家烘製的薄餅上，係日本店的招牌菜式。

厚吐司、沙律、湯$73
日本人傳統住家小食，用自家製厚麵包取代薄餅底，面層是茄汁同芝士，好滿足。

沖繩塔可飯$83
源自日本沖繩的日式蓋飯配合墨西哥 Taco醬，再配上自家調製的蛋黃醬同車打芝士，全部撈起嚟好似沙律咁食，是店中的招牌創作食物之一。

小澤孝一郎
Food designer

小澤先生負責為日本和香港的菜式拍板，今次他只帶來了東京 cafe一半數量的菜式，希望遲些可以創作出香港獨有的招牌菜。

WIRED CAFE

營業時間： 11am-12mn
電話： 2331 8315
地址：銅鑼灣希慎廣場 14樓

圖為 WIRED CAFE在日本涉谷的分店，設計全以深色木為主打。

法國直送到港
牛角酥

麵包店屬美心集團的又一新作，主打歐陸風味麵包，每日三次時段出爐， 8am、 12nn同 6pm-9pm。
當中法國製的牛角酥是必試之選，原個牛角酥麵糰在法國製成後空運到港！

皇牌法國牛角酥各$12
全店有 4款不同口味的牛角酥，有原味、芝士、杏仁同朱古力味，原味的牛油成分最高，有成 28%， size亦會比較細。

芝士烤小法包各$12

王國標師傅

我推介芝士烤小法包為必食之選，因為日本芝士醬幼滑香口，市面少見。

Urban Cakes.Bread.Salad

營業時間： 8:30am-9:30pm
電話： 2795 3168
地址：希慎廣場地庫 2樓 Jasons• Food& Living Food Hall

米芝蓮推介拉麵
首度登陸　獨家豬骨海鮮湯底

梅光軒是日本旭川的老字號，有成 40年歷史，在旭川每日可以賣出 900碗，更成為 12年米芝蓮的推介食店。
旭川拉麵最特別之處就是湯底，師傅同時用上豬骨、雞骨同沙甸魚熬製 12小時，味道香濃卻一點都唔油。
用上由日本製的中幼曲拉麵，麵身彈牙有咬口，比直身拉麵更快吸收湯底的精華，一啖麵一啖湯，食得最滋味。

醬油拉麵$75
最正宗的旭川拉麵，曾被當地市民選為旭川最佳拉麵。

鹽味牛油粟米拉麵$85
傳統的鹽味拉麵會加上芽菜，還可以選擇野菜和叉燒。

谷川春香
本店店長

谷川春香是本店店長，會在香港打點一切 10天，確保所有拉麵保持日本水準。

梅光軒

營業時間： 10am-11pm
電話： 2870 3072
地址：希慎廣場地庫 2樓 Jasons• Food& Living Food Hall

札幌市分店

地庫隱藏
北海道美食節

除了隱藏於地庫的 2間食店， Jasons• Food& Living更首次引入 300多款
獨家產品，包括英國歷史最悠久的朱古力
Charbonnel et Walker Chocolates，創於 1875年，擁有英女王特准御用的皇家品質保證。
新開張期間推出北海道節，特別推出札幌有名拉麵店白樺山莊的方便麵套裝，亦有凍乾紅莓朱古力。

Wakasaya Honpo$39
北海道經典零食品牌，用當地牛奶製作的牛油造成曲奇餅，非常香脆。

凍乾士多啤梨朱古力$119
由北海道牛奶和當地乾果製成的朱古力，唔會太甜，口感好得意。

白樺山莊 4人前套裝$129
白樺山莊是札幌歷史最悠久的拉麵店，方便裝首次進駐香港。

Jasons． Food& Living

營業時間： 8:30am-11pm
電話： 2776 1090
地址：希慎廣場地庫 2樓

年輕版
海南少爺

屬於海南少爺同集團的 SHIOK，同樣主打正宗南洋娘惹菜式，堅持冇味精，雖然菜式一樣，不過做法卻有所改變，老闆 Tony特別選用更輕怡的材料，如用冬瓜取代黑白淡奶來炮製雞湯，希望大家食 food court，都可以食得健康。

招牌海南雞飯$78
一樣用上龍崗雞，不過雞湯棄用黑白淡奶，取而代之的是冬瓜肉，吃起來更輕盈，唔油膩。

新加坡黑菜頭果（蘿蔔糕）$48
傳統新加坡小食，新鮮蘿蔔加糯米粉蒸成的蘿蔔糕，加入雞蛋和新加坡豉油炒香，比傳統的用更少油。

班蘭香茅奶凍$28
用低糖豆漿撞忌廉，加入班蘭精，面層是烘焙過的杏仁片和椰絲，質感幼滑，絕對健康。