娛一叮
今時今日為人父母甚艱難，唔識教分分鐘搞出個生骨大頭菜，好似早前有位小學雞，當眾對父母破口大罵上曬YouTube，咁就斃傢夥。不過太嚴亦唔好喎，46歲曾華倩02年離婚後，將成副心機同時間都放喺獨子林浩賢（Martin）身上，不知不覺做咗怪獸阿媽。
囝囝已經12歲半升中學，曾華倩繼續全天候做跟得阿媽，學校同寓所只係相距10秒車程，華倩仍堅持每日揸車去門口接放學。
有個非常阿媽到實，唔好話學壞，囝囝想有正常社交都難囉！
曾華倩96年與從事美髮產品生意的商人林肇基結婚，02年離婚，兒子Martin撫養權歸女方。為方便兒子返學，曾華倩02年買入喇沙利道35號一個洋樓單位，現時寓所正重建，兩母子租住同一條街的碧華花園，新屋與Martin就讀的喇沙書院只相距200米。
05年Martin升小一，曾華倩為陪仔適應小學生活，辭去電台的主持工作。最近曾華倩亦刻意唔接job，全力照顧今年升中一的Martin。9月8日早上，曾華倩出動去街市買餸，下午一時再揸車接Martin放學。阿媽接放學唔出奇，奇就奇在學校在屋企隔壁，相距唔夠一分鐘路程，Martin上車唔夠10秒就返到屋企。據知情者透露：「雖然佢個仔已經升中一，但華倩管得好嚴，每日揸車去學校門口接放學，防止Martin同啲同學打波周圍hea。平日個仔去邊佢都要跟住，有次同學仔約出街，曾華倩跟埋去。阿仔去過一次覺得好瘀、好冇癮，仲俾同學笑裙腳仔，之後唔敢再提出。」
匿車瞓覺等接仔
屋企喺學校隔籬
曾華倩為方便Martin讀書，多年來都住九龍塘。Martin今年升讀喇沙書院中一，兩母子更搬入距離學校只有200米的碧華花園，步行去學校唔使一分鐘，車程只需10秒，真係近到離曬譜。
逼兒子講我愛你
曾華倩箝到阿仔咁實，原來係怕Martin有朝一日離她而去，「我好珍惜接送放學呢個過程，因為個仔讀咗中學，好快唔會再有呢啲機會。我每次見到佢放學興奮跑過嚟個表情就會甜到漏。尤其係男仔，好快就唔黐媽咪。佢係我一生中完全無條件付出、無要求嘅唯一一個男人，我對佢死心塌地。」有次曾華倩對兒子說：「Martin, I love you！」Martin害羞回答：「我知啦！」曾華倩便會即場訓話：「你唔同我講『I love you』？知同講係兩回事呀！」
曾華倩從小為兒子鋪排一切，入讀喇沙小學，也是由她悉心安排。名校競爭大，惟有用鐵腕方式教仔，「從幼稚園到依家，我安排佢做嘅，佢都順住照做，唔覺得佢辛苦。可能佢未試過其他嘅教育方式，就唔覺得有問題。基本嘅規矩同禮貌一定要有，佢由細就知道，阿媽話『唔得』就乜嘢唔使再講，冇情講。」
面對學業上的競爭，曾華倩更會嚴陣以待，除了補習老師外，每逢測驗考試，她都會親自監督兒子溫習。「唔使科科考100分，不過唔可以做最差嗰個。平時佢除咗做功課同溫習，仲要彈琴同遊水。夜晚9點一定要瞓，唔會有其他娛樂。」曾華倩對兒子管教咁嚴，可能因為她出生於醫學世家，她的父親和兩個哥哥都是醫生，她也希望兒子將來是個成功專業人士。
曾華倩話將來想送兒子去英國讀書，如果真係去，睇怕曾華倩都會跟到實。
遊水叻到入港隊
Martin4歲學遊水，小學已入校隊，每次練水都有阿媽督促。今年6月，Martin在香港長池分齡遊泳比賽獲得50米自由泳銀牌，更是學界50米自由泳冠軍。據知今年底Martin更有望入到香港隊青年軍。
監督練水
9月9日下午，曾華倩又去學校接Martin放學，之後送他去沙田馬會練水。遊水後Martin嗌肚餓，落車去買麥當勞醫肚。惡媽肯俾阿仔食junk food，都算出奇。 ####
買餸等湊仔
9月8日上午11時許，曾華倩到九龍城麵包店買麵包，46歲冇化妝嘅曾華倩都算keep得幾好，係個樣惡咗啲囉！
買菜講價
唔使做嘢，曾華倩就做全職煮婦，戴住黑超去九龍城街市買餸嘅佢，原來好識同菜販講價，盡顯師奶本色。
09年人盯人
兩年前曾華倩獨子Martin就讀喇沙小學5年級，曾華倩幾乎日日都去接放學，捉實阿仔驚佢走失。
當日下午1時，曾華倩由屋企揸車去喇沙書院門口，明知阿仔兩點先放學，佢竟然用太陽擋將全車玻璃封實，匿喺車廂瞓覺等接仔。
兩點正，Martin步出學校，走向阿媽架車，瞓得好冧嘅曾華倩終於知醒。
記者仲以為曾華倩專登揸架車去接阿仔放學去街啦！點知架車唔夠10秒就駛返碧華花園屋企。
99年曾華倩與丈夫林肇基為囝囝Martin擺滿月酒，藍潔瑛都係座上客。
留言列表
{{ article.title }}
