在無綫劇《老表，你好嘢！》演細細粒夠突出，令230磅的陳嘉佳（小寶）成功上位，由特約演員變成藝員，夢想可成真，小寶笑言因體重關係不會飄飄然，難得有幾生修來的機會，她會好好珍惜，未拍過拖的她會專心工作，將感情事放埋一邊。

撰文：羅美倫

小寶在道具公司工作四年並兼任特約演員，在福祿壽演唱會與王祖藍跳舞被賞識，去年跟無綫簽下兩年藝員約，當日具慧眼的是監製潘嘉德，到後台邀請小寶演《巴不得媽媽…》跳海自殺肥妹，從此踏上星途。

■小寶因細細粒一角人氣勁升，開朗，惹笑性格為觀眾受Aroma魔杰座Capricorn。攝影：陳志嵐

■（左起）鬼妹陳明恩與小寶、萬綺雯和王菀之拍戲之餘，愛搞笑自娛。
微博圖片

期待跟華仔結片緣

小寶最高峯體重達250磅，中五時也有170磅，比同學重近一倍，但她自小已發明星夢：「因為選美冇望嘛，細個梗係想選香港小姐啦，我又冇恒心、毅力減肥。」因過重不可能選美，但亦因體重令她有做真正藝人的一天，被讚靚女的小寶會否考慮減肥？她笑說：「之前從來冇人話我靚女，都幾得意，減肥我日日都諗o架，得個諗字，要減都係為健康而減，長時間冇嘢落肚太辛苦，寧願肥，既然o依家入咗行大家唔討厭、唔抗拒又有觀眾緣，暫時咁樣先啦。」對於被封為女神，小寶希望大家不要這樣稱呼她：「我完全唔符合，能夠用咁嘅身材入行，人哋唔討厭唔反感已經係恩賜。」

正式成為藝人，小寶暫時仍會兼顧道具公司工作，如工作太多會轉全職，問到有甚麼期望，小寶說：「希望可以劇接劇、騷接騷，唔好有空檔，再忙都OK，冇覺瞓都得。」小寶稍後會再被安排拍劇，最想跟那個男藝人合作？小寶想了想說：「劉德華啦，我睇八卦新聞話劉德華會返無綫拍劇，我好欣賞華仔。」想做華仔女友？小寶說：「做妹妹好，我係獨女，冇哥哥愛錫，佢演技咁好，我就有幾個月可以沉醉畀哥哥錫啦！」

■去年在福祿壽演唱會中跟祖藍跳舞表現不俗。

■小寶（右一）亦有份客串新劇“初五啟市錄”。

謝絕性感怕惹負評

劇集中的肥妹角色通常都沒有感情線，未拍過拖的小寶會否想拍劇時一試戀愛感覺？她笑言：「性感、親熱戲盡量唔好啦，會令人討厭，自暴其短，都唔想公司接投訴，o依家就話我得意，之後就話我唔知醜o架喇！」小寶不擔心肥妹熱潮過後會惹來批評，她認為只需做好自己，問心無愧就夠了。至於真正拍拖，小寶也不恨試：「唔想拍拖喎，o依家好開心，未試過嘅嘢對我會係開心定唔開心都未知，既然有咁好機會實現我想做嘅嘢，會將精神擺晒落去，呢個機會唔知積幾多世福至得番嚟，所以暫時只諗工作。」

現仍在觀塘返工的小寶，平時不施脂粉，她笑言根本沒人認得她，雖然體重爆燈，她沒有因而不開心：「我坐地鐵明知坐落去會逼到隔籬，咪唔坐囉，明知時裝店啲衫唔啱我着，咪唔入去亂掂囉，平時我近視又唔戴眼鏡，又聽住歌，又盲又聾，就算有人笑我肥，我都唔會知。」

230磅小寶最愛吃

憑無綫劇《老表，你好嘢！》飾演細細粒彈出的陳嘉佳（小寶），現年27歲，在觀塘一間道具公司做文員，09年客串電影《矮仔多情》時認識王祖藍，由於她擁有獨特外表及爽朗性格，獲發掘轉做幕前，先後演出電影《勁抽福祿壽》和劇集《巴不得媽媽…》。

體重達230磅的小寶，當年試過地獄式減肥減至140磅，並拍下索爆靚女照，但後來抵受不住美食誘惑又打回原形。小寶亦是八級鋼琴高手，曾在琴行教琴賺外快。