面對面
愛的逃兵 唐詩詠
不管電影還是電視，與其來來去去那幾個，我更渴望見到新面孔。
彭氏兄弟的《逃出生天》總算肯嘗新，用唐詩詠配古天樂。
雖然不是第一次拍電影，不過第一部 3D災難鉅製、第一次配一線男星，我認為，這一次對唐詩詠來說，不只是事業邁出一大步，終於與沒完沒了糾纏了 8年的「邦女郎」身份說再見、男主角從崔建邦換成古天樂，才真正是「逃出生天」。
對於新緋聞，唐詩詠說：「因為太假，所以不生氣。」
對於前度，唐詩詠說：「咁多年，大家都抱住追劇嘅心態去睇呢段感情，揣測總比事實多……其實，我唔係大家想像中咁易恰……」
32歲，入行第 13年，唐詩詠才剛剛學會 say no，拒絕再提崔建邦，被問到現在的感情狀況，照搬新拍檔古天樂多年最愛說的兩個字：「唔講」！
雖然用起來有點生硬、說完了臉有點紅、需要大笑兩聲圓場、然後轉個頭再問又故態復萌照答，不過，對 8年都沒法從崔建邦身邊逃開的唐詩詠來說，總算是個新開始。
多一事，不如……
唐詩詠， 99年 18歲開始做𡃁模，二千年參演港台青春劇《青春@Y2K》。
同劇的余文樂、蔡卓妍先行上位拍電影、做偶像歌手，唐詩詠遲了一步， 03年簽約無綫做電視台。
好處是長期有工開、有鏡出；壞處是外形太 true、太 pure，就變成電視台「阿妹」專業戶。做了七年人哋個妹，才等到李添勝邀拍《鐵馬尋橋》掃埋飛躍獎，再等三年，才熬出頭被古天樂相中拍電影……演員都愛說，最難的，一直都是：等。
「頭幾年喺電視台，最迷惘、最灰心，每次接到劇本一睇：吓……又係人哋個妹……又係嗰啲嘢……
我記得第一個改變我諗法嘅人係陳國邦，係佢教識我問自己：到底係每個角色似、定係我自己嘅諗法每次一成不變？做演員，收到劇本唔應該係埋怨佢太似過往，應該諗吓點樣做到佢唔似。
2009年，係我嘅轉捩點，陳國邦點醒我用唔同角度睇事情；添哥（李添勝）搵我拍《鐵馬尋橋》，第一次有人見到我可以做阿妹以外嘅角色；媽咪因為心臟病去世，令我拍喊戲喊到收唔到聲，先至會得到『飛躍進步』獎……以前細個唔知，人長大就明白，做人嘅成就原來唔係個人功勞，係身邊嘅良師益友同伯樂嘅功勞，咁多年，添哥係我喺電視台嘅伯樂，古天樂就係我喺電影圈嘅伯樂。」
《逃出生天》電影未上畫，緋聞先上演，有傳古天樂看中唐詩詠五官酷似舊愛黃𨥈瑩，特此欽點參演《逃》演情侶：「係古天樂向導演提議搵我，呢個係真，不過緋聞係假……我係嗰種多一事不如少一事嘅人，最怕做新聞女主角，不過慢慢都由唔慣到慣，反正係假，怕咩你哋講？」
《逃出生天》戲裏，是古天樂的未婚妻；戲外，被傳是古天樂的新歡，唐詩詠話：「好假！」。 
唐詩詠對上的劇集話題作，是《神探高倫布》喪小三「梅妹」：「添哥（李添勝）係我伯樂，次次都夠膽畀我試新嘢。」
接拍《鐵馬尋橋》同年，母親因為心臟病離世：「所以我拍劇時喊得特別投入，嗰年係我事業轉捩點。」《蘋果日報》圖片 
99年開始做𡃁模，二千年與余文樂、蔡卓妍合拍港台劇《 Y2K》，余文樂當年未搭上盧巧音前，與唐詩詠是一對。《忽然 1周》圖片 
10年獲得台慶夜「飛躍進步女演員」大獎，唐詩話獲獎作《鐵馬尋橋》監製李添勝是第一個不用她做「阿妹」的伯樂。《蘋果日報》圖片
生日，要留給……
話說 09年，唐母因為心臟病離世，事發前一點先兆也沒有。
突如其來失去母親，唐詩詠說，讓自己一夜之間成長、也在一夜之間看清楚人生的目標：不是最佳女主角、亦並非最佳男朋友，要的，就是一個完整的家，僅此而已。
「哥哥結咗婚、阿嫂又有咗 BB， 11月就生得，爹哋亦都返咗香港，咁多年，啱啱過嘅中秋，最有家嘅味道……細細個，爸爸就同媽咪分開，爹哋喺大陸做生意、媽咪周圍走傾保險，小時候嘅記憶，永遠得我同阿哥。到出嚟做嘢，我要搵食、媽咪又要搵食，好唔容易，會喺工作同工作之間攝個 break、見個面，有時實在夾唔啱，就惟有同大家講：咁下次先啦……
其實做人未必有下次，所以我覺得個天送咗個最好嘅安排畀我，就係喺媽咪最後嗰幾個月，我唔使開工、媽咪又要日日覆診，每日由我揸車，由九龍塘送佢去香港仔睇醫生，𠵱家諗番，嗰幾個月，得我同媽咪，嗰一刻寧靜嘅車程，就係我最幸福嘅日子。喪親，有啲人可能好快回復， sorry，我唔得，無謂太唔專業失控，我到𠵱家都冇辦法接母親節騷； fans咁多年都想幫我搞生日會，我都唔可以喺正日滿足佢哋，嗰日太特別，一個人我會易過啲；媽咪話自己喺鄉下福州係千金小姐，我一直都唔信，直到佢葬禮嚟咗好多親戚，我先至知佢原來唔係吹水……所以咁多年，我都冇辦法再睇《 Big Fish》（大魚奇緣），我諗因為我放唔低，所以媽咪都唔捨得去投胎，呢幾年我覺得佢一直喺身邊冇走過……佢以前好鍾意跟住我開工，我𠵱家就擺咗佢張相喺銀包，去到邊都畀佢跟住我。
以前佢好鍾意挑剔我，話我髮型有問題、話我做戲鍾意皺眉，好煩㗎……但係𠵱家真係好想有個人煩住我，做完戲好想知：唔知媽咪睇完，又有咩想哦我呢？」
時間、人物、地點……
唐詩詠說，母親去世的時候還把自己當小女孩，怕她吃不飽、穿不暖、被人欺：「佢同好多人都擔心錯，我同媽咪一模一樣，外表柔弱、唔多出聲，其實 tough喺入邊，絕對唔係易恰！」
說得對，「易恰」無疑就是唐詩詠的性格和經歷神髓，前男友崔建邦一而再再而三犯下了天下男人會犯的錯，唐詩詠還是守在身邊。甚麼「不捨不棄」、甚麼「不論貧富」，這些總是與唐詩詠畫等號的形容詞，她說是追劇觀眾的一廂情願，她說「邦女郎」亦有落畫的一天。
「我明，咁多年我都係得佢一個，大家唔多唔少都抱住個追劇心態……但係太多嘢係別人強加落去，真正屬於我哋兩個嘅嘢已經太少。其實兩個人嘅事，外人會知咩？其實我係唔係真係咁柔弱？唔係囉……會唔會再做番情侶，我唔敢講。可以講嘅係，今年我 32歲，嗰個啱嘅人、啱嘅時機仲未喺我身邊出現。就算喺，我都唔希望喺𠵱家。最終，我都係想要一個完整嘅屋企，畀我嘅小朋友自己細個最缺乏嘅關愛，到我結婚生仔，一定就會徹底同呢行講 bye bye，所以，唔該， Mr. Right唔好出現住，我仲想為自己努力多幾年先！」
05年做《 K100》主持與崔建邦撻着，多年來男方爛滾、醉駕又打女人，都有唐詩詠在身邊：「不離不棄係外人講，其實我哋兩個嘅嘢你哋永遠唔會知。」 
唐詩詠一向專一少緋聞，是宅男及父母輩最愛女朋友人選，曾經被傳被陳宇琛力追，更深得陳父石修歡心。《蘋果日報》圖片
潛力股
新電影、新造型、新對手、新緋聞……站在面前的唐詩詠，確實有點脫胎換骨的意思，不再是那個混身上下電視味的人哋個妹。
外表柔弱，內裏堅定，全民都愛替她打抱不平……我左看右看，覺得唐詩詠很有大婆氣質，很適合做港版《犀利人妻》、 2013版《再見亦是老婆》。
韓劇拍極唔厭的題材、全人類最易投入的小三恰人妻橋段、《再見亦是老婆》播完 19年囉，無綫開劇、唐詩詠主演，我睇好係潛力神劇、我擔保會捧場喎！
撰文：朱小博
攝影：范仲良
化妝： Jessica Chan
髮型： Nick Lam（ pi4.com.hk）
形象： Sarona Lo
服裝： EQ:IQ、 Karen Millen
留言列表
{{ article.title }}
