直擊騎馬全體驗 @ 娛樂八掛大放送★

根據記者自家進行的一項非正式調查顯示，香港人最喜愛的動物，除咗貓和狗，就係馬！不過大多數人都好少機會真正親近、了解馬兒。大棠荔枝園騎術學校趁暑假舉辦馬術體驗活動，除咗學騎馬，仲有機會照顧馬匹，例如幫佢哋擦身、梳毛、洗面等等，好難得o架！

模特兒Elaine小時候騎過馬，一直覺得馬係好聰明好有感情的，當被馬兒Alco的一雙亮晶晶大眼睛望住時，就有種被看透心事的感覺。呢日佢一入到馬房，就好似跟老友重逢一樣，不住跟馬兒細語，「你好嗎？叫咩名呀你？……」舉止看似有點傻氣，但馬房的工作人員就讚佢識嘢：「馬的智商大概有人類七、八歲，而且聽覺敏銳，絕對聽得懂我哋嘅說話。如果你經常嚟探佢，佢一定認得你！」
跟Alco一見如故的Elaine，呢日就落手落腳幫忙料理馬兒的生活，擦背清潔雖然係手板眼見工夫，但對馬匹好重要，日日都要由頭到腳仔細清潔，保持毛髮企理乾淨，才可避免患皮膚病，兼有按摩作用。

乾洗三部曲
擦背
馬兒唔會日日用水「沖涼」，因為容易令皮膚敏感，大概一星期一次，或者出汗太多先會用水沖涼。日常只會「乾洗」，用膠刷不住替牠打圈按摩，由頸項開始一直至臀部，擦完左邊身再擦右邊身。擦勻後仲要用短毛刷掃去死毛和塵埃。

Elaine：「馬身好高，舉高手去不停擦，會消耗不少體力o架。不過Alco好似俾我擦得幾舒服咁，郁都唔郁企定定。」

梳毛
馬的尾部和頸項鬃毛每日要用齒梳梳順，方法是先用一隻手固定毛髮根部，避免因毛髮打結梳理時會拉痛牠。

Elaine：「Alco的馬尾好長，我想同佢紮辮仔呀！梳尾部時記得唔好企正喺佢後面，因為佢受驚會起飛腳向後踢，好似我咁企喺馬身兩側就最安全喇。」

挑腳
馬蹄和蹄鐵之間的縫隙容易藏泥、糞便和污垢，所以要天天清理。方法係用鋼絲刷和鈎具將垢物仔細地剔出。不過想剔出蹄裏的垢物，一定先要令馬兒願意遞高腳掌，方法是在佢的小腿前面，即係上五吋下五吋位置搓揉，馬腳就會自動縮起，你就可用手托住清理喇。

Elaine：「馬的腳踝同人一樣，好敏感o架，所以托住馬腳掌時要特別小心。若感到馬腳用力向下墜，即係佢企到攰咗，你就要鬆開手，千祈唔好同佢鬥力。仲有應站在馬腳前方替馬兒挑腳，可避免被無意踢中。」

策騎技巧tips
1 握韁的手勢好重要，力度和收放都會直接影響馬匹前進的方向和速度。最基本是左右拉緊馬韁，馬匹就會向左或右轉向；雙手同時拉緊馬韁，就會停步。除咗韁繩，亦可用腳來控制馬匹，例如鬆開韁繩以小腿輕踢馬身，佢就會開步行。
2 馬蹬即腳踏位置，應因應策騎師的身高調校至合適高度。一個簡易量度方法是單手控在馬鞍上，腳蹬連皮帶長度與手臂一樣就是了。腳尖踏住腳蹬時，雙腿和足踝應自然垂下。

Elaine騎後感：「我覺得學騎馬其實係學同馬匹溝通，我嘅身體小動作，甚至說話和心理狀況，佢都會feel到o架。所以有心學騎馬的人，一定先要學懂跟馬匹相處，建立關係，先至會騎得好o架。」

馬術體驗營
內容：參觀馬房、親親馬匹、騎術訓練、沙圈試騎等等
適合年紀：7歲或以上
開放時間：9am-6pm（12nn-2pm午休，星期一休息）
收費：$120/半日-$200/全日（包午膳或燒烤）
查詢：2470 3638

去街街散步
Elaine咁辛苦替Alco擦身清潔，唔會冇回報嘅。擦完身舒服晒，就俾你騎上馬背，一齊去散步啦！上馬前披鞍繫韁的準備工夫，Elaine亦一手包辦。

披鞍
馬鞍的重量不輕，搬得郁仲要夠臂力托高安放到馬背上。然後以皮帶穩妥繫緊，真係少啲力氣都唔得。

繫韁
韁繩猶如汽車軚盤，係騎師和馬匹溝通的工具，控制馬匹轉向、前行、加速或者停步。韁繩的主要部分「咬鐵」，要套入馬的口腔內，Elaine自覺咬鐵會令馬兒感到不適，繫韁時有點不忍，同時又擔心會被咬。其實Alco都唔知幾鍾意！

必試！搶手有機蔬果
騎完馬唔好即刻走，大棠荔枝園出產不少有機農產品，不妨帶點返屋企做「手信」。

四季當造大樹菠蘿
立秋後，夏果都被摘光了，好在仲有四季當造的大樹菠蘿。大樹菠蘿長到30斤左右就會割下，放上兩三天等佢熟透就可開殼，通常在假日即開即賣。食味清甜帶點刺激，有人奉為極品亦有人好抗拒，跟榴槤一樣。

Elaine初見樹上的碩大果實，都好驚行過時誤中頭獎！其實佢頭上的大樹菠蘿有排都未夠熟，要長到成個大冬瓜咁上下先算圓熟。

自家調製有機涼茶
玩完一輪想補充水分，順便解下暑，記得歎番支荔枝園自家調製的涼茶。有菊花茶和蛇舌草涼茶兩款揀，原料杭菊花和蛇舌草都係自家有機種植，加上自家養蜂園出產的蜜糖以及蘆薈肉，百分百天然、有機，由於是小量製作，不作外銷，其他地方飲唔到o架！

蛇舌草涼茶飲落一啲都唔苦澀，味道清新，飲完喉嚨清涼舒適，燥火冇晒！菊花茶亦唔甜膩，菊花香濃，蜜味清甜，真係好耐無飲過天然冇加工的飲品喇！（$10-12/支）

全港唯一有機芽菜
大棠荔枝園的有機芽菜攞晒認證，香港暫時只此一家。呢度有用綠豆種的芽菜和黃豆種的大豆芽出產，兩者均選用有機豆栽培。豆會放在恆溫的密封櫃內培植，定時灑水，所用的水係天然地下水，無加任何化學物，約一星期就可種出豆芽。有機豆芽跟一般街市買到的，外形上最大分別係比較粗壯實淨，而且芽莖長得又直又長。至於食味就清甜啲，口感亦爽脆得多，稍焯就食得喇。

大棠荔枝莊
地址：元朗大棠山道11號
入場門票：$20
交通：元朗千色廣場斜對面乘往來大棠及元朗紅色小巴，車資約$3；或於朗屏站乘K66巴士至大棠山道路口，車資3.8，車程10分鐘，再步行10分鐘便到達。元朗乘的士前往車資約$35。
電話：2470 3638
網址：http://www.taitong.com.hk

Alco同我同齡，都係23歲，我哋肯定會成為好拍檔。
大棠荔枝園騎術學校內住了十多匹馬，有啲係退役馬，亦有廣告和電影明星馬，好似喺澳洲出生的Alco，來港定居十多年了。牠性情溫馴穩定，來港前拍過好多電影o架，係大明星嚟，但就一點架子都無。