漫遊毒物

急機迷所急！蛇年 Game政報告

2013年01月23日 ~~ 第296期 Face

想玩新遊戲，唔使好似輪公屋咁等到 2018，由於 3月尾係財政年度結算期， game廠要撐住條數，一般嚟講每年頭 3個月都特別多大作同步推出，志在人人有 game玩！
蛇年頭炮有蛇叔老友雷電擔正的《 Metal Gear Rising》，仲有《真．三國無雙 7》、《 Dead Space 3》、重製版《 Tomb Raider》……家吓嚴選必玩大作，留心睇呢幾版介紹呀！唔專心我就叫保安踢你出去！

蛇年劈蛇　《 Metal Gear Rising》

PS3、 XBox360/廠商： Konami/ 1人用/動作類/2月 21日推出/6,980yen
做特務最好當然係學特首靜雞雞起幅牆收埋自己，偷齊資料就走人，唔使同敵人正面交鋒。但對面殺到埋身，始終要出手。《 Metal Gear Rising》借用「蜜桃雞」系列人物同舞台，玩法改成明刀明槍的橫向 3D動作，你要控制生化忍者雷電，出手要快過《一代宗師》激爽劈開機械兵，再用宮家六十四手插入怪物體內吸能量。喺《 MGS》正傳做開波士嘅巨型 Metal Gear，今次將好似嘍囉咁任你劈；蛇年必玩，呢隻係 No.1！

雷電新造型愈來愈唔似人，加埋隻機械狗，想起 70年代老餅卡通《再造人卡新》。

新作中小島秀夫只屬監修，其實係外國廠製作。保唔保持到原汁原味呢？

遊戲講求劈同埋抽，抽即係從敵人體內抽嘢，比如抽血補 HP，或者好似呢張圖咁，抽條電纜出來拉倒隻巨型怪物。

千橫一直　《真．三國無雙 7》

PS3/廠商：光榮/ 1-2人用/動作類/2月 28日推出/7,560yen
功夫對戰就打到一橫一直，《無雙》一個打千個，仲唔係千橫一直啦！今集又係例牌兩年 1度新續集，除改吓服飾、加新人樂進、魯肅、關銀屏、張春華。新元素係武器增加天地人 3大屬性，跟敵將對戰時會產生相剋效果，爆出巨風或其他特殊效果增加攻擊力。光榮 game向來都貴，買咗就一定要儲齊咁多個角色唔同屬性武器嚟 hea時間，唔係就唔抵玩啦！

新角中以關公囡囡關銀屏最受注目，佢武器都係關刀一把，似足老豆。

樂進手上呢把就係記者 30年前玩膠劍仔時好流行嘅神兵「離別鈎」。

另一新角魯肅，竟然係用豬八戒支九齒把。

想玩新 title

機迷 Johnny就覺得目前 2013年遊戲時間表驚喜欠奉，最期待新 title《 The Last of Us》「大作全部都係續集，《 GTA V》都幾期待，但係《無雙 7》嗰啲我諗都唔會有太大驚喜。 PS3嘅《 Last of Us》係新 title，玩法又特別，幾期待，同埋希望會見到新主機。」

遊戲迷 Johnny

《 Last of Us》講兩父女點樣末日求生，要去到 5月 7號先出，請留意日後介紹。

殺異形保家園　《 Alien： Colonial Marines》

PS3、 XBox360、 PC/ SEGA/ 1-8人用/ FPS/ 2月 12日推出/約$299-399
講道理、講包容？當你面對緊新遊戲《 Alien： Colonial Marines》入面嘅異形，埋牙就係嚟食你落肚，霸你星球，仲講乜溝通？呢隻 game背景比較接近占士金馬倫《 Aliens異形續集》，你會操縱海軍陸戰隊去殖民星救人，雖然冇《 AVP》鐵血戰士（血獸）幫拖，但能操作各種大型機械人。啲毒過地溝油嘅鬼口水噴到埋身啦！射佢啦！

遊戲內有唔少新種異形，比如呢款無敵撞穿牆。

東北發展區　《 Dead Space 3》

新一集終加入 2人 CO-OP模式。

PS3、 XBox360/廠商： EA/ 1-2人用/ FPS/ 2月 5日推出/約$399
聽完施政報告，已幾可肯定新界東北發展區係強國人後花園，《 Dead Space 3》一樣講主角個衞星被異形入侵，死唔去後就以各種建築器材殺怪物， fans愛其肉搏血腥多過乜鬼「太空中的無助孤獨感」，今集 EA再次變本加厲，畀玩家隨意收集 parts砌武器，地雷、雷射、電鋸，想得出都有。個人覺得呢隻出得太密，不過其新武器系統真係好啱多人對戰，應該會幾受用家歡迎。

空前靚危機　《 Crysis 3》

16人「獵人模式」對戰版，有趣在擊殺後嘅對手會得到更強嘅裝備，意味住愈來愈難打。

PS3、 XBox360、 PC/ EA/ 1-16人用/ FPS/ 2月 19日推出/約$399
過去， EA呢個《 Crysis》系列都堅持要用上當代最靚畫質，要有部 high spec.電腦先玩得到。今集就變得面向群眾，唔單只出埋 PS3等家用版，畫面亦唔再單一玩「靚」，舞台從虛構嘅外星搬到末日後嘅紐約，玩盡石屎+森林同埋多變化光源，賣心思去表達何謂靚景，好過迫人買硬件打機。上兩代冇機會試，呢隻一定要買來玩吓。

2人合作爽

女槍神 Kail

先要玩科幻驚慄《 DS3》，因為新一集終加入 2人 CO-OP模式，操控兩個主角係會有唔同經歷。我會揀 360版，支援語音指令例如 reload、 ammo增加玩法！

十字弓打雀

《 Crysis 3》加入近期大熱十字弓、隱形 nanosuit，仲可搶人部機械人，對戰時有 hunter mode二人持久戰同 crash site mode搶地盤，有排玩！

開發地下空間　《 Tomb Raider》

PS3、 XBox360/ Square Enix/使用人數未定/動作/ 3月 5日推出/約$399
《古惑仔》重拍死得甘，有人批係選角失敗，故事十年如一日。咁嚟緊《 Tomb Raider》由第一集翻生重製版，一定會高評價啲。佢除沿用女主角羅拉，整個玩法都大膽改動，有古墓舞台畀你跳牆，亦有任行任走的 open world版圖，要求生、有敵人打。再講白啲，咪就係抄番《 Uncharted》轉頭囉！咁一定好玩啦！雖然冇安祖蓮娜，但 3月真係必玩！

細心睇女主角蘿拉縮晒胸，樣子後生咗，有幾分似《飢餓遊戲》。

好似蛇叔咁玩潛入，記住最終目標係尋寶，冇必要同人打。

新版羅拉夠索

電氣良品店長駒哥

2013年有唔少大作回歸，遊戲店店長駒哥就睇好一女一槍:「睇好兩大名作《 Rainbow 6 Patriots》同盜墓者《 Tomb Raider》，幾年冇新續集，老機迷特別期待。尤其係《 TR》，新版羅拉夠索， gameplay睇落有質素又有 multiplay，有望鹹魚翻生！」

殺神破枷鎖　《 God of War Ascension》

呢款遊戲主攻鬼仔市場，香港反應向來唔算極好。但 PS3獨家作，平平哋可以玩吓。

PS3/ SCE/ 1-8人用/動作/ 3月 12日推出/約$350
近排有人借神的意旨為名，行影響政治之實，《 God of War》新作《 Ascension》係一套前傳作品，年輕的主角奎托斯都不甘再受邪神欺騙，決定挑戰三大命運女神同火神阿里斯，為妻女報仇雪恨。玩法上跟上作分別不大，多人對戰時就需要搶寶石升級、打擊對手，聽外國網講其混戰打法似《任天堂大亂鬥》，好似仲吸引過 1P故事模式。

阿奴跟 Gucci潮玩 JoJo

阿奴話近年 FPS已玩到厭，好想重拾對戰格鬥。「我最愛漫畫《 JoJo奇妙冒險》再度同 Gucci合作，去中環店都有第 6代女主角徐倫 window display睇！」所以佢最推介讀者潮玩《 JoJo Stars Battle》，呢隻格鬥 game包晒 1至 7代主角，以超靚 3D去表達作者荒木飛呂彥超想像奇招怪式。「單係想像點用布差拉迪隻替身穿牆打人已經好 high，一定要試！」
PS3/BANDAI/3月 13日/2人用/3D格鬥/約$500

日廠轉玩 app

由日本 App大廠 Gree負責開發，下載香港 App Store、 Play都有嘅「 Gree」 App就玩到。（ 2013年第 1季推出）

日本手機 app《 Puzzle& Dragon》大熱， 2013年日廠繼續專心攻 app，《 Metal Gear》、《 Final Fantasy》等名作相繼 app化，就連 AKB都話要出《 AKB48之野望》，用 AKB角色玩《信長之野望》，舊酒新瓶勝在有 gimmick。