正於理工大學讀Year 3嘅芷晴,雖然身高只得5呎4吋,唔及5呎7吋松岡李那高,但勝在樣夠甜及青春無敵,一樣吸引到日牌搵佢做模。

最近高登熱捧新女,就係黃日華21歲獨女黃芷晴(Adrian)。繼本刊率先爆兩父女接拍王維基開台重頭劇之後,就連日本手袋品牌Samantha Thavasa都睇中Adrian,邀請佢做image girl,踩過界進攻日本市場。而將於暑假便讀完大學的Adrian已決定畢業後正式加入娛圈,更搵媽咪梁潔華做經理人,一於肥水不流別人田。


今年21歲的Adrian超愛日本時裝,09年,多個日本品牌進軍香港,於銅鑼灣世貿舉辦「MOMO Fashion Fair」,Adrian便聽到電台招募,應徵做part-time的「Summer Fashion Intern」,負責襯衫及影相等工作。當時Adrian更刻意低調,冇向主辦單位提過自己就係黃日華女,最後一樣擊敗過百少女成功被聘用。

隱瞞身份賣衫
愈大愈省鏡嘅Adrian,不時於微博post自己嘅手作仔,多數都係一啲小飾物,而且有板有眼頗有水準㗎。Adrian說︰「其實自己由小到大都對日本時裝好有興趣,咁啱森美嘅電台講有個project,我即刻參加。」

10萬酬勞落袋
日本手袋名牌Samantha Thavasa於今年1月進軍香港,便睇中Adrian的家庭背景同日系風格,最近佢便邀請同松岡李那做image girl,拍攝一輯宣傳照,靚相仲會製成mook book(雜誌書)於日本發售,Adrian話︰「之前已經有留意呢個牌子,自己亦好鍾意,所以搵我嘅時候都一口答應。」Adrian仲係學生哥,未簽公司,接job全靠媽咪梁潔華嚴選,據知梁潔華代女兒接洽工作亦易話為,又冇擺星媽款,而今次酬勞仲差唔多10萬添!不過Adrian話未諗將來。提起即將開拍王維基新劇,Adrian更封嘴︰「拍劇嘅嘢唔講喇,唔想回應咁多,等我讀埋呢幾個月先啦!」

有靚仔男友
Adrian同老豆一樣咁鍾意玩微博,更經常post一大班朋友四圍玩嘅相。上年,Adrian發過一段微博,放咗一張同男仔面貼面嘅相,上面仲寫住「兩個人生氣著,看著誰先捨不得」,估計2人應該係耍花槍,單睇外形大家都係靚仔靚女,Adrian都識揀喎!

愈大愈靚
黃芷晴自小愛追星,由Twins、S.H.E再到棒棒堂。09年,棒棒堂於香港開演唱會,經老豆穿針引線之下,頭髮長長嘅黃芷晴,仲可以上台俾王子拖住繞場一周,開始吸引傳媒目光。其實,黃芷晴細個並唔太起眼,經常把頭髮剪短,非常男仔頭,不過慢慢開始打扮,又留長頭髮,減咗唔少baby fat之後仲成個sharp晒。 ####


第一次做image girl,黃芷晴表現算合格,擺甫士功力拍得住松岡。


網友讚索喺討論區內,唔少網民都讚黃芷晴正。


呢套空姐衫雖然包上頸,但查實超緊身,令芷晴睇起嚟身材玲瓏浮凸。


黃日華1家3口感情好到不得了,阿女仲不時post全家福上微博,而且有父母支持入行,條路一定暢順好多啦!網上圖片


今年1月,Samantha Thavasa喺香港搞party,王友良請來Paris Hilton胞妹Nicky Hilton造勢,而黃芷晴當晚亦有出現。


09年,日本名模渡邊知夏子來港主持「MOMO Fashion Fair」開幕,黃芷晴知道招募時裝達人,即刻應徵做part-time。《蘋果日報》圖片


曾經亦係TVB藝員嘅梁潔華非常保護女兒,本刊早前追訪過佢兩母女,問佢係咪準備畀乖女入行拍王維基嘅電視劇,佢即刻用手遮住乖女塊面,免得女兒素顏入鏡。


細路女 9歲 00年,黃日華兩公婆帶埋囡囡出席「小小幼苗培植大賽」,當時芷晴只係普通細路女。《蘋果日報》圖片


TB look 15歲 06年,黃日華同張兆輝兩家人約埋打保齡,15歲嘅黃芷晴忽然變成男仔頭。《忽然1週》圖片


美少女 18歲 09年,仲係棒棒堂fans嘅黃芷晴,俾王子拖上台示眾,留番長頭髮好有玉女feel。


有星味 20歲 00年,減去baby fat、又識着衫,黃芷晴開始有啲星味。網上圖片

arrow
arrow
    全站熱搜

    stacylife 發表在 痞客邦 留言(0) 人氣()