漫遊毒物

官迫民反　 Borderlands 2

2012年10月03日 ~~ 第280期 Face

一講到 FPS，好多人第一時間都會諗到網上對戰，但鹹魚青菜各有所好，都有鍾意揸槍打電腦嘅。遊戲界近年亦正興起 FPS風格嘅 RPG遊戲，《 Borderlands 2》正屬當中佼佼者，連線協力做任務、打寶儲槍、 4種職業升呢學技能。故事更比一般非打仗即特種部隊嘅 FPS有趣。原來主角係一班外星義士，不甘大奸角霸佔地皮、獨吞資源，齊齊公民抗命擸架生反收地！

Borderlands 2

機種： PS3、 XBox360
廠商： 2K Games
種類： FPS
遊玩人數： 1人（單機）/2-4人（網絡）
售價：$469（ PS3）/$419（ XBox）

CO-OP合作挑戰異星霸權

遊戲發生喺虛構嘅星球潘朵拉，入面有一種全新嘅能量資源 Eridium，大奸角 Handsome Jack企圖霸佔星球獨吞資源，好彩有主角們所屬嘅獵人公會對抗外星地產霸權。遊戲流程似線上 RPG，喺主城接任務做，賺取經驗值同裝備強化自己。最好玩係支援網上 4P打 CO-OP，因為系統設計得好，升呢時經驗值完全平等 share，大家都樂意合作，所以冇 friend在線時撞入陌生人房間 join game都好易，愈多人一齊打任務愈多 fun。

協力時唔理你幾多 level，所有隊友都係賺咁多經驗值，所以帶新手玩係好快升。

主要係喺主城接任務，上集嘅角色今集會變做 NPC畀任務你打，舊 fans會更投入。

《 Borderland》內的槍械備有不同特性，好似圖中呢支 Tediore，以製造簡單便宜、用完即丟而聞名。耗盡子彈後，可以成支槍當炸彈擲向敵人，殺傷力視彈匣裏剩餘彈藥量而定。

每個職業技能樹都有三個分支，有加強自身能力、亦有支援隊友嘅技能。但留意就算盡 50級都學唔到一半技能，升級時要揀定成長方向，咪兩頭唔到岸。

四大職業變出無窮戰法

《 Borderland2》系列最引人入勝之處係四個職業各有特色，再加上技能樹系統，同一個職業學唔同嘅技，打法完全唔同，團隊戰鬥時更可以引申出好多唔同打法。資深玩家 Brondey建議可以先選用 Commando作入門職業：「佢升級後有件防盾可以回血，幾易用。」此外佢又建議新手應多學支援技能，攻擊力低都可以幫隊友補吓彈藥，咁就更多高手樂意同你組隊，玩熟咗先花錢重點技能。

資深玩家愛科幻

Brondey

第 1代《 Borderlands》 09年面世，即出即開始玩嘅「骨灰級」資深玩家 Brondey，覺得佢故事豐富，拍得住 RPG，且比單純升呢打怪嘅 RPG更耐玩，佢話：「𠵱家隻隻槍 game都強調真實，反而唔夠爽，玩得太多真係好厭！我鍾意《 Borderlands》似《 Quake》同《 Epic Tournament》呢類舊式科幻立體動作遊戲，正面駁火打落夠爽，唔使再匿埋 sniper。同埋欣賞佢夠耐玩，我𠵱家玩咗二十幾個鐘先玩到廿幾 Level，四個職業都要升爆「 50呢」，真係有排煲！」