面對面
唔 X係呀?!李璨琛
約了李璨琛在他位於旺角的街頭服飾品牌 Subcrew工作室做訪問，準點趕到的他，一進門就請我和攝影師吃朋友從台灣帶來的烈酒啫喱，呻這個八月有多忙：「一個禮拜幾個朋友結婚生仔，真係幾個堆埋一齊！下個禮拜又去台灣，有人擺滿月有人結婚，最後嗰個星期就去搞吉隆坡新鋪……咁就成個月爆晒！」然後 11月輪到他自己和相戀 9年的模特兒女友拉埋。
斯文了不到五分鐘，琛仔問：「可唔可以講粗口？」我說：「請便！」接下來的 90分鐘訪談，出現最多次數的是四個字：「唔 X係呀？！」
14歲中二輟學被老豆拉去果欄推生果：「盒橙仲重過我，唔 X係呀？」
21歲踩板被導演陳果發掘主演《香港製造》：「我做男主角？唔 X係呀？」
入行十六年拍戲百多部：「我真係一次茄輪都未打過！」這次輪到我們說：「唔 X係呀？」
大老闆大忙人去年失驚無神入無綫拍電視劇《怒火街頭》演社工，今年添食拍第二集，他也說：「搵我做社工？唔 X係呀？我照鏡都唔信自己得！」
要是你以為這一篇專訪的重點是李璨琛粗口橫飛，那就大錯特錯了。
我想說的是，從水電技工走到今天，把許許多多的不可能變成可能，李璨琛，你好嘢！
洗腦要靠 TVB
我把維基百科上列出的李璨琛電影作品從頭數到尾，一共 96部。李璨琛說，未計部分拍完冇影或是沒公開放映的福音電影，自己的電影產量其實一早過百：「以前冇得揀，要開飯，有得拍唔通唔拍咩？ 𠵱家有條件畀我選擇，拍極都係嗰啲，做演員最怕冇得 upgrade，我選擇唔拍。」
「嗰啲」角色，李璨琛說的是自己演的最多最擅長的古惑、混混和街頭小人物。入行源於街頭、賣衫賣街頭服飾、定型又係因為街頭，李璨琛這種，正是成也街頭、敗也街頭：「當年喺灣仔踩板，陳果 𥄫咗我好耐，我幾寸呀：『係唔係想學踩板呀？係就勸你唔好喇，你唔同我哋呀，扽親手尾好長㗎！』佢一身爛 T-shirt、爛 Texwood牛仔短褲，着對爛拖鞋揹個爛布袋，我打死都唔信佢係咩電影監製。嗰陣時喺西貢地盤開完工，見佢公司喺海運，心諗貴嘢嚟喎，收工拿住把電鑽就踩上去，問我咩我都好寸，我愈寸佢就愈開心，佢哋就係鍾意我寸咋嘛！」結果這一做就十多年，一拍就百多部，李璨琛話有辣有唔辣，好處是不愁沒工開、壞處是做死自己：「我外形入晒腦，演員最忌做死一瓣，有時做戲，我自己加嘢落去，導演都唔肯收貨：『唔使啦，你做番之前咁得啦，搵你都係因為咁咋嘛。』」
入行以來第一次與無 綫合作，就是因為被看好能轉型演社工：「演員等十幾年都係等一個咁嘅機會，第一集得，理所當然拍埋第二集。」
03年與兩位拍檔創立街頭服飾品牌 Subcrew，如今在中國五大城市和東南亞都有專門店和銷售點。
近年做服飾生意做到跨國，大把條件推戲拒絕再行「古惑」，直到《怒火街頭》監製打來請他扮社工：「社工？我個個朋友都話：『唔 X係呀？你邊忽似社工？』我自己照鏡，都唔信自己可以做到社工。你知唔知，好多演員等咗十幾年就係等一個咁嘅機會。拍完事實證明，我得！出到街第一次聽到街坊話：『我以為你行古惑就得?，乜你做社工都得喎！』你唔好唔信， TVB真係可以洗到腦！」
LMF係發洩工具
自認脾氣暴躁，也後悔曾經在鏡頭面前失態：「好彩我興趣多多又有 LMF班兄弟咋，唔係上台有得發洩，我諗我仲衰！」《蘋果日報》圖片
李璨琛在藍田屋邨長大，中學派過海讀慈幼，中二上學期還沒讀完，就被班主任苦勸退學，請他好心把學位讓給愛讀書的同學：「老豆想畀我試吓唔讀書係咩下場，帶我去果欄推生果。我一路推一路佩服老豆，咁就推咗一世、養大我哋五兄弟姊妹，一路話畀自己聽：『盒橙仲重過我，我呢世人做咩都唔要推生果！』但求離開果欄，跟咗個 friend個老豆學水電。」
十五歲開始在西貢村屋做地盤，李璨琛開工鑿窿派料拉電線，放工秤住個工具袋踩板睇戲：「嗰陣時死仔一個，返工冇責任感，前一晚飲大咗第二日一定唔會返。睇戲唔好睇就拿個螺絲批爛戲院張凳：『 X，都唔好睇嘅！』」所以他說一輩子感謝陳果這個伯樂，帶他走進電影世界，還讓他學會甚麼叫責任感、甚麼叫尊重。 
入行十六年拍戲百多部，為搵食接過不少所謂爛片，曾多次登上爛片王寶座，不過亦有爛中代表作， 98年的《生化壽屍》就是港產 cult片經典。
「零二年，電影市道差，我亦都拍咗好多市場上所謂嘅爛片。俾人話爛片王，我唔開心㗎其實……但你又點會明白我嘅處境呢，唔使食咩？自己望吓自己個樣，你話我生到吳彥祖咁，際遇唔好仲係拍緊啲行行企企就話啫，照吓鏡睇吓自己個樣，人哋冇工開時，我仲有幾部戲拍緊，幾好㗎喇。到真係冇嘢郁，爛片都冇得拍，就真係愁啦！唔係窮咁簡單，係冇 hope呀！以前錢易搵，又鍾意玩、又鍾意飲，愛玩車又愛改裝，呢度幾皮嗰度幾皮，最緊要個勢，最緊要出嚟贏。需知道人充大咗，好難縮得番。係嗰一步先至去諗其他出路咋嘛……嗰個階段，換着第二個，由頭學過做衫真係未必肯，我唔係咁諗囉。每日瞓到黃朝白晏，食完碗麵上返樓，晚飯再約人食嘢，跟住諗去邊度飲，日日咁過唔掂喎。突然間個人撻着要搵啲嘢寄託，就咁開始咗我另一門事業。」 
96年被陳果發掘拍《香港製造》，勇奪金像獎新人獎，李璨琛說對陳果一直半信半疑，直到試片當日看見投資人劉德華真身。路透社圖片
李璨琛說自己大情大性，看無綫劇都會喊到變豬頭，沉不住氣飲大兩杯就會罵人，好在 99年認識 LMF班兄弟，友情十多年不變，有的現在成了 Subcrew生意拍檔：「大家都係屋邨大，講句粗口都特別有 feel，我脾氣暴躁，上台同佢哋爆完粗，落台舒服晒……做生意，唔『小』得㗎嘛，一『小』就壞事永不錄用㗎啦。成班兄弟知我性格，一係事先同我 briefing過、一係出去傾嘢索性唔帶我，做人最幸運就係有班咁嘅團隊，大家熟悉大家性格，大家各自做番專長，咁好就係咁。」
百幾套戲都未打過茄輪
拍《怒火 1》，與「貞貞」陳敏之最多拖吓手仔；《怒火 2》戲分加重與賈曉晨談情，李璨琛話照樣沒親熱戲：「人拍戲我拍戲，我拍咗百幾套戲真係一次茄輪都未打過，陰功！人哋做呢行，乜都試吓，我呢？一眼睇晒，咪就係呢個同嗰個囉，點解唔試多啲呢？」
這一行就是這樣，有些人喜歡裝正經，自稱眼界高又要拼事業，內裏其實飢不擇食男女關係七國咁亂；有些人外表吊兒郎當又愛開玩笑，其實專一得很。入行十六年，前後只有兩段感情的李璨琛就屬於後者。去年，他在微博宣布向 9年圈外女友 Pei求婚成功，兩人將在今年尾擺酒完婚。
「十畫都未有一撇，交晒畀太太搞。我太忙，淨係做咗套禮服，點知又肥咗。我俾人讚咗好多年 keep得到，都 37歲喇，個腩仔出晒嚟，要減喇！」
去年尾，李璨琛在微博宣布，在女友 Pei生日會上求婚成功，將於今年尾完婚。《忽然 1周》圖片
入行多年，李璨琛形象專一，未婚妻 Pei之前只有一任前度，模特兒 Carrie Chiu。《蘋果日報》圖片
踩板玩單車打碟唱粗口歌， 37歲，李璨琛說自己的火開始收，晚上對住夜店班行屍走肉開始厭，開始喜歡釣魚與未來老婆享受寧靜，開始羨慕班老友同拍檔大講兒女經：「玩開嗰班，鄭中基、陳小春、王合喜，一個二個結婚有小朋友；拍劇聽阿廉講對仔女，佢話拍劇攰，返到去陪啲細路玩仲攰！不過又攰得好爽喎，佢哋講起小朋友上嚟，面上嗰種喜悅，真係形容唔到。我做咗咁多年，好好彩咁把握到一啲機會，留到一啲人喺身邊，又可以將唔少興趣變成事業，可以做嘅都做咗，下一步，真係好想有自己嘅家庭，唔係只得兩個人嘅家。」
社工的話
第一部電影，兩個月賺兩萬，李璨琛話捱更抵夜打雜拍板拉埋電線，做男主角仲辛苦過水電技工。
爆粗可以，李璨琛其實說教亦可以。
雖然入行以來說過無數次，一有機會，李璨琛還是很喜歡回味被陳果發掘拍《香港製造》的經歷：「五個人用五十萬拍一套戲，真係講出嚟都冇人信。陳果係監製編劇導演又係司機，每日揸住架 van仔周圍去拍。全部菲林都係劉德華捐出嚟，人哋用剩嘅頭頭尾尾，拍幾秒就要換；我就擔擔抬抬自己拍板仲要駁埋電線，因為我係水電出身吖嘛……其實有邊個唔係由低做起捱出嚟？我都係捱過喊過低潮過先有今日。 𠵱家啲八九十後，郁啲嫌人工唔夠高、嫌政府冇幫，你要人幫，先諗吓自己有咩幫到社會先啦！自己都唔了解自己有咩潛能，叫人點了解你？點幫你呢？」
誰說李璨琛不能做社工？ 
留言列表
{{ article.title }}
