24歲 King身高 183cm、 40吋胸，佢最近話肥咗先至 31吋腰喎，上週六（ 29日）到大浪灣拍照訪問，一落水即刻 chok甫士影相，不過就唔肯着三角或平腳泳褲喇！
真面目
男女通殺 富婆同志新寵 A&F男神：好多人摸我
美牌 Abercrombie& Fitch於香港首間旗艦店 8月份開幕， 100位猛男 model四出巡遊令全城瘋狂。單睇港女漏夜排長龍為同肌男合照，就知大隻男有價有市。而其中一位 A&F港男代表趙勁皓（ King），最近亦被周秀娜經理人公司 GME睇中，成為娜姐師弟。
6呎高， 40吋胸肌兼陽光笑容， King已經引死女，再加上本身係中文大學中文系畢業生，有外形仲有墨水。成為富婆和同志新寵，大隻 King話：「只要鍾意我 嘅話，男仔、女仔都無所謂 嘅！」男女通殺，想唔紅都難！
大浪灣有大隻 King
今年 24歲的 A&F大隻模趙勁皓（ King)，早前被該品牌的模探喺街頭中，邀請佢做 A&F男模香港代表。 8月新店開幕當日店外大排長龍，又多傳媒追訪呢班個個擁有 8嚿朱古力腹肌男模，但論搶鏡，港男始終唔及外地男模。
今年 8月尾於中環的旗艦店開幕， King跟一眾 A＆F男模一樣赤裸上身，四出與途人影合照。即使 𠵱家簽約 GME準備拍電影， King仍兼顧 A＆F模工作。
月入 4萬
港女未識貨，但原來唔少經理人公司已睇中有「 A&F柯震東」之稱的阿 King。據知 StarzPeople、星皓及 Primo亦曾跟大隻 King接洽，但阿 King最終選擇第一間想簽佢 嘅公司 GME，上週三（ 26日）更 喺北角大牌檔簽約。
中大畢業後，估佢唔到竟然做過中學阿 sir，教中史科，現為 3間學校的籃球教練，連埋做 freelance model，再加健身教練一職，月入起碼有 3、 4萬，但今次因為娜姐經理人阿 Roy拍心口力捧，更承諾年尾會開動作片谷阿 King做男主角，阿 King先想博一鋪。
King最近甩拖，女友係台灣靚女 DJ，不過就因為 King做 A＆F模要成日剝衫，又經常要同女仔影親密相，二人經常為此嗌交，最後分手收場。
做娜姐師弟
上週三（ 26日）阿 King喺北角渣華道街市簽約，同場亦有電影《熱浪球愛戰》嘅老細 黄永峰在場，據知年尾會開套動作片《 Mrs. Boo》俾 King擔正。《蘋果日報》圖片
歡迎富婆冧
8月初出席活動， King（左）跟 Chrissie同場，即被 Chrissie經理人 Roy𥄫中，斟他簽約 GME。
雖然阿 King有樣有身材，原來只拍過 4次拖，最近更慘被台灣 DJ女友飛起。 King話：「可能因為（ A&F）份工成日要俾人摸呀，被人攬住呀，唔着衫呀咁，佢唔係咁鍾意，嗌交多咗……不過就冇富婆搵過我食飯喎！（但係有唔少富婆冧你㗎喎？）冧我嘅可以放膽同我講，不過我未必接受，哈哈！（如果開到口話送嘢畀你呢？）我習慣自己賺錢買嘢喎，朋友之間小禮物就得，太貴就唔好啦。」
女人嗒糖，原來連基民都一樣冧阿 King，「真正向我表白嘅就冇，但都有男仔對我好呀，會約我食飯，飲酒囉，我會同佢講有個女仔幾好喎，等佢知我性取向。（介唔介意做同志偶像？）唔介意，無論男定女鍾意我就好喇！」
facebook晒靚肌
話明係男神， King嘅 fb內上載咗唔少運動相，當中更唔少得佢大晒一身靚肌肉嘅肉照啦！
King𠵱家係 3間中學嘅籃球教練，以前亦係中大籃球代表隊。佢話：「我雖然得 6呎，但我入到樽喎！」
King有身材，佢 facebook唔少騷肌相，連黑底三角褲泳照都有，戴埋黑超嘅佢有啲似林丹。
排隊入娛圈
A&F開鋪請來 100位男模巡遊任影，當中只有 6位係港產男模，絕對算得上精英中精英，分分鐘好似阿 King一樣被發掘踩埋入娛樂圈都唔奇。
喇沙仔 Arnold Kwok
曾經 喺喇沙讀書， 𠵱家 喺 Imperial College London讀緊 mechanical engineering。
中大兄弟 Karl Cheung
同阿 King一樣係中大仔， 2人更係中大籃球隊代表，亦一齊做 A＆F model，認真好兄弟。
A貨李治廷 Edwin Tsui
外表有 啲似李治廷，平時鍾意喺 PURE fitness做 gym。
男神谷肌餐單
•一日 3餐，以雞肉及菜為主。
•夜晚 9:30後不進食
King身材 fit爆，但他竟說本身係肥底，他說：「我細佬好肥㗎，我就由細到大都好鍾意運動，所以先 keep到，其實冇刻意點谷，反而節食多。」 
採訪，撰文：林通賢
攝影：范仲良
化粧、髮型： Janice Chan
服裝： Island Wake
形象： Bryan@The Flamming
留言列表
{{ article.title }}
