收養我啦！

Petbook

幫烏龜找好歸宿

2013年01月23日 ~~ 第1096期交易通．搵車快線

被遺棄及受虐待的動物何止貓狗，原來被遺棄及虐龜的個案亦屢見不鮮。為了爭取烏龜的權益，由 Micheal與一班愛好者組成的香港兩棲及爬蟲協會（以下簡稱兩爬協會)，於 11年 1月成為漁農自然護理署的動物福利機構，並於 12年 1月成立領養中心，接收被遺棄的龜、蜥蜴，提供領養服務，為牠們找好歸宿。

採訪當日，記者去到香港兩棲及爬蟲協會位於觀塘的的領養中心，於約 200呎的單位內，放滿了一個個載着龜的透明水箱，行政總監 Michael說︰「我哋主要接受烏龜，另外有少量嘅蜥蜴同蛇。個會啱啱先起步，地方唔夠，呢度大約有 30隻龜，我屋企都暫養緊 50隻，都係等緊人領養。」
現時兩爬協會每年約接收 100隻龜，每月處理約 10宗領養個案，「龜大致分水陸兩種，水龜唔值錢容易被棄養，我哋收養大多數都係水龜，好似巴西龜、鱷龜等；陸龜矜貴啲，較少機會俾人遺棄。」
09年， Micheal因一次懷疑虐龜事件而加入兩爬協會，「我養龜都有 20年，喺 09年年尾，經過柴灣公園水池，見到有幾隻龜嘅嘴部俾魚鈎勾住，真係好震驚，覺得有人虐待，於是我上網周圍搵機構幫手，先發覺原來冇乜組織幫龜，最後聯絡上兩爬協會，以佢哋名義救咗 3隻受傷嘅龜，但當時都係帶返屋企收養，冇咩特別幫助，龜都係有血有肉嘅動物，想為佢哋爭取多啲，於是加入咗兩爬協會。」

平背鱷龜（接受領養）

資料：被主人棄養，性情兇猛具攻擊性，身長可至 20吋以上，不適合有小朋友的家庭飼養。

領養中心由 Micheal（右）和義工負責照顧未被領養的寵物。

我係做銷售員工作，喺上年開始養龜，上網搵養龜資料時，留意到香港兩棲及爬蟲協會，接觸佢哋之後，覺得佢哋宗旨唔錯，於是加入嚟做義工，想為龜隻做多啲嘢。

成為認可領養機構

爬協會在 Michael帶領下，於 11年成為漁護署認可的動物福利慈善機構，能接收及辦領養服務，在 12年 1月成立領養中心。現時協會約有 40名義工，負責協會中不同工作。
「待領養嘅兩棲及爬蟲類寵物，主要係義工救返嚟、被市民遺棄同嚟自漁護署，好多時市民買龜冇預到佢哋會變得好大，好似巴西龜，買返嚟嗰陣好細隻，但大咗可以去到 30cm，個缸唔夠大就唔要，有心嘅主人會交畀我哋照顧，但大多數都拎去水池放生，但咁對啲龜好不負責任。」
Michael說很多市民虐待龜隻也不自知，「坊間流行向龜擲錢幣許願或者買返嚟放生形同虐待，其實龜殼內布滿微絲血管，當龜受到硬物撞擊，一樣會痛同受傷流血。隨意將龜隻放生去水池或海，首先啲人唔理佢係淡水定鹹水，唔啱水域會好快死；放喺水池亦會造成食物不足，佢哋會餓到互相噬咬，加上水池好多菌，唔少龜都係感染皮膚病而死。」

領養者　朱小姐

我 1年前開始養龜，但唔識養，喺上網搵資料時認識到兩爬協會，義工教識我點養龜之餘，我仲知道可以領養，所以領養咗隻草龜。

龜隻亂爬容易受傷

Michael說很多市民認為龜易容養，放任牠們周圍爬導致不少慘劇，令他感到難過，「 11年 12月我哋收到市民通知，話喺觀塘一個屋邨平台有隻巴西龜嘅殼爆裂同帶有鮮血，義工即刻帶佢去睇獸醫，經獸醫初步診斷後，估計係由高處墮下，龜殼嚴重爆裂同有多處骨折，之後成個星期仲持續嘔血。」
最後安排長達 3小時的修補及固定龜殼手術，「𠵱家佢後肢仲未用到力，至少要 2年時間先可以康復。其實養龜同養貓狗一樣，要注意安全，做一個負責任嘅主人。」
11年 5月， Michael獲委任為漁護署動物福利諮詢小組委員，為改善動物政策出一分力，「兩棲及爬蟲包括蛇、青蛙、蜥蜴、蟾蜍及龜，都係有血有肉嘅生命，想多啲人關注佢哋。所以我哋不時會到學校、社會機構等舉辦講座同張貼海報，希望加深市民對兩棲及爬蟲類寵物嘅認知。另外都同政府爭取更多動物福利，好似𠵱家爭取緊成立動物警察。」

紅耳龜（俗稱巴西龜）（接受領養）

資料：被義工在公園水池救回，因曾受細菌感染，令鼻部潰爛，接受治療後現只剩一個鼻孔（見小圖）。

飛河龜（俗稱豬鼻龜）（接受領養）

資料：被主人棄養，全水棲水龜，喜歡游泳，需要較大的活動空間，可成長至 16吋長。

鬃獅蜥（接受領養）

資料：被主人棄養，懷疑被與同類打架導致四肢傷殘，只能緩慢爬動。

點先可以領養

兩爬協會於 05年成立，最初只是一個同好的交流會，但慢慢幹事及成員想為兩棲及爬蟲類動物爭取更多福利，於 07年註冊成為慈善機構，可接受捐款，到 11年成為漁護署認可的動物福利慈善機構，能接收及辦領養服務。如想到兩爬協會領養龜隻，必須符合以下條件：
1.須先申請成為會員，年費$100。未滿 18歲可由家長代為申請。
2.須出示身份證及最近 3個月有效的住址證明正本，以辦理登記手續。
3.要為寵物提供合適居所，如家中已有其他寵物，最好能有分隔的活動空間。
4.確認家中成員不會對動物過敏。
5.同意協會可致電或以家訪形式跟進寵物情況。
6.寵物生病時，必須願意帶牠看獸醫及承擔醫療費用。
7.協會不收領養手續費，但會視乎情況收取醫療開支。
開放時間：逢週六下午有義工當值，參觀前請先致電查詢。
地址：觀塘鴻圖道 33號王氏大廈 209室
電話： 2751 3533
網站： http://www.hkherp.org