名媛狂刮細 Hermes　關之琳漸變袋炒上 60萬－娛樂八掛大放送★

Hermes Birkin自面世後一直是名媛熱捧手袋第一位，過往以35cm和40cm較為普及，但著名形象設計Ricky Kwok（郭慶彬）指近日歐洲名媛狂刮細Birkin，仲愈細愈矜貴，當中以25cm最為渴市，30cm亦大有市場。
歐洲狂搶，香港名媛即時跟風，搶細唔搶大。早前關之琳與台灣富商陳泰銘牽手遊巴黎，便拎住極罕的30cm鱷魚皮漸變銀色Birkin，因為size矜貴加上屬限量版顏色，袋價已由約30萬炒至60萬，如在專門店買，隨時要等幾年。大拿拿60萬，對普通市民嚟講，已經可以做首期買樓，但名媛依然熱烈追捧，果然物以罕為貴！

關之琳極罕袋升一倍
關之琳擁有的30cm漸變銀色鱷魚皮Birkin，屬尊貴限量版，碧咸嫂Victoria都有一個同色大size。米蘭站市場總監Tony話：「呢個色全球限量50個，當中30cm出產數量又比25cm少，所以好矜貴，炒價已經由30萬炒至60萬，升一倍。」之之好友楊小娟更說：「日本仲犀利，呢個size已經炒到港幣70幾萬。」

楊小娟幾百萬珍藏
楊小娟近日就拿着價值約23萬的桃紅鱷魚皮Birkin陪老公呂良偉行街。向來是Hermes擁躉的小娟，自言家中珍藏了十多個25cm鱷魚皮Birkin，總值數百萬元，她說：「我知道歐洲熱炒細Birkin，其實我一直都追捧細size，因為適合自己嬌小身形。」

林玉茵香港入貨
寶時年集團主席梁寶珠女兒林玉茵上周五（6日）以紅色Herve Leger裙，配價值5萬6千元白色25cm Birkin出席菁英會就職晚宴，她說自己跟香港Hermes店相熟，唔使飛去歐洲撲，在香港亦買到現貨，「自己唔係高大，拎細size會啱啲。」

林煒珊專攻細袋
大名娛樂老闆林建名女兒林煒珊，遭同是仁濟總理的米蘭站老闆姚君達踢爆極愛細Birkin，他說：「我哋成日一齊開會，基於職業本能，我好留意女士們用嘅袋，林煒珊好鍾情25cm Birkin，我見過佢拎唔同顏色，但全以basic色調為主。」

周倩圯法國狂掃
周倩圯3月時應邀到法國欣賞時裝展，經當地朋友介紹認識Hermes法國總部主管，她說：「當時我拎住個25cm Birkin袋。個主管見到即刻話我潮，又話我好啱傾。」兩人惺惺相惜後，周倩圯更透過主管一次過掃入一個25cm綠色Birkin（右圖）及一個30cm Birkin，她自豪地說：「好多名媛等袋要等幾年，我幾個月就有！」

大size死硬派
雖然時興用細袋，但35cm同40cm的Birkin一樣有人撐。

甘比玩紅白藍
上周六（7日）及本周日（8日）一連兩天，甘比都陪大劉劉鑾雄到福臨門開餐，甘比拎住35cm俗稱紅白藍的三色牛皮Birkin，由於三色極罕有，因此亦受名媛追捧。

專門店價7萬5千
二手炒價11萬

Angelababy撐大size
Angelababy貴為潮流先鋒，但暫時還未跟風買細Birkin，早前她更拎住40cm Birkin陪緋聞男友曉明去睇戲。

專門店價8萬
二手炒價9萬5千

梁芷珊細袋唔夠用
bma老闆娘梁芷珊知道近日熱炒細袋，但她只鍾情35cm以上的大Birkin，她說：「我平日要袋埋老公同囡囡嘅用品，太細嘅袋根本裝唔晒，所以我只撐大唔會撐細。」

專門店價7萬5千
二手炒價10萬5千

Birkin長搶長有
米蘭站市場總監Tony說，Hermes Birkin有名媛力撐，銷量仍是第一，最近更以細Birkin稱王，排名如下：
第1位：30cm Blue de Purse Birkin
（專門店價6萬9千，二手炒價8萬5千）
第2位：25cm牛皮Blue jean Birkin
（專門店價5萬6千，二手炒價6萬6千）
第3位：32cm灰色Kelly
（專門店價5萬5千，二手炒價6萬2千）

專門店價30萬
二手炒價60萬