Adrian十分寵愛 Tubby，視牠如同自己家人。

Petbook

黄芷晴　領養更有意義

2013年03月06日 ~~ 第1102期交易通．搵車快線

黃日華的愛女黃芷晴（ Adrian）自細與寵物作伴， 10年黃家收養了 6歲的八哥 Tubby和 12歲的古代牧羊 Boomer，雖然牠們以前的身世悲慘同時懷有陰影，但在黃家的愛心照料下，牠們早已適應了新家庭，過着幸福新生活。 Adrian亦體會到養寵物不需要買，領養更有意義。

採訪於大埔三門仔進行， Adrian拖着 Tubby，一見面 Tubby便在記者和攝影師腳下打轉，「 Tubby好識 social，唔怕陌生人，屋企有客人到，佢會喺人哋腳底打轉，可能等人打賞啲嘢食畀佢。其實 Tubby好為食，屋企開飯時，佢瞓着咗都會彈起身喺枱底打轉，等人畀嘢佢食。」
選在三門仔是 Adrian提議，除了環境不錯外，她還想 Tubby做多些運動，「 Tubby真係好得人鍾意，𠵱家佢太肥喇，只可以食減肥糧。平時得閒會帶佢去唔同地方玩同散步，不過佢行幾步會喘氣，一攰就趴喺地下拉極都唔郁，冇晒佢符。」
Adrian自小便視寵物如家人，「細過養過曲架、貓貓同倉鼠，屋企冇兄弟姊妹，我當咗佢哋係自己細佬妹，要教佢哋去廁所、唔好亂搞破壞，悶就同佢哋玩，唔開心又會同佢講心事。」

有病狗狗更需照顧

Tubby和 Boomer都是黃家在 2010年於救狗之家收養回來，「以前啲寵物有啲係買，有啲係朋友送，今次係第一次收養寵物，我哋喺網上見到 Boomer嘅資料，佢做咗 10年打種狗，而且身上仲有 9個水瘤，雖然知道佢好難照顧，但呢啲先需要幫助，於是決定收養佢。有次爹哋去咗救狗之家喺鴨脷洲嘅會址， Tubby好主動咁親近爹哋，覺得幾有緣分，於是帶佢返屋企。」
接 Boomer回家時，牠的情況並不太好，「佢好瘦，我哋要即刻帶佢去醫院切除水瘤。做完手術後，身體比較虛弱，加上佢年紀大，成家人要日夜留意佢嘅狀況，有次佢傷口唔知點解爆線，嚇親我哋，媽咪仲喊埋出嚟，要即刻送佢去醫院，好彩最後冇事，𠵱家佢好乖又靜，我好鍾意攬住佢㗎。」

Boomer
年齡︰ 12歲
品種︰古代牧羊
Boomer現時肥肥白白，全賴黃家一家對牠悉心照顧。

Tubby
年齡︰ 6歲
品種︰八哥

爹哋被咬反氹狗狗

好動的 Tubby，有時會因為食而闖禍，「我哋收養 Tubby時，對佢背景知道唔多，只係知佢俾主人拋棄，相處落發現佢對以前應該有陰影，好似試過大聲鬧佢，佢會好惡咁對住你係咁吠。有次食完飯成家人打算出街行吓， Tubby就匿喺枱底唔想郁，爹哋想拉佢出嚟，佢突然撲出嚟咬咗爹哋一啖，我哋想鬧佢，但佢好似知道做錯事，係咁流眼淚，知道鬧佢可能會令佢反應過激，反而要氹番佢轉頭，個場面都幾好笑。」
自收養了 Tubby和 Boomer後， Adrian比以前更加關心動物權益和團體的資訊，「其實寵物好有靈性，收養返嚟嘅狗狗都好似識感恩咁，又乖又聽話。知道被拋棄嘅寵物個心唔好受，會盡量關心佢哋多啲。𠵱家開始都有關注動物權益嘅問題，不時會睇吓唔同嘅團體資料，睇吓有冇嘢可以幫到手，好似同朋友呼籲吓領養寵物。」

採訪當日， Adrian帶 Tubby到三門仔散步，想牠活動多一點。

Tubby一見到食物就成隻狗充滿活力，一洗頹樣，為食狗之名果然名不虛傳。

每當疲累， Tubby便伏在地上不願走， Adrian都對牠沒有辦法。

騷 GOODS：健康狗用品

狗狗癡肥點算好？除了做運動外，還可選用以下可幫助狗狗減肥的用具和食品，令減肥事業事半功倍。

3 DOGS LEISURE SHOP
地址︰西貢海傍廣場金寶閣 5號地鋪

Rogz中型犬頸帶$90
採用半鐵鏈半布料製成的頸帶，在狗狗跑得太快時，鐵鏈部分會有限制狗狗的作用，布料則增加了狗狗的舒適度，令主人安心帶狗狗周圍去。

Sold Gold減肥薯仔魚狗糧 4lb$135
蛋白質、脂肪和卡路里的含量比其他狗糧低，適合年紀較大、需要修身的犬隻，而且含有豐富 Omega 3同 6，對皮膚問題有幫助。

Optic Eye Clean清潔眼藥水 118ml$88
香港空氣污染嚴重，狗狗散完步可能對眼黏住唔少灰塵，可以用眼藥水沖走，令對眼時刻保持清潔。