今日好玩嘢

美術紙道

2013年01月23日 ~~ 第296期 Face

日本好多傳統技藝都會加個「道」字喺尾，好似茶道、劍道、花道等。雖然紙藝未上到「道」嘅層次，但今期《 face》介紹嘅呢位日本摺紙師，將一隻隻 Sanrio卡通人物變成摺紙版本，仲有精細到似模型嘅摺紙龍，納入為「紙道」都絕不為過。
除了日本有紙藝師，香港一樣有代表。將立體咭變到更精細，自己設計紙樣，打造出「鳥雀」、「天安門」立體咭，夠晒精采。今年新年同情人節都堆晒喺 2月中，跟兩位大師學摺立體蛇擺設同立體玫瑰情人節咭，冧完阿媽冧女友，正！

互動片段

學摺立體紙

立體摺紙靠紙樣

「行行出狀元」，呢句說話真係除咗香港之外，世界通行。好似日本咁，就有呢位「 Sanrio御用摺紙師」月森和也先生，佢由 6歲開始摺紙，由摺千紙鶴升呢到𠵱家乜都可以摺得出，最後得到 Sanrio社長睇中，請佢每日返工摺紙。今日嚟到香港示範，佢話：「立體摺紙主要係剪貼紙樣、摺同砌三個步驟。無論係簡單定複雜嘅立體摺紙，第一步一定係諗定紙樣，當然，好似想整 Little Twin Stars兩姊弟 Kiki&lala咁，就要分作唔同組件，好似頭髮一 part、身又一 part，所以難度在於要擬定晒唔同部位的紙樣。而最花時間，就係剪好晒所有紙樣同貼紙，因為好多細小折位，要好小心，反而摺紙同裝組就最簡單。」

場內仲有一眾 80年代 Sanrio卡通人物摺紙公仔，好似馬騮仔 Monkichi同人魚都見得番。

月森和也老師 6歲開始已養成見到乜都會諗吓摺唔摺到嘅習慣，大部分時間都放喺設計紙樣上面。

龍與吉蒂

摺紙師月森先生特別從日本帶晒所有得意作品到港，作為「 Sanrio御用摺紙師」，當然唔少得有呢班卡通人物。不過最特別係佢原來好鍾意摺龍，今次展品中最主打就係一條俾吉蒂騎嘅中國龍，個身仲俾 Melody、 Kurumi等 Sanrio人物纏住。（展品約 30cm高、 Kitty約 1隻麻雀牌咁高）

龍身上真係用剪紙做咗一片片龍鱗，非常立體，仲有粒 Cinnamoroll長耳狗，手工真精細。

XO黑龍

唔只有《龍珠》式東方龍，展品中仲有呢類《芒亨》成日劈嘅西方黑龍，對翼霸氣十足且有三重顏色層次，黑龍棚尖牙精細有霸氣，頭頂仲有隻 XO企鵝，唔打得都睇得。

賀年蛇仔　立體摺紙逐 step睇

為求應節，老師特別為香港展覽整咗條大白蛇，佢教路唔需要用貴價紙摺，重點係因應位置去揀選合適厚度同硬度嘅紙張。

剪紙

月森老師話蛇頭佢會用立體剪紙方式去做，以便做出蛇頭形。正常步驟係畫草圖紙樣，再慢慢跟線剪，但師傅佢憑空剪已經得，好勁。

貼紙

剪好唔同部位的紙樣，就可以用白膠漿黐埋，令紙樣變立體，蛇頭雛形終於出現。

摺紙

蛇身老師就改用摺紙形式造，一節節身體就係向內摺「 Z形」，營造出立體感。

完成

將唔同組件黐埋一齊，最後加上眼、舌頭，再整多座山仔俾條白蛇爬！

mikki吉祥立體紙藝館

展覽日期： 1月 31日至 2月 24日每日 10am至 10pm
地點：新蒲崗 mikki商場中庭位置，入場免費

吉祥紙藝工房

課程日期： 2月 8日 7pm
2月 9日 1pm、 3pm、 6pm
參加方法：消費滿$500即可參加
名額：每節 1小時，每堂 8組，每組不限人數
查詢： 3980 9930

紙雕立體咭　定情𠝹紙

睇完日系立體摺紙，想尋找本地創意，土炮紙雕工程師 Max Chow最近喺商場有個立體紙雕咭展覽，當中包括有天安門、日本神宮等精細作品，仲有應景桃花陣，唔睇走寶。今期佢仲示範點整玫瑰立體咭，情人節未諗到送咩？學嘢啦！

天安門

桃花陣

日本神宮

俄羅斯宮殿

一𠝹錯　成張紙嚟過

有成 18年紙雕經驗嘅 Max師傅，仲有出紙雕紙樣書，賣去歐美等地。佢話教人整紙雕仲難過自己整同設計紙樣，因為真係要好有耐性。

玩立體紙雕咭藝術， Max師傅話最緊要係練好刀功。因為除咗跟紙樣嘅黑色線𠝹，紙樣上仲有紅色同藍色兩種線，呢兩種線係代表住立體圖案中向內、向外反嘅摺痕，用刀𠝹時要「半𠝹」，即係做到𠝹出摺痕，但係又唔好𠝹斷張紙。「好似整鳥籠咁，唔小心手滑𠝹錯一下，就會搞到其中一條支架斷掉，做唔到立體效果，要重新嚟過。要搵紙樣去練刀功，大概練 20至 30張，先可以掌握紙雕嘅基本功。」

試整立體咭

1.紙雕工具包括美術刀、箝仔、金屬尺同墊板。將紙樣放上圖畫紙後，就用美術刀沿黑色線𠝹開紙樣，拎刀法同揸筆一樣，而且刀頭同紙約呈 35至 45度咁𠝹就無衰啦。

2.細心留意會發現紙樣上有紅色（山谷線）及藍色（山頂線）兩種虛線，呢個時候就要用「半𠝹」方式去令摺痕出現。山谷線要反轉圖畫紙𠝹，呢個時候就要將紙樣放於圖畫紙旁，對住幅圖去𠝹。

3.部分細摺位仲要靠箝整出摺痕，原來呢個時候先最難。因為好多時摺起先發現自己𠝹漏一兩條，甚至將部分需要半𠝹的線位整斷。而且部分精細位，用箝大力一夾就整斷。