西面
Jennifer Lawrence寸爆女主角
年年荷里活有大把女星爭住上位，講到 2013年必爆女星肯定係啱啱憑喜劇《失戀自作業》，捧走金球獎喜劇/歌舞片組影后的 Jennifer Lawrence。
今年只得 22歲的 Jennifer，唔只拍動作、科幻片瓣瓣掂，演喜劇仲演到攞影后。繼金球獎後，嚟緊 2月尾更憑住《失戀自作業》角逐奧斯卡「最佳女主角」，分分鐘一箭雙鵰。不過影后其實寸到爆，唔只做學生時睇唔起同學，最近喺金球獎更大口氣話自己擊敗做得佢阿婆嘅梅姨，作風似足 G.E.M.。
年僅 22歲的 Jennifer Lawrence，出生於美國肯德基州路易維爾一個小康之家，爸爸開水泥建築公司，而媽媽就經營兒童營地。自細已唔使憂柴憂米的 Jennifer，細細個已發明星夢， 14歲已叫父母帶自己出紐約搵經理人公司簽自己做明星。
《失》片中， Jennifer死老公， Bradly失婚，搞到精神有問題，由於 2人情緒起伏大，有大把機會發揮演技，所以 2人同時被提名角逐奧斯卡影帝及影后。
片中 2人原本係歡喜寃家，但自 Bradly見到 Jennifer剝衫後，即開始心動。
奧斯卡影后大熱
06年 15歲的 Jennifer，先於美劇《神探阿蒙》等做大茄，上年演《肌餓遊戲》先開始多人識，但真正威畀人睇係 2月中香港上畫的喜劇《失戀自作業》，講述 Jennifer喪夫後卻遇上老婆走佬的 Bradly Cooper， 2個精神有問題的男女，由最初歡喜寃家，最後一齊重新振作的故事。
由於 Jennifer演繹的角色又放蕩，兼且情緒起伏大，所以發揮機會多，難怪打低老戲骨梅麗史翠普，成為金球獎喜劇/歌舞片組「最佳女主角」。
Jennifer唔只有演技，仲有身材。 5呎 7吋半的她，擁有 36C、 26、 35導彈身材，未紅前曾影過唔少水着相騷 quali！（網上圖片）
Jennifer上年打低 Chloe Grace Moretz演出有美版大逃殺之稱嘅《肌餓遊戲》，飾演殺人遊戲參賽者，而喺去年已憑此片獲 MTV Movie Awards嘅「最佳女主角」。
前年， Jennifer於大片《變種特攻：異能第一戰》中，就飾演未變奸嘅妖后一角，戲中 Jennifer大部分時間全裸演出，重要部位只用碎石同顏料遮掩，身材一覽無遺。
笑同學死蠢
戲中 Jennifer大脾氣兼口衰，真人其實一樣寸爆，原來當年 Jennifer為咗拍戲，自己發憤讀書，卒之 16歲已高中畢業，比同齡學生早兩年，有說 Jennifer恃住自己聰明，經常笑同學係笨蛋， 3年前拍《凍死骨》時，更試過教導演做戲，唔怪得最近金球獎攞影后時， Jennifer就寸爆話：「仲使講……我擊敗咗梅麗史翠普呀！多得你哋助我遇神殺神，今日先可以企喺度。」於《失》片其實演番自己，唔怪得入形入格攞影后啦！
有身材，個樣又上鏡嘅 Jennifer，一直成為大雜誌如《 Vanity Fair》及《 Interview》寵兒，經常搵佢影封面。
攞獎前掟煲
攞獎做影后嘅 Jennifer事業得意，可惜愛情失意。原來 Jennifer 10年前拍《變種特攻：異能第一戰》時，就同戲中拍檔 Nicholas Hoult撻着，起初梗係糖黐豆，但由上年開始， Jennifer開始上位，有指 Nicholas因自覺地位不及女友而自卑，最後於金球獎舉行前提出掟煲， Jennifer唔知係咪受失戀刺激，所以上台攞獎先亂講嘢。不過最近又傳出 Jennifer竟然同 Bradly Cooper假戲真做撻着， timing咁啱似係煲水宣傳多啲喎！
前年 Jennifer同 Nicholas因拍《變種特攻：異能第一戰》而撻着，最初兩人經常被影到攬埋一嚿嘅親熱照，但最近因地位懸殊搞到分手，可惜！
（網上圖片）
留言列表
{{ article.title }}
