潮𡃁便當

抵食大閘蟹套餐即時 check in

2012年10月03日 ~~ 第280期 Face

最近在湖南長沙，一名女子僅用保鮮紙蓋體，抗議內地互送大閘蟹之歪風。
撇除送禮一說，傳統中秋過後，又是大閘蟹當造季節，以往，吃大閘蟹是有錢人專利，但時至今日，已變得愈來愈普及，豐儉由人，市面仲推出各式套餐，一個價錢食齊幾樣嘢，今期就帶大家一齊 check in！

樂雅軒　 3層米網盞夠特別

前身為 YMCA的城景國際酒店，中菜廳樂雅軒幾乎每年都會推出大閘蟹套餐，今年一個八餸大閘蟹套餐有肉有菜有湯有薑茶，最低消費$328一位。除了重點必食的紫蘇葉蒸大閘蟹及蟹粉雜菌米網盞之外，選用阿拉斯加的蟹肉絲、豆腐、萵筍以及話梅碎煮成的玫瑰話梅蟹肉羮，酸酸甜甜，味道清新，有別一般湯羮，同樣值得一試。

以 3層米紙慢火炸成，唔似一般餐廳用春卷皮，更鬆脆持久，配合蟹粉、蟹籽以及用雞髀菇、鮮冬菇和白菌炒成的雜菌一齊進食，汁香四溢、爽口鮮味，絕配！

冰震皇帝鮑片以碎冰坐底，加入檸檬汁、生菜及青瓜絲，特別開胃。

呢個蟹肉羮仲會加上幾滴玫瑰露帶出香味。

蛋炒飯炒得粒粒分明，巧妙用上蝦仁蝦乾，入口鮮香，加埋大白菜粒，好好咬口。

菜式數目： 8款

Menu
冰震皇帝鮑片
蟹粉雜菌米網盞
玫瑰話梅蟹肉羮
紫蘇蒸大閘蟹（ 1隻 5両）
仙骨湯津膽浸斑球
黑松露醬遼參炆雞
雙蝦菜飯
圓肉桂花薑茶
$328 1位起
餐後點評：以酒店餐廳來說，$328價錢菜式選擇算係多。

桂花薑茶同飲花雕作用差唔多，食完蟹，飲番口加咗龍眼肉嘅老薑茶，即時暖胃。

樂雅軒
地址：油麻地窩打老道 23號城景國際 1樓
電話： 2783 3286
營業時間： 11:30am-3:00pm; 6:00pm-11:00pm

鴻星海鮮　花膠絲蟹粉翅夠足料

鴻星年年都會推出大閘蟹套餐，未到中秋已經日日有人問，今年大閘蟹套餐兩位起$365，一個人有三隻蟹，兩皇一后，仲係足 5両嘅江蘇大蟹添！套餐仲包括加咗花膠熬煮的蝦仁蟹粉翅，杰杰哋，唔似坊間蟹肉魚翅羮又淡又稀，一睇就知足料。

點先為之靚嘅大閘蟹？聽鴻星的高級廚部何師傅講，腳毛呈金色，就係好嘢！

原來食大閘蟹都分次序，通常會係公蟹、母蟹、公蟹咁食，因為公蟹膏較甘香，較滑，母蟹膏較結實，等味道可以隔一隔。

松露炒帶子加入蒜蓉、乾蔥去炒，蒜香十足。

飄香臘味飯臘肉多到唔使錢咁，一咬成口臘味香，好滿足！

大閘蟹性寒涼，多吃對身體不好，花雕就可以幫助驅寒，甜甜哋，佐大閘蟹食啱晒。

菜式數目： 8款

Menu
江蘇大閘蟹（每位 3隻•兩皇一后• 5両）
蘇杭雙秀（翡翠珍珠脆及芝麻海白菜）
蟹粉蝦仁羮
松露炒帶子
蟹粉小籠包（每位 1隻）
飄香臘味飯
精美甜品（視乎當日甜品而定）
廿年花雕皇或橙汁（每位 1杯）
$365 2位起
餐後點評：價錢超值，餸菜款式多達 8款，每款以蟹命名的菜式中間，都會以其他菜式分隔，最後仲會送埋甜品，好圓滿。

鴻星海鮮酒家
地址：灣仔港灣道 8號瑞安中心 1樓
電話： 2628 0989
營業時間： 10:00am-11:00pm

知味舍　特色江南小菜夠特別

位於銅鑼灣樓上店的知味舍，面積僅千餘呎，但環境清靜，名人好似郭富城、張震等都去。乘着大閘蟹當造，知味舍的四位用大閘蟹套餐，盛惠$680，即除開每人$170，除了食到陽澄湖大閘蟹，還可享用由上海菜心整成的「萬年青拼熏蛋」以及用杭州辣椒及杭州茄子炒成的小菜，小菜式大心思。

「萬年青」即上海菜心，由店主專誠從上海訂貨，入口較爽；熏蛋熏至啱啱熟，蛋黃液中帶膏，入口甘香即融。

東坡肉跟夾餅的餅皮由店主親自用麵粉搓成，厚度適中，包埋東坡肉一齊食，肥而不膩。

辣椒茄子全部來自杭州，但辣味溫馴，唔怕食到噴火。

雲吞一般都以湯浸為主，但此生煎菜肉雲吞卻用煎的方法，點埋醋食就更佳。

特選來自江浙一帶，包括陽澄湖及太湖的大閘蟹，冇花冇假，品質有保證。

菜式數目： 5款

Menu
清蒸大閘蟹 3隻（一隻 3両半）
萬年青拼熏蛋
東坡肉跟夾餅
杭椒茄子
生煎菜肉雲吞
$680 4位用
餐後點評：菜式特別，地方骨子，店主不時逗客人談天，充滿人情味。

知味舍
地址：銅鑼灣渣甸街 50號渣甸中心 8樓
電話： 2881 6333
營業時間： 11:30am-3:00pm； 6:00pm-10:30pm

中華紅之寶　大閘蟹膏爆晒黄

食大閘蟹套餐，有人鍾意多元化，大閘蟹之外，有魚有肉更好，但有人就鍾意蟹到底！中華紅酒家的套餐三寶都圍繞蟹，絕對滿足蟹迷需要。由於大閘蟹生性頑皮，烹調時會不停掙扎，影響肉質，所以必須以猛火去蒸 15分鐘，確保肉質保持高水平。

清蒸大閘蟹蟹膏黃澄澄，色澤吸引，入口鮮味甘香、十分嫩滑。

蟹粉翅方面選用青片翅，翅身不會太長，而且刺針密，滑嫩有嚼勁。上湯仲加咗赤肉、老雞同金華火腿燴煮而成，味道濃郁。

採用蟹粉及鮮豬肉為餡料，每隻小籠包均由師傅親手包成。

菜式數目： 4款

Menu
大閘蟹粉翅（ 1位）
蟹粉小籠包（ 1個）
清蒸大閘蟹（ 1隻 5両）
冰糖老薑茶（ 1杯）
$238 2位起
餐後點評：提供 3款菜式，對於喜歡淺嘗即止的朋友也可。

中華紅酒家
地址：尖沙咀加連威老道 94號明輝中心 1樓 101-105號鋪
電話： 2367 0038
營業時間：星期一至六 11:00am-00:00am；星期日： 10:00am-00:00am