同杜 sir唔啱傾，千嬅同仔仔又唔啱嘴形，不用埋位時眼神呆滯。
真面目
天后爭寵 錫晒高圓圓 千嬅嬲偏心 杜 sir爆粗：×！唔好講呢啲嘢！
今年 4月，楊千嬅憑《春嬌與志明》首奪金像獎「最佳女主角」，之後一口氣接了兩套戲《單身男女 2》和《曼珠莎華》。
千嬅同鄭秀文在樂壇影壇鬥足十幾年，今次拍《單 2》由 Sammi恩師杜琪峯執導，兩人首次合作，不過據聞今次找千嬅擔正，並非杜 sir原意，拍攝期間，有說杜 sir甚為偏心另一女主角高圓圓。被千嬅話偏心錫晒高圓圓，杜琪峯一聽火起，爆粗回應：「×！唔好講呢啲嘢！」咁好火，唔怪得千嬅同人呻爆，話拍完《單 2》一定要放假唞吓啦！
週日（ 29日）《單 2》中環拍外景，當晚只得楊千嬅、周渝民同古天樂，欠缺高圓圓，杜琪峯全晚口黑面黑，同千嬅完全無偈傾。
高圓圓得寵
《單》香港票房高收 1230萬，女主角高圓圓在《單 2》繼續擔正，但因為寰亞投資，千嬅在開拍前已放風想和杜 sir合作，結果如願，戲分仲同高圓圓不相伯仲。
但正所謂先入為主，杜 sir都特別關照高圓圓，加上千嬅從來不屬其御用班底，所以片場內兩人自然冇乜交流。上週三（ 25日），千嬅和高圓圓在觀塘街頭拍攝《單 2》外景，兩位女主角都各有各做，而杜 sir只在鏡頭前指揮。知情人士說︰「杜 sir一直只用 Sammi，今次同千嬅合作真係第一次，兩位天后鬥足咁多年，杜 sir幫邊個唔使問啦。」
雖然被杜 sir忽視，但千嬅拍戲有助手、化妝師陪開工，起碼有人講吓笑。 
當日《單 2》外景，杜琪峯全晚黑口黑面，連古天樂都遭殃，杜 sir親自教戲，古仔就一臉無奈樣。 
由開工到收工，楊千嬅和高圓圓都冇任何交流。 
杜 sir一嗌 cut，千嬅就放鬆晒，反而高圓圓就 keep住情緒。
激氣放假
鄭秀文是杜琪峯愛將，兩人合作過不少電影，今年《盲探》亦是杜 sir為 Sammi設計角色。
一直以來，鄭秀文和杜琪峯交情不淺， Sammi更是他的愛將，兩人多年合作過無數電影，由《瘦身男女》到今年上映的《盲探》，杜 sir都有心幫 Sammi登上影后；而千嬅和 Sammi出道以來一直傳不和，杜 sir對千嬅有偏見亦在所難免。
據知早前千嬅出席活動時，就句句有骨呻爆：「拍完呢兩部（《單 2》和《曼珠莎華》），我一定要放假，再唔放假我會發癲，最少放一個月。」
本週一（ 30日），本刊致電杜琪峯，問他是否偏心高圓圓，他聽到即時爆粗，他說︰「×！唔好講呢啲嘢，唔識答！」嘩！杜 sir呢排拍戲真係拍到好燥喎！
四女一男
《單身男女》由古天樂、高圓圓同吳彥祖主演，香港票房高達 1230萬。 
《單身男女 2》繼續由古天樂、高圓圓擔正，還加入楊千嬅和周渝民，大玩四角關係。
人夾人緣
娛樂圈最緊要人夾人緣，好似鄭秀文同杜琪峯、楊千嬅同彭浩翔。 10年千嬅接拍《志明與春嬌》，因為戲中有大量粗口對白，根據《電影檢查條例》被列為三級。幸好網民大力支持宣傳，上映一個月後獲得 700萬票房。
12年，千嬅再接拍同彭浩翔的《春嬌與志明》，創下 2,700萬的票房紀錄，更憑此片首奪金像獎「最佳女主角」；之後彭浩翔的《低俗喜劇》，千嬅又肯客串一角；今年再接拍彭浩翔新戲《曼珠莎華》，合作無間。
楊千嬅同彭浩翔合作無間，還在《低俗喜劇》一片客串平機會專員一角。 
楊千嬅憑《春嬌與志明》首奪金像獎「最佳女主角」，成功晉身影后級人馬。 
為報答彭浩翔，楊千嬅今年接拍《曼珠莎華》沒有加片酬，未知可否為千嬅的事業再下一城呢？
採訪、撰文：娛樂組
攝影：娛樂突發組
留言列表
{{ article.title }}
