浸大食物安全及環境健康系 Yr.1
Amy（盧慧敏）
5呎 10吋高、體重 108磅的 Amy身形 fit爆，加上性格活潑好動，還以為她必定是校內的活躍分子，怎想到她為煲靚湯不住 hall也不上莊！
U花 U草
浸大有營高妹 為煲湯不住 Hall
麥記食物易肥又冇營養個個知，但有時為求快手醫肚，明知冇益都要塞落肚。
但就讀浸大食物安全及環境健康系 Yr.1的 Amy（盧慧敏）卻向 M記說不，「佢用千年油炸薯條，食咗又熱氣易爆瘡又唔健康，就算同同學去，我都係齋坐唔食，一年都未必食一次 M記！」
為了食得健康，連個個大學生恨到出汁的宿位， Amy都不在乎，「住咗 hall就煲唔到湯畀屋企人飲㗎喇！」
拍攝當日， Amy輕輕鬆鬆已擺出多個專業模特兒的姿勢，不少途人經過都駐足圍觀， 19歲的她卻謙虛地說：「其實我塊面好肥，一笑就會變咗可愛，做唔到好 chok嗰啲樣！」
擁有二分一墨西哥血統的 Amy四歲回港定居，除可講流利廣東話外， 19歲 Amy亦學足廣東人最愛湯水補身。「媽媽是墨西哥人，唔識煲湯進補，為咗身體好同養顏，我不斷睇書學煲湯，去街市問啲主婦煲咩先有益！屋企嘅湯水都係我負責，一星期平均煲兩、三次！由簡單嘅青紅蘿蔔至保五臟健陰嘅石斛田七丹參煲豬𦟌，都難唔到我！」
現於浸大讀食物安全及環境健康的 Amy，自然亦識揀飲揀食。「可能自己讀呢科，所以會好重視食物營養價值同卡路里，好多時都會諗過度過先食！最緊要係多菜少肉，唔係咩都塞得落口！以前拍拖多數都自己煮畀男友食，偶爾都會去食吓放題，不過次數真係好少，平時喺屋企媽咪都係煮餸食飯，蒸水蛋、豆腐嗰啲，墨西哥菜好熱氣唔健康，所以屋企好少煮！」為了健康， Amy更放棄宿位，「我都想屋企人健康啲，如果我住咗 hall屋企就冇人識煲湯，所以都係放棄舍堂生活！」
想做營養師
盡得爸爸優良血統遺傳， Amy身高 5呎 10吋。又高又靚女，半年前她就被模特兒公司看中力邀入行。
「爸爸身高 6呎，所以我都好彩夠高，令我接唔少 catwalk騷。」
雖然 Amy又高又靚，但她終極目標卻不望成為超模，「我唔係 Angelababy，做模特兒冇可能係我嘅終身職業，畢業之後我希望去第三世界國家做營養治療師，提供啱當地居民嘅營養餐單同飲食指導服務，希望幫到佢地！」女神顧家又有愛心， like！
一般港女都鍾意行街買衫煲劇，但 Amy偏偏與別不同，鍾意行街市買餸睇食譜。「自己一手一腳揀材料，望住自己鍾意嘅人食我煮嘅嘢、飲我煲嘅湯，我覺得仲開心過行街睇戲！」
Amy做兼職 model短短半年，多拍與跑步有關的廣告，「可能身高關係，我成日接到要我跑步嘅廣告，記得拍屈臣氏廣告要喺水上面跑，拍咗 4個鐘，對襪濕晒，對腳板皺晒皮，仲有把超大風扇吹住我，拍完之後終於病埋！」
墨西哥住大屋
在墨西哥出世的 Amy與父母和兩位哥哥回港定居，「我冇返過墨西哥，不過記憶中嗰邊間大屋，有泳池又有花園同停車場，香港間屋得 700呎，係墨西哥嗰間嘅三分一，但因為當時只有幾歲，所以連相都冇影低留念！」 
撰文：葉浩婷
攝影：何榮亮
形象： Bryan@the Flaming
化妝： Wing@Wing L image
服裝： Bershka
鳴謝： Soul Models
留言列表
{{ article.title }}
