Geek友講場

大面泡菜 Vs長方蘋果

2012年10月03日 ~~ 第280期 Face

iPhone 5喺香港開賣唔夠一星期，死對頭 Samsung即刻嗱嗱聲推部旗艦作 GALAXY Note II見街，仲特登相隔一星期開賣，扮晒壓軸登場！今次 Note II個芒繼續變大，對比 iPhone 5個 4吋長芒，明顯大一截。再鬥規格，就一個有新掣、一個有 4G，實惹起班 AnDog同 iFanBoy嘈邊部至係機王。但大前提係，究竟兩部機有冇炒貴晒？真心用家，有冇辦法入手，定有排等先有機都好重要。

互動片段

直擊發布會

Samsung GALAXY Note II簡約到港

Note II大把人 like，使乜再整色整水，係咪先？（設計對白）

上個月德國 IFA焦點新機 Note II，終於殺入香港搞記者會，不過睇排場，佢竟然唔似 GALAXY S III同 Note 10.1喺五星級酒店大搞，而改喺舊會展搞。加上見慣嘅超長投射屏幕冇咗，連韓國高層亦冇飛嚟香港，感覺失色少少。介紹部分，就唔似 GALAXY S III有趙增熹彈琴同台灣美眉表演沙畫，增加睇頭。好在對筆者來說 demo機安排充足，現場女模又有睇頭，即使遲近 40分鐘開始，都可見誠意唔錯。

Spec.

系統： Android 4.1 Jelly Bean
處理器： 4核心 1.6GHz、 2GB記憶體
制式： 3.5G、 GSM
屏幕： 5.5" 720× 1,280 HD Super AMOLED
鏡頭： 800萬（後）、 190萬（前）像素
記憶：內置 16GB、最高 64GB microSDXC
顏色：白、灰
體積： 151.1× 80.5× 9.45mm
重量： 181.6g
售價：$5,698
查詢： Samsung（ 3698 4698）

香港發布會
場地唔大，筆者想搵個位都難，不過比起 IFA發表會嘅大場面，始終差少少。

德國 IFA（路透社圖片）

估唔到落到街邊，仲見埋 Samsung嘅易拉架，更請咗 model企定喺旁邊，引人望多個 banner兩眼。

現場 5位 model，個個外形吸引，高度仲係標準模特兒要求，吸引度拍住 Note II。

我都想買！

《 FACE》 Gadget版監修人 903 DJ Donald

其實我覺得 Samsung真心勁，自己都忍唔住買部 GALAXY S III。我都信 Note II真係可能好賣過 iPhone 5，除咗功能勁價錢平，仲要你真係買到。 iPhone 5出到今日都唔係個個人抽到呢！我都想買 Note II呀！

先達 Lo哥

「 Note II同 GS III一樣，都係因為頭一水少貨而炒貴幾百，不過聽講 Note II會快啲返貨，唔似 GS III嗰時隔好耐先有大貨，所以估計炒價唔會 keep好耐。」

炒過$6,000

到底 Note II係咪真係咁勁？最好證明就係市場反應！未出機前，大至電器鋪、細至先達鋪已搞預訂，幾大台仲靠佢拉客上台；到上週五（ 28日）出機日，先達最高炒到$6,080（灰、白色同價），而賣正價嘅大鋪就好多賣斷，要訂機先有貨。咁嘅場面，今年只得 iPhone 5、 GS III同 Note II出現過，足見手機界龍頭地位。

SmarTone、 3HK、 PCCW等台都有為 Note II出 plan，價錢同條款大致同 iPhone 5相同，市面買唔到正價機可考慮上台，但劏機冇錢賺，炒家可以慳番。

芒大．機細

Note II有 5.5吋高清芒，比上代再大 0.2吋，好擔心女 user會唔會覺得 over咗。好彩佢用咗超貼邊設計，機身闊度得 80.5mm，比舊 Note嘅 82.95mm仲細咗，睇女 model拎機講電話，感覺唔突兀，正！再睇支升級 S Pen，以往已經係 gel甲女生恩物，今次變得更粗更長，手感更好。呢支筆仲加入畫圖指令，以後只要喺芒畫個公仔，就可以叫佢 send email、打電話，認真方便。最抵讚係加入 S Pen遺失提示，放低 S Pen帶走部機約 10米，手機就會有聲響提示，失暈魚最 buy。

筆插收喺機底，仲可以追加指令，好似一拎出 S Pen就開啟 S Note，即刻記事，夠晒方便！

唔使篤實部機都可以喺芒上見到個小圓圈，顯示支筆嘅落點。

窩心新功能

iPhone 5新功能全來自一早登場嘅 iOS 6，驚喜欠奉。 Note II就小勝一仗，除遺失提示、畫畫指令之外，整理相片有新嘢玩，好似打開媒體庫，想喺一大堆 folder內搵番張相，就可以用 Air View功能。拎支 S Pen喺畫面上凌空定一定， folder即時彈出相片數張縮圖畀你預覽。最實用仲有新加 Photo Note，平日影相定位可以記低拍攝位置，到用 Note II開番張相，就可以喺相片背面畫上唔同資料，畀你記低張相嘅特別意義。將成部 Note II變身「心情記事簿」，好窩心。

Air View

個芒離遠都可以 sense到支筆頭對住邊，等你唔使篤實個芒都可以打開 folder，預覽縮圖。

Easy Clip

上代大讚剪貼功能，今次再升呢，按實筆上按鈕畫出想剪下嘅圖案，就識即時幫你 save去 S Note，唔使再先 cap畫面，後開 S Note剪咁麻煩。

Photo Note

影完相反轉背面就可以寫筆記或者畫公仔，相片仲可以變成浮水印畀你望見，好 sweet！

睇相新介面

媒體庫仲有全新介面，一個玩旋轉樓梯式擺相，一拉啲相就好似龍捲風咁轉上去；另一個就玩逐層顯示，相片分晒層次，冇咁花。

試相

唯一較失望係影相功能冇乜大改進，試喺低光環境下拍攝，對焦都叫快，不過雜訊問題幾嚴重，係咪要用家買埋 GALAXY Camera先？

三禾電氣 Simon：「韓版水機有價有市」

呢期興玩韓版水機，貪佢早一步有 4G玩，今次 Note II嘅 K同 S版一樣行香港 4G嘅 1800MHz，最快應該今星期到貨，價位可能平行貨少少，但內存就有 32GB，令水機店三禾電氣嘅 Simon都睇好：「呢部 Note II韓版機竟然遲過港版到，但點都會返貨。大把客想要，因為覺得韓機大多數零件 made in Korea，呢點好多客 buy。」其實發布會當日，都有公布行貨 4G版 10月賣街，所以用家今次幾多選擇。

《蘋果日報》圖片

韓國 Samsung官網已寫明， Note II韓國型號 E250S同 E250K會支援 LTE 1800，而香港行貨暫時就先賣 3G版。

最強對最強　 Note II Vs iPhone 5

Note II同 iPhone 5前後腳推出，冇理由唔拎兩部機王比一比。雖然前面已介紹晒 Note II嘅 S Pen等獨家強項，而 iPhone 5嘅新功能亦喺上期試過晒，但兩部機屏幕 size都比上代有所改變，無論解像度、畫質，甚至好唔好揸手，都需要再試清楚。而且 iOS 6剷走 YouTube同 Google Maps後，代替品同 Android機又有幾大分別，大家都好關注，一於來個最強比併啦！

雖然目測都見到 7.6mm嘅 iP5薄過 Note II唔少，但因 Note II機邊係弧形，所以實質拎上手唔覺太厚。

試睇網

Note II
唔只顯示到晒全版香港 Yahoo!首頁，仲睇得到啲字仔，大芒就有呢個好處。

iPhone 5
4吋芒始終唔夠大，只顯示到 8成 Yahoo!首頁，而且啲字細到蚊滋咁，睇唔到。

試舊 app

Note II
舊 Note因屏幕係特別怪嘅 16:10，開唔少 app都有黑邊，但 Note II係正宗 16:9，多數 app都支援，可以 full screen用盡個芒！

iPhone 5
暫時多數 app用於 iP5都會上下出現黑邊，要等班開發人 update到 16:9先會變番正常， facebook已搞掂，但微博就未搞。

試手感

Note II
筆者對女仔手用 Note已經要雙手用， Note II再長少少都冇關係，因為單手揸手指公一定掂唔晒對角嘅 icon。

iPhone 5
iP5長咗少少，手感同 4S分別唔大，女仔一手可以掂晒對角 icon，只係手指公下面嚿肉較飽滿的話，有時會掃到下方最邊個 icon。

試 YouTube

Note II
用番預載 YouTube冇問題，一切照舊，兼且揀片時介面可轉橫度，睇 16:9片亦係 full screen。

iPhone 5
iP5要另外裝番免費 YouTube app先能直接睇片，但除播片時，其餘時間只有直度介面。非 WiFi連線會自動降低畫質，睇 16:9片時更加四面黑邊。

試地圖

繼續舒舒服服用預載 Google Maps，個芒大咗地圖廣闊咗，大家 happy。

新嘅自家地圖乏善足陳，淨係得街名，連出名大廈都冇記載，搜尋地方更多數都搵唔到。

裝 web app用 Google Maps

家陣 iOS個地圖，香港好似回歸石器時代一樣乜都冇，好彩外國網一早有教人安裝 web app。裝好首頁就會有番 Google Maps icon，一㩒就會經 Safari開 web版 Google Maps，有以前 9成咁方便，唔使再捱 Apple個地圖！

安裝 step

先喺 Safari打 maps.google.com.hk網址進入 web版地圖。

首次開介面下方會彈個 bubble出嚟叫你裝 web app，跟指示做就得。

之後再喺底部 menu中間箭嘴 icon，會見到已裝嘅地圖 web app，篤一篤就可以加到首頁。

跟住首頁就多咗 Google地圖 icon，一篤就開 Safari睇 web版地圖，係差在冇 street view。

試畫質

Note II　 16:9再冇黑邊
上一代 Note個 5.3吋芒係 16:10，睇 16:9影片上下會有黑邊，但 Note II個 5.5吋芒比例其實拉長咗少少，變番真正 16:9（ 1,280× 720），睇片冇黑邊。而且 Super AMOLED屏幕顏色，繼續比 iPhone 5鮮艷，睇《一路向西》 trailer啲紅紅綠綠畫面特別搶眼。

iPhone 5　細芒都夠 sharp
iPhone 5由 3.5吋拉長到 4吋芒，擺明由 4:3變 16:9，睇 16:9片同 Note II一樣飛走黑邊。雖然佢嘅解像度只有 1,136× 640，比 Note II低，但因屏幕尺寸亦較細，所以睇落畫質同樣細緻，字幕非常 sharp，只係色水冇 Note II咁鮮艷同光猛。

Lo哥睇淡　 iPhone 5隨時冧市

Note II炒價當然同 iPhone 5冇得揮，但炒 iP5必賺嘅神話，亦都可能隨時完結。事關上星期喺 Apple Store從未開訂過嘅情況下（即貨源冇大增），回收價已出現重大調整， 16GB黑機喺 1日內由高位$8,400急插$600，白機最低更試過跌到$7,000，甚至冇人肯收。
雖然之後黑白機都反彈番少少，但就連先達 Lo哥都睇淡，「𠵱家只係得台機同 ifc店抽獎機，但個價已經開始跌，當 Apple Store正式開訂後啲貨一到，根據 4S經驗，回收價起碼跌千幾，即係得番幾嚿水賺。到時啲人再驚啲，爭住放機，隨時炒完都唔奇！」咁到底點解無端端跌價？ Lo哥總結有以下 3大原因。

iPhone 5個勢唔及 4S！

iPhone 5最新回收價

冧價 3大原因

《蘋果日報》圖片

1.嚴打水貨客
呢排政府嚴打水貨客，帶 iP5北上難度大增，上星期更有 iP5水貨倉被警察掃蕩，搞到班大陸莊家怕晒。 Lo哥話上星期三開始一連幾日都冇莊家落嚟接貨，於是好多鋪頭都暫停收機，就算有少少艇仔接都係接黑機，導致白機冇人要，回收價狂插或封盤。
上星期上水一個收埋 300部 iP5嘅水貨倉被掃，仲有 6個水貨客被拉。

2.少自由行買
Lo哥話以前 iP4或 4S就算唔運上大陸，都有大把自由行去佢鋪頭買，但今鋪 walk-in買 iP5嘅人勁少，冇人搶機就自然跌價。
大陸莊家唔接貨，嚇到有啲鋪頭將白機減到$7,500散貨，但仍然冇乜 walk-in客買。

3.水貨爭飯食
現時已有澳洲、美國同英國水貨流入香港，增多咗貨量，點都對回收價有影響。但其實水貨運到嚟香港嘅成本價平唔過同散戶收機好多，所以 Lo哥話呢點唔算主因。
雖然水貨平啲，但冇乜人鍾意買，所以 Lo哥都好少入貨賣，亦都唔想收。

16GB iP5首週冧市走勢

九龍新果店

上年 9月 24日 Apple正式落戶 ifc，隔咗 1年多 5日， Apple又再殺入九龍區，喺又一城開第二間分店。新店雖則冇位擺教主至愛嘅玻璃樓梯，但巨型落地玻璃同大大個蘋果燈箱繼續有齊，果味十足。而抽 iPhone 5亦已多咗呢個拎機地點選擇，唔使局你過海，方便得多。
地址：九龍塘達之路 80號又一城 LG1-45
營業時間： 10:00am至 10:00pm
查詢： 3979 3600

同 IFC Apple Store開幕一樣，首批顧客都有件 tee送，今次就黑色兼連 Festival Walk字眼都大縮水。

短期後市：上網抽機依然 so

上星期中 iP5回收價急跌，收機鋪要一日 update幾次門口報價。

個市雖然冧緊，但上台劏機依然 cover到唔少上台月費，唔介意綁死都仲劏得過。至於 Apple抽機，就點都仲有得賺，不妨繼續抽。暫時以抽黑機執得較多，但多人放就隨時轉向，最好 check實回收價。

Nano SIM照舊剪到

iPhone 5冧市，真正用家梗係最開心，話唔定唔使上台都好快買到機。佢哋擔心嘅，反而係買到後用機嘅切身問題，其中點出張 Nano SIM，肯定最多人煩緊！好彩，其實幾大網絡商都會幫人換 Nano SIM，若你個台要收錢，仲可以去先達搵人剪 SIM，十蚊雞就搞掂，好多人剪完都證實 work。所以之前有人擔心大陸台因冇 Nano SIM而炒唔起，其實唔成立。

Nano SIM面世冇耐，強國已製造出呢把特製剪去剪 Nano SIM，包保啱 size，先達剪一次收$10至$20。

剪到
只要係呢隻長方形晶片嘅 SIM咭就剪到，就算係 Micro SIM，都可以笠番個套度位剪， 4S用家唔使擔心。

剪唔到
惟獨呢隻晶片比較圓嘅舊款 SIM咭就剪唔到，如果你 10年冇換過 SIM，仲用緊呢隻咭，就要去網絡商出番張新咭再剪。