直擊 Hello Kitty 皇宮 Who's the next Hello Kitty? @ 娛樂八掛大放送★

年屆35的Hello Kitty最近升呢做「女皇」。佔地18,000呎名為「Who's the next Hello Kitty?」的皇宮，位於九龍灣國際展貿中心，皇宮內仲有遊戲玩㖭。即由日模Suyuri及日本通王友良（Ivan）親身體驗呢個Kitty皇宮掂唔掂！

玩法：Kitty皇宮共有11關，其中5關係考智力考體力取金幣，其他為導賞形式。由「紅衣女管家」帶路，每人拎住一個「星光儲蓄箱」，每過「攞金幣關」，大家就要搶分，因最後會依所得的星光代幣，而獲得不同級別的明星合約（即證書）。

勁舞Dancing Queen
女管家帶Ivan同Suyuri到第一關，佢哋對住大銀幕，好似擦黑板咁擺動雙手，「shake走」銀幕上的所有寶石，完成後最多可獲1個星光代幣。

管家事務所
管家會問3條「如果你是Hello Kitty」的選擇題，但啲問題與Hello Kitty的生平事蹟無關，Suyuri話揀答案時成日都十五十六。答啱就有星光代幣，呢關最多可得3個。

奇幻搖搖橋
站在投影幕前的「搖搖橋」，對住幕上紅線人形擺甫士，睇以為易，但都好考平衡力，呢關最多可得2個星光代幣。

o靚模寫真館
入到寫真館對着相框，模仿相框內右邊的Angelababy甫士拍照，擺得似就可過呢關。最多可得2個星光代幣。

寶石庫
最後一關最難！要走過設有紅外線的寶石庫，身體任何部分掂到紅外線就要扣分，佢哋又跪又爬先過到關。Suyuri話：「好似做運動咁，玩到身水身汗。」呢關最多可得1個星光代幣。

潮拜Kitty女皇！
幾經辛苦，過埋最後一關，Suyuri拉着Ivan即走去Kitty女皇像前拍照。Suyuri話：「我喺日本未見過咁大size嘅Hello Kitty。」一身金碧輝煌，約高10呎拎住權杖的Kitty，坐在鑲滿閃石的龍椅上，果然有女皇氣派。

額外「BOW」獎
Kitty粉絲都知煲呔是Kitty標記之一。大會將8月20及26日定為「紅BOW日」，屆時只要身上有紅色蝴蝶結裝飾入場，更可獲頒特別版證書1張。

3大影相靚位

Suyuri玩後感：「Yeah！我可以成為『女皇承繼人』。好彩平日經常擺pose影相，所以過關都幾easy。會場的卡通人物造型都好靚好Kawaii，嚟玩一定要影相！」

Ivan玩後感：「日本有好多卡通人物主題樂園，好受當地及旅客歡迎。今次九展呢個Kitty展，有得睇，仲有得過關玩遊戲，都OK嘅！最後見到成10呎高的Kitty，好有氣勢。」

咪執輸特別版Kitty！
會場內仲有超過10款Hello Kitty特別版紀念品，每款數量有限，Ivan同Suyuri臨走時都買埋一份，Suyuri話：「買嚟自用，或者送俾日本朋友都好！」

「Who's the next Hello Kitty?」詳情
日期：即日起至8月29日
地點：九龍灣國際展貿中心（EMAX）
時間：10am-8pm
票價：標準票 $120、優惠票 $60、標準特快票 $150、優惠特快票 $75
*特快票只限網上訂購，不設即場售賣
網址：http://www.nexthellokitty.com

追蹤Kitty
即日至8月底喺澳門旅遊塔亦有「Road to become a Super Star」Hello Kitty展覽，窺探Kitty的「發跡史」。
時間：11am-7pm（6:30pm最後入場）
入場費：MOP 30（附送限量版Hello Kitty文件套2個）
查詢：（853）2893 3339

我最鍾意馬騮仔Monkichi同Dear Daniel，我細個時都用佢哋嘅文具o架！
除咗Kitty，黑色的XO仔外表同個性都一樣咁cool，夠型仔啊！