Prudence以拼布風格創造了 Chocolate Rain，成為香港知名品牌之一。

創業通

Chocolate Rain　 Babykingdowm創業達人　醒你創業秘訣

2013年01月23日 ~~ 第1096期交易通．搵車快線

早年政府曾做過一項調查發現，不少人創業不足 1年已放棄，可以堅持 3年以上的只佔 10%。綜觀本刊多年來訪問過的被訪者，很慶幸當中有佔一半以上，可以經營超過 3年，更有不少成為知名品牌，今次特別揀選最多年輕人喜愛創業的界別，分別是手作及插畫界的 Chocolate Rain，還有網站 Babykingdom，分享他們的成功心得，及創業貼士，希望給予想在這兩個行業大展拳腳的創業者，一點啟示。

成功要點

具原創性，自創冬菇頭女孩等公仔。
具持久性，堅持拼布及公仔風格，不會隨潮流而轉變。
堅持手作及 100%香港製造。
有國際視野，不斷參加展覽，尋找機遇。

Case 1　 Chocolate Rain：堅持到底

現在問人 Chocolate Rain是什麼？很多人會對那個冬菇頭的小女孩有印象，因為有不少商場包括時代廣場、 the one、德褔等曾找 Chocolate Rain合作做布置，而有關產品亦愈出愈多，包括 USB手指、手袋及文具等，品牌每年盈利達 100至 200萬。
其實《交易通》早於 06年便訪問設計師 Prudence，當年她在尖沙咀加連威老道開樓上鋪，賣手製布藝飾物，已吸引不少明星幫襯，句括梁詠琪、吳君如及吳彥祖等。 07年她遷到中環，並開了兩間店鋪，開始與不同品牌 crossover，而她每日仍會躲在店中，親手縫製一個個布公仔服飾，那個年代，手作沒有人看好，所以她經常被親友澆冷水，「佢哋話 5、 60年代嘅人先會做手作，好似穿膠花咁，根本唔能夠維生。」
幸好 Prudence沒有被這些話澆熄熱情，由 00年開始做手作，十多年來依然堅持理念，「我覺得堅持好緊要，成功唔係一朝一夕嘅事，同埋千祈唔好因為潮流，而去改變，一定要堅持自己嘅風格，好似我無論幾辛苦，每一件作品都要手作、手繪，就算幫商場布置，每一隻公仔嘅衫，都係由我同幾位同事親手造出嚟。」

第一人做布碎產品

現在不少人以廠捐出的布碎造產品，原來 Prudence是第一人，「當年我搵廠捐布碎時，費盡唇舌，目的係想環保同 hand made，但𠵱家好多人咁做，有啲只係當做噱頭。」對於近幾年，手作及手繪人愈來愈多， Prudence雖然很開心不用再孤軍作戰，但坦言他們的作品太相似，欠缺原創性及持久性，希望年輕人不要模仿別人。「唔好當其他人係成功方程式，改少少就照做，一定要自己行出一條路，抄襲嘅嘢，人哋一定睇得出。」
成功的另一因素，還要有國際視野，「唔好淨係睇亞洲市場，佢哋對於手作嘅種類及手法都有限，反而外國更重視手作，而且好千變萬化。」她坦言自己的成功關鍵，便是 08年到英國 st. martin修讀碩士課程期間，參加了 8個不同展覽，令 Chocolate Rain可以攻入外國市場，「無論係大型定地攤，我都會去參加，好似 London fashion week、 London design 100%等，一來可以展示自己嘅作品，二來亦可以欣賞其他人嘅設計，開闊自己眼界。」
Prudence透過展覽，被大英博物館、現時的英國拍檔等發掘，得以在歐洲發展。「會有好多 buyer或者 agency去搵有潛質嘅作品。」現時 Chocolate Rain在倫敦、荷蘭及新加坡等，都有產品銷售，甚至是 workshop。

合作條件保持風格

此外，還有不少機構和 Prudence合作，每年大大細細有數十間，但她每個月只會選 1至 2個機構合作，「通常都係機構主動搵我，基本上咩類型都有，但我唔會咩都接，會揀一點優質嘅品牌，同埋有趣嘅產品 crossover，好似同茲曼尼沙發合作做抱枕、腳踏等，可以保持我哋拼布同公仔嘅風格之餘，又畀到人新鮮感。」
Prudence每年亦只會與 2至 3個商場搞大型布置，如剛過去的聖誕節，便與德福合作，一共動用了 300個冬菇頭公仔，全部公仔衫及其他布置，均由她和十幾位同事親手造出來，「我會堅持 handmade，而合作嘅商場都要配合到我呢一點，同埋可以畀我有創作空間，每次試到新嘢，好似今次大部分都用布做背景，成個 project籌備咗半年。」
去年 Prudence還奪得「十大傑青」，而這個冬菇頭女孩，更將跳進公仔箱。「𠵱家我仲喺內地整緊套 100集嘅卡通短片，已經籌備咗 2年，希望今年內可以播出。」

剛過去的聖誕節， Prudence為德福廣場做布置，花了半年時間製作。

不少品牌主動找 Prudence合作，她堅持要保留自己的手作風格。

小型 tote bag$180

公仔錢箱$580

化妝袋套裝(3個)$280

擺外地展覽

Prudence到過不同地方擺設覽，圖為上年到加拿大擺聖誕展。

擺展覽是 Prudence發表作品其中一個主要途徑，她指外國選擇很多，並以過來人身份，推介不同的展覽給大家。「如果係做 fashion and accessory，可以去 London fashion week或 Paris fashion week，甚至係 NYC fashion week、 Sydney fashion week，以上幾個展覽，我全部都參加過。至於產品及家品方面，我就參加過 Paris maison and object、 London design 100%、 Tokyo design 100%、 London top drawer等。」
不要以為參加這些展覽，必須是大品牌或較知名的設計師，其實有很多手作人也會參加，只要填妥申請表，遞交給展方審批，而收費亦視乎展位大小，以巴黎時裝展為例，一個 9平方米攤位，租金約 5至 6萬，可向港府申請資助一半，成功的話，港幣 3萬已可入場。「申請程序同香港差唔多，唔算難，只要你嘅產品有特色，佢哋都會好歡迎，好似手作同手繪，對佢哋嚟講，係一種藝術。」
巴黎時裝展： http://www.parisfashionweek.com
倫敦時裝展： http://www.londonfashionweek.co.uk
申請政府資助： http://www.hktdc.com

Chocolate Rain

地址：中環蘇豪區士丹頓街 34B地下 A鋪
電話： 2975 8318

Case 2　 Babykingdom：專心一致

Rainer開設實店賣嬰兒用品，作為網上購物延續，方便會員。

父母界那個人不認識 Babykingdom親子王國，就算 4年多前，還未結婚的記者已慕名訪問網站創辦人 Rainer，到今日記者已為兩子之母， Babykingdom地位仍舊不變，而且香港會員人數由當時 23萬，跳升至 45萬，內地網會員有 60萬，並已籌備台灣網站。
網站如此成功， Rainer卻沒有想過開發其他網站，全因他認為成功之道，就是要專注，「開其他網站其實好容易，但我哋寧願專心做好一個網站，將人力同物力都放喺呢度，用心去經營，好似我哋網站就係以人為本，要花好多時間管理，同會員溝通，畀人感覺有血有肉，先可以留住會員。」
所以他們不時會搞活動，與會員見面，「以前未興團購網，我哋已經搞團購，幫會員以折扣價買嘢，𠵱家都間中會有。我哋又會搞好多活動畀會員參加，好似爬行比賽、親子班等，又會贊助禮品，同埋派試用裝畀佢哋，藉此宣傳同保持與會員溝通。」
因此他建議創業者若想開設網站，首先要選擇合適的市場，「第一要睇個市場有冇足夠嘅人數，第二呢群人有冇足夠嘅消費能力，第三要能夠持續發展，所以我哋揀做親子網，因為父母無論有錢與否，都會捨得消費喺子女身上，而且人數唔會變少，加上佢哋由子女出世，會一直消費到升學，符合晒以上 3項條件。」
Rainer指曾有朋友想過做寵物，但他認為不可行，「要知道邊啲市場得，可以連續 1星期睇電視，留意啲廣告，邊類出現頻率高，好似寵物咁，最多只係賣吓狗糧廣告，就知道市場細，同消費較低。」

成功要點

專注做親子生意
開闢更多銷售渠道
做好管理及顧客服務

手機 app廣告收益多

Rainer亦會開闢更多收入渠道，像 11年便推出手機 app，已有超過 17萬人次下載，「手機 apps好受歡迎，因為好多人喺公司用唔到電腦，可以用手機上我哋網站，而且 upload相更加方便。」 Rainer坦言手機 app更是一個新商機，可以吸引更多廣告商，現時廣告收益比 4年前訪問時，增加超過 1倍，每年盈利近千萬。
近年 Rainer透過參加書展及專利展，希望把網站 logo公仔「國王」變成不同產品，多了收入之餘，又多一個宣傳途徑。「國王經過呢 10年，已經有過百個造型，我哋自己製作咗一批文具，喺書展售賣，反應都唔錯，𠵱家仲希望同唔同機構 crossover，做成唔同產品，好似舊年就做咗 megaBOX嘅商場布置。」
去年又開設店鋪，銷售兒童用品，「開鋪係我哋網上購物服務嘅延續，可以更加方便會員之餘，亦更容易同外國廠家攞批發，好似我哋攞到韓國地墊同意大利 LINEA BIMBI護膚品牌嘅香港獨家代理。今年內，我哋仲會喺 megaBOX再開分店。」

Rainer以網站 logo製作各款文具，於書展發售。

網站不時搞活動如爬行比賽作宣傳，留到一班家長客。

Babykingdom

網址： http://www.baby-kingdom.com

學製作網頁

Rainer指做網站的其中一個好處，是可以低成本創業，「好似我同拍檔由兩個人開始做，咩都一腳踢，可以控制到成本，當年就以 10萬創業。同埋最好大家識得自己製作網頁，可以省卻搵人做網頁嘅開支之餘，又可以自己 update個網站，更新同回覆夠快，先可以吸引到更多人瀏覽。」因此他鼓勵有興趣開設網站的年輕人，學習製作網頁。現時也有不少網站教人自學製作網頁，參考如下： http://www.socialwork.com.hk/homepagestudy.htm