新車激試

貴族旅行　 M-Benz CLS 350 Shooting Brake

2013年01月23日 ~~ 第1096期交易通．搵車快線

曾幾何時旅行車喺香港無人問津，全因揭背車尾同香港人傳統「有頭有尾」房車概念唔同，以至當年好多正嘢冇人欣賞。不過隨住車種愈來愈多，玩車嘅人乜都玩過，就唔會再咁迂腐，旅行車嘅外表以至實用性終被人接受，更成為有型有格代表。
M-Benz玩旅行出晒名， C、 E-Class Estate雖已滿足大部分旅行車迷，但如果想再豪啲、貴族 feel一啲，就一定要𥄫𥄫最近推出、以 CLS為藍本嘅頂級旅行車 CLS Shooting Brake！
連玩咗多代 E-Class Estate、𠵱家仲揸緊新款 E250 Estate嘅著名攝影師用家 William So都話要即刻試車！

M-Benz E250 Estate Spec.

引擎： 1,796c.c.直 4 turbo
馬力： 204hp/5,500rpm
扭力： 31.6kgm/2,000-4,300rpm
傳動： 7前速自動，附+/-模式
車身： 4,895× 1,854× 1,515（ mm）
車重： 1,735kg
售價：$571,700起
查詢：仁孚行（ 2895 7339）

M-Benz CLS 350 Shooting Brake Spec.

引引擎： 3,498c.c. V6
馬力： 306hp/6,500rpm
扭力： 37.7kgm/3,500-5,250rpm
傳動： 7前速自動，附+/-模式
制動：前鑽孔透氣碟、後透氣碟
車身： 4,958× 1,881× 1,416（ mm）
車重： 1,830kg
售價：$924,000起
查詢：仁孚行（ 2895 7339）

E250 Estate車主、著名攝影師 William So

曾擁有多代 E-Class旅行車嘅 William，玩過晒拉利、波子呢啲靚車，不過講到使用率最高，一定係 E-Class旅行車。「旅行車外表靚，而且最緊要係實用，我最鍾意以前 124系嘅旅行車，方形車身夠晒硬朗。」 CLS Shooting Brake蛻變自 CLS，當然冇 E-Class咁嘅硬朗線條，但好彩保留咗獨特尾沙板設計，同圓渾車尾相映成趣。

『 Shooting Brake』係解作舊時歐洲貴族打獵時嘅專用車。

William部新款 E250 Estate都只係上年 10月落地，揸咗剛好 3個月，呢個時候問佢會唔會換車又好似過分咗啲，畢竟部車除車價以外，單係 options都加咗超過 10萬，未玩夠點會換？「其實買呢部車時已知有部 Shooting Brake會出，不過個外表 style唔係太啱我，『 Shooting Brake』係解作舊時歐洲貴族打獵時嘅專用車，所以成部車由 CLS變出嚟就好有貴氣。車尾係全車重點，線條係幾靚，不過因為後座窗形狀唔同咗，就令到後車門近 C柱位隻梗窗更大隻，如果隻窗可以落晒更好！」

兩部車車尾輪廓完全唔同，左邊 CLS Shooting Brake圓渾到有啲似揭背車， E250 Estate就方好多。

新款頭燈暗藏英文字，唔細心睇都唔覺改咗。

尾沙板線條係全車精要，骨位相當突出。

叫得 Shooting Brake都有特殊身份

「 Shooting Brake」係英國貴族用嚟打獵時專用車嘅稱呼，而呢類車既然係貴族所用，當然有咁罕有得咁罕有，基本上以前叫得做「 Shooting Brake」都係訂造車，唔係有錢就買到，要有面先得！漸漸，所有原廠訂製先生產嘅旅行車，就算叫做 Estate又好、 Wagon又好，都被人叫 Shooting Brake。

全球 2部　 1967 Aston Martin DB6 Shooting Brake

英國最先有 Shooting Brake呢個名，所以以前貴族最 like向神級英國跑車廠 AstonMartin訂製，其中 DB6最罕有， 1967年只生產過 2部，目前叫價高達$350,000英鎊。

汶萊訂製　 Ferrari 456 GTA Estate

產量少又貴價嘅 Ferrari，其實一直有接訂製 order，當年就接咗一張嚟自汶萊嘅訂單，生產 7部旅行版 456 GTA，而且要求廠方做完之後唔可以再加單，令到呢款車只得 7部。

平民貴族　 Marsaretti Quattroporte Bellagio

現行嘅 Quattroporte一直只有房車版，但其實 2008年時有一間意大利改裝車廠 Carrozzeria推出過旅行版，主要係將車尾稍升高及保留傾斜車尾，產量不詳，據知車價比房車版貴約 30%。

我平時摺埋後座可以擺部唔拆轆單車， Shooting Brake一定唔得啦。

E-Class Estate本來係 M-Benz最大部旅行車，但 CLS Shooting Brake推出後就唔同講法！比 4門 CLS長多 18mm，達 4,958mm，車身高度及闊度就一樣，亦比 William部 E250長 63mm，闊 27mm、矮 99mm。明顯 CLS Shooting Brake承襲 CLS跑車化車身。「部車好矮，外表係靚，不過尾箱就有啲失望，比我部車細得多，我平時摺埋後座可以擺部唔拆轆單車， Shooting Brake一定唔得啦，而且我部車原廠可以加 2張後座變成 7人車，我都勉強坐得入， Shooting Brake冇呢個可能！」
筆者認為 CLS Shooting根本冇預你用佢去載單車，人哋話明貴族打獵車，梗係載吓野餐藤籃、 Golf袋，又或者騎馬用品呢啲嘢，咁就剛剛夠用又不失瀟灑外表。

CLS350 Shooting Brake

就算攤平後座， CLS350 Shooting Brake尾箱都只係 1,550L容量，比 E250 Estate嘅 1,950L少一大截。

E250 Estate
E250尾箱有 965L空間，大得可以加多排座位，而 CLS350 Shooting Brake正常情況下尾箱只有 590L容量。

貴價 Options顯身價

CLS Shooting Brake入門價都近百萬，買得呢款車又點會買齋車？要加 options就要玩特別嘢！ CLS Shooting Brake獨有美國櫻桃木尾箱地板，令到成個尾箱豪到好似遊艇咁，價錢亦夠勁，稅前$54,000！另外，想玩另類 options，可以考慮裝紅外線夜視系統，稅前$48,300，只需着細燈，就可以利用反射紅外線，喺顯示屏睇到前方漆黑一片嘅環境，比着大燈更有用，景物輪廓更清𥇦。

櫻桃木地板只出現喺 CLS Shooting Brake上， S-Class都冇！

夜視功能一般人少用，但住郊外或上大陸就好有用！

後座舒適過 E-Class，但上落後座都幾大鑊！

由於 CLS Shooting Brake都係建基於 CLS，所以車廂之內，中控台、前座等設備都係熟口熟面，唯獨後座由 CLS嘅兩個獨立位改為 3座位，即是全車可載 5人，而且可以攤平同尾箱貫通，一大改良！
「後座舒適過 E-Class，但上落後座都幾大鑊！我唔算好高大都撼過幾次頭！真係同 CLS冇分別喎！」另外，由於定位同 E-Class有別，眼前最入門嘅 CLS350 Shooting Brake車價都要$924,000，隨便加一、兩項 option都過百萬大關，幸而原廠已備有停車自動熄匙系統、多功能顯示屏、軚盤+/-波系統及電動記憶座椅，總算買部所謂齋版都唔會失禮人。

駕駛艙同普通 CLS完全冇分別。

「後門雖然比 CLS高咗啲，但上落車仍有撼頭機會。」

後座改為 3座位，令實用性大大增加。

前座可選配冷暖氣系統，加強乘坐舒適性。

採用軚波可為中控台下方慳更多空間，而且操作方便。

沿用舊有 350引擎，表現屬溫和派。

部車揸落好好力，而且表現斯文。

一如 CLS， CLS Shooting Brake動力配搭都有 3款，分別係 350、 500及 63 AMG，當然以 63 AMG最大馬力，達到 525匹，而 500都有 408匹。今次測試 350版本，用 3.5公升 V6、 306匹馬力引擎，輸出當然比 William部 E250大力。「部車揸落好好力，而且表現斯文，尤其避震 set得偏向舒適，如果用嚟劈彎就表現一般，但上到高速公路就正，配合大車身可以有好穩定行車效果。同我部 E250比，少咗一份靈活，多咗份穩定。」
喺石澳道一帶試車，其實整體表現同 4門 CLS冇分別，力度一樣之餘，連車身大小感覺都一樣，唔覺有傳統旅行車長車身感覺，用家大可以唔當佢係旅行車咁用，行出嚟都有幾分「 Ben跑」味。