Geek友講場

HEADPHONE NEW SEASON　耳機夾金曲

2013年01月23日 ~~ 第296期 Face

連老牌 CD鋪 HMV都話宣告破產，音樂市場冇人知會變成點， CD隨時變歷史文物，所以再鬧頒獎禮點唔公平、香港樂壇點垃圾又有乜意思？倒不如珍惜現在好聲音，令自己耳朵享受多 啲靚聲好過！適逢新一季耳機殺到，五花八門功能各有特色，就等《 FACE》教大家揀 啱耳機聽歌，發掘過往忽視 嘅好音樂，唔好等香港樂壇變做下個 HMV先 嚟後悔。

POP　 NBA耳機搶眼入場

近年唔少耳機都強調重低音，不過有時聽一般流行曲，低音太勁嘈到人聲都聽唔清。新出 嘅 Skullcandy NBA Mix Master就冇呢個問題，試聽高中低音層次分明，低音冇特別誇張，播快歌都唔覺鼓聲 bass聲功高蓋主，聽〈重口味〉呢類快板流行 POP music最 fit。不過最煞食係佢 嘅搶眼外表， 5款外形各代表一隊 NBA球隊，除 咗配色襯番波衫，仲有隊徽印 喺上面，靚過其他沉黑耳機多多聲。另外亦欣賞佢線材準備充足，備有手機 remote線同 coiled cable粗線，出街定 喺屋企聽歌都方便。


可摺疊設計，帶出街方便，尤其適合帶去旅行。


可以換線，而且左右兩邊都有線位，手機放 喺袋，條線都唔使就 headphone窿位。


總共有洛杉磯湖人、邁阿密熱火、芝加哥公牛、波士頓塞爾特人、紐約人 5隊選擇，全部都係 fans眾多 嘅傳統勁旅，籃球迷實 buy！


包裝內附有可以講電話 嘅 remote線加咪，另有粗線圈 coiled cable，仲有 3.5mm轉 6.3mm大頭， 喺屋企插 HiFi音質更靚。

《 FACE》 Gadget版監修人 903 DJ Donald　平均舒服

近年隻隻耳機都強調重低音，但試過部分低音耳機， 啲聲一堆 嘢咁冇晒層次。我自己覺得聽廣東歌唔使加強低音，用高中低音比較平均 嘅耳機聽得舒服 啲，品牌方面自己試過 Sony、 Shure、 Bose都唔錯。另外條線都要留意，我會揀用粗線 嘅耳機，試過用幼線整爛 咗換唔到，成個耳機唔用得，自己用 嘅時候要小心 啲唔好摺咁多。 

Spec.

單元： 50mm
頻率響應：冇提供
阻抗： 24Ω
靈敏度： 102dB
售價：$2,799
查詢： Street Value（ 2577 2599）

other choice
Sol Republic Tracks HD Anthem

除 咗 Skullcandy， Sol Republic耳機亦係另一個表現比較平均 嘅品牌，唔會太偏重低音，而最新 嘅 Tracks HD Anthem耳機以傳奇泳手菲比斯為設計靈感，紅白藍 3色設計同 NBA耳機一樣咁有型， 啱晒出街用。
售價：$1,499
查詢： Thinking（ 2955 1000） 

香港 HMV照常營業

目前香港有 6間 HMV，包括：銅鑼灣柏寧酒店、中環娛樂行、黃埔新天地、九龍灣德福廣場、尖沙咀 iSquare、圓方（圖），全部照常營業。

全球負債 27億港元 嘅 HMV，目前正申請破產找尋買家，如果搵唔到買主就可能全面結業。翻查歷史，首間 HMV於 1921年 喺倫敦開業， 1994年登陸香港進駐銅鑼灣皇室堡，最令人印象深刻係共 4層高 嘅尖沙咀漢口道旗艦店，當年可謂樂迷朝聖地，用佢引入 嘅試聽櫃位煲碟更係人生樂事！其實 HMV都知道 CD難賣，所以近年亦轉型賣 game、賣耳筒，呢款 Skullcandy NBA耳機暫時香港都係由 HMV獨家發售。目前香港 6間 HMV都照常營業，問過店員都話冇聽過總公司清盤消息，但真係禍福難料。 

ELECTRONIC　 DJ耳機 啱〈留白〉

本年度最入耳廣東歌首推王菀之 嘅〈留白〉，聽完一次唔識唱都識「啊」識「咦」，甚至二次創作〈留飯〉亦深入民心。 Ivana把聲有個性，但都唔好忽略背後 嘅電子音效，首歌 repeat 3次，每段背後加留白位都有不同編曲。如果用上維也納品牌 AKG嘅 DJ耳機就最 啱聽，筆者發現 啲迷幻電音真係出番晒，同 喺電視機聽到 嘅「咦咦啊啊」相比，又係另一番意境。 

名 DJ監修　 AKG K167

呢款 AKG最新耳機 K167搵 嚟 YouTube點擊達過 300萬 嘅 DJ TIESTO合作設計，特別強調低頻表達。實試覺得低音夠厚亦有層次，唔係一味嘈同震，用佢聽〈留白〉入面 啲「焦焦」聲 嘅 dubstep回響低音效果表現圓滑優秀， 啱晒聽電子音樂，唔似 啲聽 disco song嘅耳機低音厚得 嚟冇 咗細節位。


外形設計比較簡潔，用料亦唔算高級，膠感較重，但勝在輕巧，長戴唔覺累。


頭帶位有伸長設計，加上耳機位皮革軟墊夠厚，戴住唔覺壓住耳仔，舒適度不俗。


冇得換線，只配 coiled cable粗線，亦冇手機 remote線，較適合在家使用。


採用咗能夠扭動嘅 DJ耳機設計，方便 DJ捽碟唔罩耳使用。

Spec.

單元： 40mm
頻率響應： 10Hz-27kHz
阻抗： 32Ω
靈敏度： 112dB
售價：$2,090
查詢： Action International（ 2737 7633）

other choice
出街 啱聽　 AKG K619

AKG同期推出 嘅 K619一樣係加強低頻表現 嘅 DJ耳機，性能雖然冇 K167咁講究，但勝在有支援 iPhone嘅手機 remote線，外形亦較有時尚感，共有桃紅、紅、橙、藍、綠、黑， 6色選擇，如果經常用耳機出街聽歌可以考慮。
售價：$1,480
查詢： Action International（ 2737 7633） 

情人 share　 Urbanears Plattan

Urbanears嘅耳機一向標榜重低音，全新 Plattan款式仲加入獨特 ZoundPlug插頭，用佢連接兩個 Plattan耳機就能夠分享音源，情人節同另一半一齊聽歌都幾 sweet。不過始終只屬中低階級數，低音有點過火，唔太 啱聽慢歌同 classic。
售價：$499
查詢： Street Value（ 2577 2599） 

Supper Moment教你揀耳筒

Supper Moment 4子，左起鼓手阿鼓、主音及結他手 Sunny、結他手阿雞、低音結他 CK。

最近出完新 EP《小伙子出城記》 嘅 Supper Moment人氣急升， 4位 Band友當然有自己一套揀 headphone心得，鼓手阿達就話要 fit番自己個性：「夾 Band出騷會揀全面 嘅耳機，所有 嘢要聽得清楚。平時聽歌我自己鍾意聽 Rock sound，太細緻反而覺得太乾淨，會揀低音比較強少少， punch大 啲，好似 AKG呢款咁。如果鍾意聽女聲或者 jazz揀木製耳機較好，都係睇個人喜好冇一定準則 嘅！」 

開放式專攻演唱會　 Audio-Technica ATH-AD700X

若數上年樂壇盛事， Wyman個《 Concert YY》肯定榜上有名！要聽佢隻演唱會 CD嘅話，最好都係用開放式耳筒，而呢對耳罩穿晒窿嘅 AD700X，就係近期新款之一。
用佢聽歌，歌聲一定會外洩，隔聲能力亦好弱，所以只適合喺室內用，唔啱出街戴。但因此能夠換嚟開闊自然嘅音場，聲音更有現場感，用嚟聽演唱會或者現場伴奏兼錄音嘅發燒碟就最啱。 AD700X雖然唔算好貴，但亦有少少鑑聽級 headphone嘅味道，試聽完仲發現中高頻特別出色添。




AD700X比普通密封式耳筒輕身，加埋彈性十足嘅頭箍，戴得耐都唔覺 攰。


蜂窩形鋁金屬網耳罩外殼，一眼就望到內裏嘅 53mm大單元，空氣完全冇阻隔，藉此產生廣闊音場。

Spec.

單元： 53mm
頻率響應： 5Hz-30kHz
阻抗： 38Ω
靈敏度： 100dB
售價：$1,650
查詢： Audio-Technica（ 2356 9268）

發燒至愛　 Sennheiser HD 700

7年前深受發燒友愛戴嘅 HD 650後繼型號，但比上代採用更先進嘅單元設計，將氣流令振膜嘅擺動幅度減到最低，大大減少聲音失真，令音質更正。
售價：$7,499
查詢： Sennheiser（ 3412 8400） 

高階之選　 Audio-Technica ATH-AD2000X

鐵三角最新開放式耳筒系列嘅最高階型號，採用更高質嘅 53mm鐵鈷合金單元，配埋專業級音圈等組件，達到真正鑑聽耳筒級數。
售價：$7,720
查詢： Audio-Technica（ 2356 9268） 

專家談開放式

亦軒耳機音樂世界第 2代掌舵人 Thomas

其實唔理 headphone音色取向啱聽咩類型歌曲，結構上大致都可分為密封式同開放式兩種，前面介紹嘅 Skullcandy同 AKG耳筒都屬於密封式。
Thomas認為密封式有較多聲音 detail、開放式有廣闊自然嘅音場，兩者孰優孰劣，幾視乎個人喜好。但佢都認同喺屋企聽演奏會之類嘅天碟時，都係用開放式好啲，仲話效果會更近似喇叭。「而且開放式又冇咁侷促，更適合長時間聽。不過呢類耳筒好多要求都較高，可能需要配合 AMP或耳擴先夠力推。」 

木製耳筒人聲靚　 Audio-Technica ATH-ESW11LTD

容祖兒喺無綫《勁歌金曲》總選 8連霸攞「最受歡迎女歌星」，除咗因為冇其他人威脅到佢，平心而論，佢本身亦真係有把靚聲。而各廠商為求製造出靚人聲耳機，已試盡晒所有物料，其中木製耳機就被評為令人聲更加和暖同清脆，所以久唔久就有廠推出呢類耳機。最新就係鐵三角呢款 ATH-ESW11LTD，佢用日本胡桃木嚟造耳罩外殼，歌聲喺耳罩內反射後再傳出，音質的確比塑膠或金屬製耳機圓潤，用嚟聽〈牆紙〉仲發覺中低頻幾豐富添！




貫切鐵三角耳筒兩邊耳罩可以 90度轉成平排嘅設計，方便收藏同佩帶；頭箍同耳墊仲係用西班牙小羊皮製造，戴得幾舒服。

Spec.

單元： 53mm
頻率響應： 5Hz-42kHz
阻抗： 44Ω
靈敏度： 103dB
售價：$5,940
查詢： Audio-Technica（ 2356 9268）

other choice
樺木震膜　 JVC HA-FX800

Earphone亦有木製選擇， JVC就係呢方面嘅先行者。新款 FX800唔只機體外殼，就連震膜都係用優質樺木製造，音色夠晒自然通透。
售價：$2,980
查詢： JVC（ 2722 0320） 

重 bass耳機　轟 band sound

《叱咤》頒獎禮一人一票選出〈年少無知〉係「我最喜愛歌曲」，若我最喜愛 earphone都搞公投，肯定會係重 bass耳機勝出！事關 earphone因體積細小，製造低頻冇大耳筒咁強，好多渣款都俾人彈 bass唔夠力，就連《天與地》陳豪聽親 rock都只戴大耳筒！但係 earphone勝在方便，所以唔少廠商都給力研究，透過特別結構增強低頻，等樂迷感受到 Rock& Roll精神，就好似以下 3對新款咁。而且佢 哋配備埋線控咪，完全對應 iPhone handsfree同 play歌功能，可以出街邊行邊「焚」。 

雙出氣口　 EOps Noisezero X2+

新晉耳機潮牌 EOps，連日本潮流教父 Neighborhood主腦瀧澤伸介都用佢 啲耳機，今次呢款 X2+大玩撞色扁線 design，搶得 嚟又唔易壞線。雖然佢只賣$399，但都用最經濟方法去強化低音， 喺耳機上加入雙 bass出氣口，令低音得以釋放，畀人聽得更清楚。而且佢個 10mm單元仲有 鈦塗層去增加硬度，減少震膜諧震，令歌聲唔會失真。




扁線兩邊各一隻色，除 咗粉紅×藍，仲有橙×藍，一樣咁撞！

Spec.

單元： 10mm•頻率響應： 20Hz-22kHz•阻抗： 16Ω•靈敏度： 108dB•售價：$399•查詢：永利達（ 2407 1118）

特大單元　 Audio-Technica ATH-CKS99i

日本鐵三角 嘅 earphone，不嬲俾人讚低音水準好，最新 Solid Bass系列 嘅 CKS99i，更用到比大部分 earphone都大 嘅 13mm單元，睇牌面已經贏。而且佢一樣有雙空氣室，令低音加倍實淨，但同時又有雙重 Acoustic Resistor設計去保持番中高頻平衡，等音色唔會偏重晒低頻，唔怪得筆者用佢試聽〈年少無知〉，覺得 bass結他真係幾出，人聲亦唔錯。




換另一角度睇，唔只耳棉後嘅 13mm單元好突出，連後面 嘅雙空氣室都幾大 嚿，就係靠咁重型設計換 嚟重低音。

Spec.

單元： 13mm•頻率響應： 5Hz-25kHz•阻抗： 16Ω•靈敏度： 106dB•售價：$1,288•查詢： Audio-Technica（ 2356 9268）

清晰動鐵　 Nocs NS800

相比起大多數 earphone用 嘅動圈式單元，瑞典品牌 Nocs呢款 NS800所用 嘅不銹鋼動鐵式單元，分析力明顯強得多。所以試聽阿 Paul首〈天與地〉時，即使有好澎湃 嘅音樂襯住，但依然聽到好細緻 嘅人聲，而且連樂器聲亦分得好清楚邊件打邊件，幾 啱用 嚟聽 rock。聽 Heavy Metal的話，更唔怕樂器聲蓋過歌聲。




雖然內藏結構複雜 嘅動鐵單元，但佢 嘅體積依然只有 1毫子直徑咁細，戴得好舒服。

Spec.

單元：動鐵式•頻率響應： 20Hz-20kHz•阻抗： 25Ω•靈敏度： 106.6dB•售價：$1,299•查詢： ECT（ 3188 0767） 

撰文：司徒港燊、陳兆奇
攝影：傅新發