漫遊毒物

對決　 FIFA美斯 vs香川 Winning

2012年10月03日 ~~ 第280期 Face

歐國盃列強重排名次，轉會市場更係變動甚多，玩家對今年嘅足球遊戲都倍感興趣。兩大足球遊戲班霸《 Winning Eleven 2013》同《 FIFA13》都深知不能怠慢，封面大戰《 FIFA13》從對手上搶得球王美斯過檔，而日 game代表《 Winning Eleven 2013》就食住香川真司成為紅魔新寵，喺香港、日本推出曼聯鐵盒做紀念品，香港 Sony官網開訂 5分鐘被掃清！今個星期兩隻 game都出晒喇，即刻試吓佢哋水準及唔及得上封面咁正！

FIFA 2013
機種： PS3、 XBox360
廠商： EA
種類：足球
人數：單機 1-7人、網絡 2-22人
售價：$399

Winning Eleven 2013
機種： PS3、 XBox360
廠商： Konami
種類：足球
人數：單機 1-7人、網絡 2-8人
售價：$448

鬥腳法 WE 2013 WIN

近幾代足球 game講求像真度，操作方法愈趨複雜，扭波難度大增，《 FIFA13》繼續求真，引入全新嘅 first touch物理效果，加速跑時接應傳球，分分鐘推到個波九丈遠，浪費單刀機會。《 Winning 2013》（下稱《 WE》）就適合追求大手上落、漂亮進攻嘅人，佢將操作化繁為簡，棄用右桿 chok招，只需按住 R2/ RT再加左控桿推方向，就可以做到搓波同直角假身！個人玩後覺得《 FIFA13》啱資深玩家，《 WE2013》就較 user friendly、易上手，呢 round佢贏！

FIFA13玩聲控
《 FIFA13》特別強調 first touch，第一吓控球會有好多新動作，建議大家控球前減速會黐腳啲。

WE 2013回歸舊操作
《 WE》回歸舊式操作，但整體感覺物理表現有進步，玩得順手之餘動作亦靚咗、皮球彈道同球員動作都合理可信。

鬥新意 DRAW

XBox 360版《 FIFA13》引入 Kinect聲控功能，可以嗌咪轉戰術，試過嗌「 Switch Wings」兩翼即刻換位，過足領隊癮。最搞笑係可以爆粗鬧球証，資料話鬧得多會罰勁啲，但都係趣味居多冇乜實際功用。
反而《 WE》就加入咗幾實用嘅 360度全手動傳射波，按住 L2/LT睇到球員腳下有箭咀，呢個時候射波同傳波都會跟箭咀方向踢，射近柱或遠柱更加自由，用得好真係陳七都可以射到變韋拿。一個有諗頭，一個夠實用，算打成平手喇。

FIFA13Kinect玩聲控
Kinect主要聲控操作以戰術調動為主，可以用口嗌越位戰術，操作上有一定便利性。

WE 2013360任射
以前有類似操作，但有箭嘴輔助，成件事更實用，仲可以喺設定隱藏箭嘴避免對手捉到路。

鬥齊腳 FIFA13 WIN

球迷打機反而在意可用嘅球會夠唔夠腳，《 FIFA》向來揮金如土，論齊腳依舊有絕對優勢。《 Winning Eleven》有西甲、意甲全授權，反而英超就只剩曼聯用真波衫，加上仍然冇買德甲版權，獨家歐冠盃模式中，總決賽車仔 vs拜仁兩邊都係假人名假波衫，好在香港好多勁人做 data畀人抄 save，影響不大。

尼馬：髮型跟到足

《 WE》授權最大進步係加入南美隊，巴西 MK球星尼馬嘅山度士都有，個髮型又幾型仔。

WE 2013

美斯：跳槽但在生

WE 2013

雖然美斯冇再代言《 WE》，但西甲依舊全授權，大家都仲可以用到巴塞同皇馬嘅真波衫。

C朗：真係會黑面

《 FIFA》球員表情多多， C朗輸咗波之後即刻黑面，不過面形就做得唔太似。

FIFA13

普度斯基：近鏡超像真

阿仙奴新援普度斯基入咗波之後慶祝，雖然睇落 feel唔到佢開心，但《 FIFA13》球員近鏡真係有進步。

FIFA13

鬥模式 DRAW

今集兩邊都冇新模式，《 FIFA13》保持住香港 fans深愛嘅 2大網絡元素 Ulitmate Team同 Pro Club，如果鍾意同人上網打嘅話，真係不二之選。《 WE》重點強化 Master League同育成玩家分身球員嘅「一球成名」模式，引入全新道具元素，可以買球鞋、讀課程增強實力，育成要素更強，鍾意單打應該啱玩。